വാഷിംഗ്ടണ്: ഇറാനുമായുള്ള യുദ്ധം അവസാനിപ്പിക്കാന് തനിക്ക് ചൈനയുടെ സഹായം ആവശ്യമില്ലെന്ന് അമേരിക്കന് പ്രസിഡന്റ് ഡൊണാള്ഡ് ട്രംപ്. ചൈനീസ് ഭരണാധികാരി ഷി ജിന്പിംഗുമായുള്ള ഔദ്യോഗിക കൂടിക്കാഴ്ചയ്ക്കായി ബീജിംഗിലേക്ക് തിരിക്കും മുന്പാണ് ട്രംപിന്റെ വിസ്മയിപ്പിക്കുന്ന പ്രസ്താവന. 'ഇറാന് വിഷയത്തില് ഞങ്ങള്ക്ക് ആരുടെയും സഹായം ആവശ്യമില്ല, ഏതെങ്കിലും തരത്തില് ഈ യുദ്ധത്തില് അമേരിക്ക വിജയിക്കും,' ട്രംപ് മാധ്യമങ്ങളോട് പറഞ്ഞു. മൂന്ന് ദിവസത്തെ സന്ദര്ശനത്തിനായി ട്രംപ് ബുധനാഴ്ച വൈകുന്നേരത്തോടെ ബീജിംഗിലെത്തും. രണ്ടാം തവണ പ്രസിഡന്റായി അധികാരമേറ്റ ശേഷം ട്രംപ് നടത്തുന്ന ആദ്യ ചൈനാ സന്ദര്ശനമാണിത്.
ഇറാന് വിഷയം ഷി ജിന്പിംഗുമായുള്ള ചര്ച്ചയില് ഉണ്ടാകുമോ എന്ന കാര്യത്തില് ട്രംപ് വിരുദ്ധമായ സൂചനകളാണ് നല്കിയത്. 'ഞങ്ങള് ഇതേക്കുറിച്ച് ദീര്ഘമായി സംസാരിക്കും' എന്ന് ആദ്യം പറഞ്ഞ അദ്ദേഹം, മിനിറ്റുകള്ക്ക് ശേഷം 'ഇറാന് ഇപ്പോള് പൂര്ണ്ണമായും ഞങ്ങളുടെ നിയന്ത്രണത്തിലാണ്, അതുകൊണ്ട് ചര്ച്ചകളില് ആ വിഷയം ഉണ്ടാകുമെന്ന് തോന്നുന്നില്ല' എന്ന് തിരുത്തിപ്പറയുകയും ചെയ്തു.
ദീര്ഘകാലമായി തുടരുന്ന യുദ്ധവും രാജ്യത്തെ വിലക്കയറ്റവും ട്രംപിന്റെ ജനപ്രീതിയില് ഇടിവുണ്ടാക്കിയിട്ടുണ്ട്. ഹോര്മുസ് കടലിടുക്ക് അടഞ്ഞതോടെ ആഗോള എണ്ണവിതരണം തടസ്സപ്പെടുകയും ഊര്ജ്ജവില കുതിച്ചുയരുകയും ചെയ്തത് ആഗോള സമ്പദ്വ്യവസ്ഥയെ തന്നെ പ്രതിസന്ധിയിലാക്കിയിരിക്കുകയാണ്. ഇറാന് വിഷയത്തേക്കാള് ഉപരിയായി വ്യാപാരത്തിനാകും സന്ദര്ശനത്തില് മുന്ഗണനയെന്ന് ട്രംപ് വ്യക്തമാക്കി. അമേരിക്കന് വിമാനങ്ങളും ഭക്ഷ്യ ഉല്പ്പന്നങ്ങളും ചൈന വാങ്ങുന്നതുമായി ബന്ധപ്പെട്ട കരാറുകളില് അദ്ദേഹം ഒപ്പുവെച്ചേക്കും. ടെസ്ല സിഇഒ ഇലോണ് മസ്ക്, ആപ്പിള് സിഇഒ ടിം കുക്ക് തുടങ്ങി പ്രമുഖ ബിസിനസ്സ് നേതാക്കളുടെ വന് നിരയും ട്രംപിനൊപ്പമുണ്ട്.
കഴിഞ്ഞ വര്ഷം ആരംഭിച്ച വ്യാപാരയുദ്ധത്തിന് പരിഹാരമായി ഒരു 'ബോര്ഡ് ഓഫ് ട്രേഡ്' രൂപീകരിക്കാനാണ് അമേരിക്കന് ഭരണകൂടം ലക്ഷ്യമിടുന്നത്. അപൂര്വ്വ ധാതുക്കളുടെ കയറ്റുമതിയില് ചൈന ഏര്പ്പെടുത്തിയ നിയന്ത്രണങ്ങളും ട്രംപ് ഉയര്ത്തിയ ഇറക്കുമതി നികുതിയും സൃഷ്ടിച്ച തര്ക്കങ്ങള് പരിഹരിക്കാന് ഇതിലൂടെ സാധിക്കുമെന്ന് യുഎസ് കരുതുന്നു.
തായ്വാന് 11 ബില്യണ് ഡോളറിന്റെ ആയുധങ്ങള് നല്കാനുള്ള അമേരിക്കയുടെ നീക്കത്തില് ചൈന കടുത്ത അതൃപ്തി രേഖപ്പെടുത്തിയിട്ടുണ്ട്. ഈ ആയുധക്കരാറിനെക്കുറിച്ചും ഇരു നേതാക്കളും സംസാരിക്കും. ആഗോള ചിപ്പ് നിര്മ്മാണത്തിന്റെ കേന്ദ്രമായ തായ്വാന് എഐ സാങ്കേതിക വിദ്യയുടെ വികസനത്തില് വലിയ പ്രാധാന്യമുള്ളതിനാല്, തായ്വാന് വിഷയത്തിലെ തര്ക്കം ഇരുരാജ്യങ്ങള്ക്കും നിര്ണ്ണായകമാണ്.
വെള്ളിയാഴ്ചത്തെ ചര്ച്ചകള്ക്ക് ശേഷം ട്രംപ് അമേരിക്കയിലേക്ക് മടങ്ങും. ഈ വര്ഷം അവസാനം ഷി ജിന്പിംഗ് അമേരിക്ക സന്ദര്ശിക്കുമെന്നാണ് പ്രതീക്ഷിക്കുന്നത്.
.jpg)
Related News
