ജിദ്ദ: കൊച്ചി കൂട്ടായ്മ ജിദ്ദയുടെ നേതൃത്വത്തില്‍ നടന്ന ഈദ്, വിഷു, ഈസ്റ്റര്‍ ഫെസ്റ്റിവല്‍ ഉത്സവങ്ങള്‍ക്കതീതമായി ഒരു മലയാളി സാംസ്‌കാരിക മഹോത്സവമായി മാറി. ഷറഫിയ സഫയര്‍ ഓഡിറ്റോറിയത്തില്‍ നടന്ന പരിപാടിയില്‍ ഗായിക മിയ ഈസ മെഹക് എന്നറിയപ്പെടുന്ന ഫോര്‍ട്ട്‌കൊച്ചി സ്വദേശി മിയക്കുട്ടിയുടെ സാന്നിധ്യം ഈ വര്‍ഷത്തെ ഫെസ്റ്റിന്റെ മുഖ്യ ആകര്‍ഷണമായി.
മിയക്കുട്ടി ജിദ്ദയിലെ ആദ്യ സാന്നിധ്യത്തില്‍തന്നെ തന്റെ സ്വരമാധുര്യത്തിലൂടെ പ്രേക്ഷക മനസ്സുകള്‍ കീഴടക്കി. ചോദ്യോത്തര പരിപാടിയിലും നര്‍മപൂരിതമായി പങ്കെടുത്ത മിയക്കുട്ടി ജിദ്ദയിലെ മലയാളികളുടെ ഹൃദയം കവര്‍ന്നു. 'Chat with Miyakkutty' എന്ന സെഷനില്‍ മിയക്കുട്ടിയോട് നേരിട്ട് സംസാരിക്കാനായതിന്റെ ആവേശത്തിലായിരുന്നു സദസ്യര്‍.
ഫെസ്റ്റിന്റെ ഔപചാരിക ഉദ്ഘാടനം സാമൂഹിക-സാംസ്‌കാരിക രംഗത്ത് നിറ സാന്നിധ്യമായ നിസ്സാമി നൈന നിര്‍വഹിച്ചു. 2019ല്‍ ജിബിന്‍ സമദ് കൊച്ചിയുടെ കാര്‍മികത്വത്തില്‍ പുനസംഘടിപ്പിച്ച കൊച്ചികൂട്ടായ്മ ജിദ്ദയുടെ സാംസ്‌കാരിക സാമൂഹിക കാരുണ്യ മേഖലകളിലെ സംഭാവനകളെക്കുറിച്ച് പ്രസിഡന്റ് സനോജ് സൈനുദ്ധീന്‍ ആമുഖപ്രഭാഷണത്തില്‍ വിവരിച്ചു. മുഖ്യാതിഥിയായ മാധ്യമ പ്രവര്‍ത്തകന്‍ മുസാഫിര്‍, തന്റെ അനുഭവങ്ങള്‍ പങ്കുവെച്ചത് പരിപാടിയെ കൂടുതല്‍ പരിപോഷിപ്പിച്ചു.
മിയക്കുട്ടിയെ പൊന്നാട ചാര്‍ത്തി മെമന്റോ നല്‍കി കൊച്ചിക്കൂട്ടായ്മ ആദരിച്ചു. വിവിധ സംഘടനകളുടെ നേതാക്കളായ കെടിഎ മുനീര്‍, റഷീദ് കാവുങ്കല്‍ (ഒഐസിസി), വിപി മുസ്തഫ, നാസ്സര്‍ എടവനക്കാട് (കെഎംസിസി), സലാഹ് കാരാടാന്‍ (മുന്‍ ഇന്ത്യന്‍ സ്‌കൂള്‍ ചെയര്‍മാന്‍), മീഡിയ ഫോറം പ്രസിഡന്റ് കബീര്‍ കൊണ്ടോട്ടി എന്നിവര്‍ ആശംസകള്‍ നേര്‍ന്നു.
പ്രോഗ്രാം കോര്‍ഡിനേറ്റര്‍ ഹിജാസ് കളരിക്കലിന്റെ നേതൃത്വത്തില്‍ ഒരുക്കിയ സംഗീത വേദി, ജിദ്ദയിലെ പ്രതിഭകളെ ഒരുമിപ്പിച്ചു. മിര്‍സ ഷെരിഫ്, ജമാല്‍ പാഷ, സോഫിയ സുനില്‍, മുംതാസ്, മന്‍സൂര്‍ അലി, ബാബു ജോസഫ്, സൈഹ ഫാത്തിമ തുടങ്ങിയവര്‍ ഗാനങ്ങള്‍ ആലപിച്ചു.
മാധ്യമ പ്രവര്‍ത്തകരായ സുല്‍ഫികര്‍ ഓതായി, ജാഫര്‍ലി പാലക്കോട്, ബാദുഷ തുടങ്ങിയവരും സാംസ്‌കാരിക നായകരും ചടങ്ങില്‍ പങ്കെടുത്തു. ട്രഷറര്‍ ബാബു ജോസഫ് നന്ദി പറഞ്ഞു.
ഫോട്ടോ: മിയക്കുട്ടിയെ കൊച്ചി കൂട്ടായ്മ ആദരിച്ചപ്പോള്‍.
.jpg)
