കുവൈത്ത് സിറ്റി: കുവൈത്ത് ജനസംഖ്യ 4.9 ദശലക്ഷം കവിഞ്ഞതായി പബ്ലിക് അതോറിറ്റി ഫോര്‍ സിവില്‍ ഇന്‍ഫര്‍മേഷന്‍ റിപ്പോര്‍ട്ട്. മുന്‍ വര്‍ഷം ഇത് 4.8 ആയിരുന്നു. ഇന്ത്യക്കാര്‍ അടക്കമുള്ള വിദേശികളുടെ വരവാണ് ജനസംഖ്യയിലെ നേരിയ വര്‍ധനവിന് കാരണം. നിലവില്‍ രാജ്യത്തിന്റെ 31 ശതമാനം കുവൈത്തികളാണ്. 20 ശതമാനവുമായി ഇന്ത്യക്കാരും 13 ശതമാനവുമായി ഈജിപ്തുകാരുമാണ് തൊട്ടുപിറകിലുള്ളത്. സ്വദേശികളിലെ രാജ്യത്തെ ലിംഗാനുപാതത്തില്‍ ഏതാണ്ട് 49 ശതമാനം പുരുഷന്മാരും 51 ശതമാനം സ്ത്രീകളുമാണ്. എന്നാല്‍ പ്രവാസികളില്‍ പുരുഷന്മാരുടെ എണ്ണം 66 ശതമാനവും സ്ത്രീകളുടെ എണ്ണം 34 ശതമാനവുമാണ്. രാജ്യത്തെ മൊത്തം ജനസംഖ്യയുടെ 80 ശതമാനം പേരും 15-64 വയസ്സിന് ഇടയിലുള്ളവരാണ്. 15 വയസ്സിന് താഴെയുള്ളവര്‍ 17 ശതമാനവും, 3 ശതമാനം പേര്‍ 65 വയസ്സിന് മുകളിലുള്ളവരാണ്.

രാജ്യത്തെ ഏറ്റവും ജനസാന്ദ്രതയുള്ള പ്രദേശം സാല്‍മിയയാണ്. 321,190 പേരാണ് ഈ പ്രദേശത്തുള്ളത്. ഫര്‍വാനിയ, ജലീബ് അല്‍-ഷൂയൂഖ്, ഹവല്ലി, മഹ്ബൂല തുടങ്ങിയ സ്ഥലങ്ങളാണ് ജനസാന്ദ്രതയുള്ള മറ്റ് പ്രദേശങ്ങള്‍. രാജ്യത്തെ 2,247,029 തൊഴിലാളികളില്‍ 23 ശതമാനം പൊതു മേഖലയിലും, 77 ശതമാനം സ്വകാര്യ മേഖലയിലാണ് ജോലി ചെയ്യുന്നത്. പൊതുമേഖലയില്‍ 77.52 ശതമാനം കുവൈത്തികളും സ്വകാര്യ മേഖലയില്‍ 31.1 ശതമാനത്തോടെ ഇന്ത്യക്കാരുമാണ് ഏറ്റവും വലിയ തൊഴിലാളി സമൂഹം.