മലപ്പുറം: കേരളത്തിന്റെ അടുത്ത മുഖ്യമന്ത്രിയെ സംബന്ധിച്ച അനിശ്ചിതത്വം നിര്‍ണ്ണായക ഘട്ടത്തിലേക്ക്. ഡല്‍ഹിയില്‍ ഹൈക്കമാന്‍ഡ് ചര്‍ച്ചകള്‍ മുറുകുന്നതിനിടെ, കോണ്‍ഗ്രസ് അധ്യക്ഷ സോണിയാ ഗാന്ധി മുസ്ലിം ലീഗ് സംസ്ഥാന അധ്യക്ഷന്‍ സയ്യിദ് സാദിഖലി ശിഹാബ് തങ്ങളെ ഫോണില്‍ വിളിച്ച് സംസാരിച്ചു. വി.ഡി. സതീശനെ മുഖ്യമന്ത്രി സ്ഥാനത്തേക്ക് പിന്തുണയ്ക്കുന്ന നിലപാടാണ് ലീഗ് സ്വീകരിച്ചിരിക്കുന്നത്.

മുഖ്യമന്ത്രി സ്ഥാനത്തേക്ക് വി.ഡി. സതീശന്‍ വരണമെന്നതാണ് തങ്ങളുടെ താല്പര്യമെന്ന് സാദിഖലി തങ്ങള്‍ സോണിയാ ഗാന്ധിയെ നേരിട്ട് അറിയിച്ചു. ഭൂരിഭാഗം എംഎല്‍എമാരുടെ പിന്തുണയും പൊതുജന വികാരവും സതീശന് അനുകൂലമാണെന്നാണ് ലീഗിന്റെ വിലയിരുത്തല്‍. ഘടകകക്ഷികളുടെ ഈ ഉറച്ച നിലപാട് ഹൈക്കമാന്‍ഡ് തീരുമാനത്തില്‍ നിര്‍ണ്ണായകമാകും.

തീരുമാനമെടുക്കുന്നതില്‍ മുതിര്‍ന്ന നേതാവ് എ.കെ. ആന്റണിയുടെ നിലപാടിനായി കാതോര്‍ക്കുകയാണ് ഹൈക്കമാന്‍ഡ്. സോണിയാ ഗാന്ധി ആന്റണിയുമായി ഇതിനോടകം ചര്‍ച്ചകള്‍ പൂര്‍ത്തിയാക്കി. അന്തിമ പ്രഖ്യാപനം ഇന്ന് ഡല്‍ഹിയില്‍ ഉണ്ടാകുമെന്നാണ് സൂചന.

പാണക്കാട് അടിയന്തര യോഗം; ലീഗിന് അതൃപ്തി
മുഖ്യമന്ത്രിയെ നിശ്ചയിക്കുന്നതിലെ കാലതാമസത്തില്‍ ലീഗ് നേതൃത്വം ശക്തമായ അമര്‍ഷം രേഖപ്പെടുത്തി. ഭരണപരമായ സ്തംഭനം ഒഴിവാക്കാന്‍ അടിയന്തര തീരുമാനം വേണമെന്നാണ് ആവശ്യം. ഇതിന്റെ ഭാഗമായി ഇന്ന് പാണക്കാട് ലീഗിന്റെ അടിയന്തര നേതൃയോഗം ചേരും. മുഖ്യമന്ത്രി പ്രഖ്യാപനത്തിലെ കാലതാമസം, ലീഗിന്റെ മന്ത്രിസ്ഥാനങ്ങളും വകുപ്പ് വിഭജനവും, മന്ത്രിസഭാ രൂപീകരണത്തിനായുള്ള മുന്നൊരുക്കങ്ങള്‍ എന്നിവയായിരിക്കും ഇന്നത്തെ യോഗത്തിലെ പ്രധാന ചര്‍ച്ച.

വി.ഡി. സതീശനായി ലീഗ് നടത്തുന്ന സമ്മര്‍ദ്ദം വിജയിക്കുമോ അതോ ഹൈക്കമാന്‍ഡ് മറ്റേതെങ്കിലും നീക്കം നടത്തുമോ എന്നാണ് രാഷ്ട്രീയ കേരളം ഉറ്റുനോക്കുന്നത്.