വാഷിങ്ടന്‍: യുഎസ് ഉല്‍പന്നങ്ങള്‍ക്ക് അന്യായ ഇറക്കുമതി തീരുവ ഈടാക്കുന്നുവെന്ന് ആരോപിച്ച് ചുമത്തിയ അധിക തീരുവ 90 ദിവസത്തേക്ക് അമേരിക്ക മരവിപ്പിച്ചു. പകരം 90 ദിവസത്തേക്ക് അടിസ്ഥാന പകരച്ചുങ്കമായ 10 ശതമാനം മാത്രമായിരിക്കും ഈടാക്കുക. കഴിഞ്ഞ ദിവസം മുതലാണ് അധിക തീരുവ ചുമത്തിയിരുന്നത്. എന്നാല്‍ ചൈനയ്ക്ക് ഇളവില്ലെന്നു മാത്രമല്ല, ഇറക്കുമതിത്തീരുവ 125 ശതമാനമായി ഉയര്‍ത്തുകയും ചെയ്തു. ചൈനയ്ക്കു മേല്‍ മൂന്നാം തവണയാണ് യുഎസ് പകരച്ചുങ്കം ചുമത്തുന്നത്.

യുഎസില്‍നിന്ന് ഇറക്കുമതി ചെയ്യുന്ന ഉല്‍പന്നങ്ങള്‍ക്ക് ഉയര്‍ന്ന തീരുവ ഈടാക്കി ദ്രോഹിക്കുന്നുവെന്ന് പറഞ്ഞാണ് അമേരിക്കന്‍ പ്രസിഡന്റ് ട്രംപ് അധിക തീരുവ ചുമത്താന്‍ തീരുമാനിച്ചത്. ഏപ്രില്‍ രണ്ടിനകം ഇറക്കുമതി തീരുവ പിന്‍വലിച്ചില്ലെങ്കില്‍ പകരച്ചുങ്കം പ്രാബല്യത്തില്‍ വരുമെന്നാണ് പറഞ്ഞിരുന്നത്. അമേരിക്കന്‍ പണം കൊണ്ട് മറ്റു രാജ്യങ്ങള്‍ സമ്പന്നരായെന്നും പുതിയ നടപടിയിലൂടെ രാജ്യത്ത് കൂടുതല്‍ വ്യവസായങ്ങള്‍ വരുമെന്നും ദേശീയ കടവും ടാക്‌സ് നിരക്കുകളും കുറയ്ക്കാന്‍ കഴിയുമെന്നും ട്രംപ് അവകാശപ്പെട്ടിരുന്നു. എന്നാല്‍ അധിക തീരുവ ചുമത്തിയതോടെ അമേരിക്കയില്‍ സാധനങ്ങള്‍ക്ക് വില വാണം പോലെ ഉയര്‍ന്നു. ഇത് ശക്തമായ വിമര്‍ശനത്തിനിടയാക്കിയതോടെയാണ് അധിക തീരുവ തല്‍ക്കാലത്തേക്ക് പിന്‍വലിക്കാന്‍ യു.എസിന പ്രേരിപ്പിച്ചത്.