ദുബായ്: എമിറേറ്റിലെ പള്ളികള്‍ക്ക് സമീപം പാര്‍ക്കിങ് സ്ഥലങ്ങളില്‍ പെയ്ഡ് പാര്‍ക്കിങ് നടപ്പിലാക്കുന്നതിന് തുടക്കം കുറിച്ചു. ഇതിന്റെ ഭാഗമായി പുതിയ 'എം', 'എം.പി' സൂചനബോര്‍ഡുകള്‍ സ്ഥാപിച്ചിട്ടുണ്ട്. ദുബായിലെ പാര്‍ക്കിങ് നിയന്ത്രണ കമ്പനിയായ 'പാര്‍ക്കിനാ'ണ് 59 ഇടങ്ങളിലെ 2100 പാര്‍ക്കിങ് സ്ഥലങ്ങള്‍ നിയന്ത്രിക്കുക. അതേസമയം നമസ്‌കാരത്തിന്റെ ഒരു മണിക്കൂര്‍ സമയം പാര്‍ക്കിങ് സൗജന്യമായിരിക്കും. പള്ളികള്‍ക്ക് സമീപം പാര്‍ക്കിങ് കൂടുതല്‍ കാര്യക്ഷമവും അച്ചടക്കപൂര്‍വവും പാര്‍ക്കിങ് സ്ഥലങ്ങളുടെ ദുരുപയോഗം കുറക്കുന്നതിനൊപ്പം പള്ളികളിലെത്തുന്നവര്‍ക്ക് ആവശ്യമായ സമയങ്ങളില്‍ സൗകര്യം ലഭിക്കുകയും ചെയ്യും. പാര്‍ക്കിനും ദുബായിലെ ഇസ്ലാമികകാര്യ, ജീവകാരുണ്യ പ്രവര്‍ത്തന വകുപ്പും(ഐ.എ.സി.എ.ഡി) പദ്ധതി സംബന്ധിച്ച സഹകരണ കരാറില്‍ നേരത്തെ ഒപ്പുവെച്ചിരുന്നു.

പദ്ധതിയുടെ ഭാഗമായി പാര്‍ക്കിങ് സ്ഥലങ്ങള്‍ രണ്ട് സോണുകളായി തിരിച്ചത്. 41സ്ഥലങ്ങള്‍ സോണ്‍ എം(സ്റ്റാന്റേഡ്), 18 സ്ഥലങ്ങള്‍ സോണ്‍ എം.പി(പ്രീമിയം) യും ആയിരിക്കും. എല്ലാ സ്ഥലങ്ങളിലും നമസ്‌കാര സമയത്തൊഴികെ എല്ലാദിവസവും 24മണിക്കൂറും പാര്‍ക്കിങ്ങിന് നിരക്ക് ഈടാക്കും. സോണ്‍ എം(സ്റ്റാന്റേഡ്) മേഖലയില്‍ അരമണിക്കൂറിന് രണ്ട് ദിര്‍ഹമും മണിക്കൂറിന് നാല് ദിര്‍ഹമുമാണ് നിരക്ക്. അതേസമയം സോണ്‍ എം.പി(പ്രീമിയം) മേഖലയില്‍ അരമണിക്കൂറിന് തിരക്കേറിയ സമയങ്ങളില്‍ മൂന്ന് ദിര്‍ഹമും അല്ലാത്ത സമയങ്ങളില്‍ രണ്ട് ദിര്‍ഹമുമാണ് നിരക്ക്. മണിക്കൂറിന് ഇവിടെ തിരക്കുള്ള സമയങ്ങളില്‍ ആറ് ദിര്‍ഹമും അല്ലാത്തപ്പോള്‍ നാലു ദിര്‍ഹമും നല്‍കണം. സാധാരണ സോണുകളില്‍ രാവിലെ എട്ടു മുതല്‍ 10വരെയും വൈകുന്നേരം നാലുമുതല്‍ രാത്രി എട്ടുവരെയുമാണ് തിരക്കേറിയ സമയങ്ങളായി കണക്കാക്കുന്നത്. ഭാവിയില്‍ ഐ.എ.സി.എ.ഡിയുടെ കീഴിലുള്ള കൂടുതല്‍ പള്ളികളിലേക്കും സംരംഭം വിപുലീകരിച്ചേക്കും.