ലോസാഞ്ചലസ്- സ്പെയിനിന്റെ യുവതാരം അലക്‌സ് ബയേന ഉറുഗ്വായ്‌ക്കെതിരെ നേടിയ ആ വിജയഗോള്‍ വെറുമൊരു ഗോള്‍ മാത്രമായിരുന്നില്ല. അത് സ്‌പെയിനിന്റെ 'പോരാളി രാജകുമാരി' മരിയ കാമാനൊക്കുള്ള പ്രണയത്തിന്റേയും ആദരത്തിന്റേയും കണ്ണീരില്‍ കുതിര്‍ന്ന സമര്‍പ്പണമായിരുന്നു. കഴിഞ്ഞ ഏപ്രില്‍ 16-ന് ഇവിങ്‌സ് സര്‍ക്കോമ എന്ന അപൂര്‍വ അസ്ഥി അര്‍ബുദത്തോടുള്ള 2,392 ദിവസത്തെ നീണ്ട പോരാട്ടത്തിനൊടുവില്‍ വിടപറഞ്ഞ മരിയ, സ്പാനിഷ് ടീമിന്റെ ഭാഗ്യമുദ്രയായിരുന്നു. ജൂണ്‍ 26 അവളുടെ ജന്മദിനമായിരുന്നു. മൈതാനത്തിറങ്ങുമ്പോള്‍ ബയേനയുടെ മനസ്സിലും ഹൃദയത്തിലും മരിയയുടെ ഓര്‍മ്മകള്‍ മാത്രമാണുണ്ടായിരുന്നത്. വിണ്ണിലിരുന്ന് അവള്‍ തനിക്കൊരു കൈത്താങ്ങ് നല്‍കുമെന്ന് ആ താരം ഉറച്ചുവിശ്വസിച്ചിരുന്നു.

മത്സരത്തിന്റെ 42-ാം മിനിറ്റില്‍ ഉറുഗ്വായുടെ വല കുലുക്കിയ ശേഷം ബയേന ഇരുകൈകളും ആകാശത്തേക്കുയര്‍ത്തി വിതുമ്പലോടെ നോക്കിയ ആ നിമിഷം ലോകമെമ്പടുമുള്ള ഫുട്‌ബോള്‍ പ്രേമികളുടെ കണ്ണുനിറച്ചു. 'സ്‌പെയിനിനായി ലോകകപ്പില്‍ ഒരു ഗോള്‍ നേടുക എന്നത് ഏതൊരു കുട്ടിയുടേയും സ്വപ്നമാണ്. പക്ഷേ ഈ ഗോള്‍ ഏറെ സവിശേഷമാണ്. ഇന്ന് അവളുടെ ജന്മദിനമായതുകൊണ്ട് തന്നെ എനിക്കിത് മരിയയ്ക്ക് സമര്‍പ്പിക്കണമായിരുന്നു,' മത്സരശേഷം വികാരാധീനനായി ബയേന പറഞ്ഞു. ഗോളിന്റെ റീപ്ലേ കണ്ടപ്പോള്‍ സ്വര്‍ഗ്ഗത്തിലിരുന്ന് അവള്‍ ആ പന്തിന്മേല്‍ ഒരു ചെറിയ തട്ട് തന്നതുപോലെയാണ് തനിക്ക് തോന്നിയതെന്നും അവന്‍ കൂട്ടിച്ചേര്‍ത്തു. ബയേനയുടെ ഈ ഹൃദയസ്പര്‍ശിയായ പ്രവൃത്തി മരിയയുടെ കുടുംബത്തെ, പ്രത്യേകിച്ച് അവളുടെ സഹോദരി ലൂസിയയെ അങ്ങേയറ്റം വികാരഭരിതയാക്കി. 'എപ്പോഴും അവളുടെ ടീമില്‍, എപ്പോഴും ഒന്നിച്ച്,' എന്നാണ് ലൂസിയ സോഷ്യല്‍ മീഡിയയില്‍ കുറിച്ചത്.

ബയേനയും മരിയയും തമ്മിലുള്ള സൗഹൃദം അത്രമേല്‍ ആഴത്തിലുള്ളതായിരുന്നു. അര്‍ബുദത്തോടുള്ള അവളുടെ പോരാട്ടത്തിലുടനീളം ബയേന അവള്‍ക്കൊപ്പം ഉണ്ടായിരുന്നു. കഴിഞ്ഞ യൂറോപ്യന്‍ അണ്ടര്‍-21 ചാമ്പ്യന്‍ഷിപ്പ് കിരീടം നേടിയപ്പോള്‍ പോലും അവളെയും കൂടെക്കൂട്ടി ബയേന പോഡിയത്തിലേക്ക് കയറിയിരുന്നു. 2024-ലെ യൂറോ കപ്പ് വിജയത്തില്‍ സ്പാനിഷ് ടീമിലെ കളിക്കാര്‍ക്കും ആരാധകര്‍ക്കും ഒരുപോലെ പ്രിയങ്കരിയായ അവള്‍ അവരുടെ കരുത്തിന്റെ പ്രതീകമായിരുന്നു. ഇന്ന് അവള്‍ ഓര്‍മ്മയായി മാറുമ്പോഴും, ആ സ്‌നേഹബന്ധം മരണത്തിനപ്പുറവും ജ്വലിച്ചുനില്‍ക്കുകയാണെന്ന് ഈ ലോകകപ്പ് വേദി തെളിയിക്കുന്നു.

ശനിയാഴ്ച പുലര്‍ച്ചെ നടന്ന ഫിഫ ലോകകപ്പ് ഗ്രൂപ്പ് എച്ചിലെ നിര്‍ണായക മത്സരത്തില്‍ ബയേനയുടെ ഈ ഏക ഗോളിലാണ് സ്പെയിന്‍ ഉറുഗ്വായ്യെ 1-0 ന് പരാജയപ്പെടുത്തിയത്. ഈ വിജയത്തോടെ ഏഴ് പോയിന്റുമായി സ്‌പെയിന്‍ ഗ്രൂപ്പില്‍ ഒന്നാമതെത്തി. കളിയിലെ വിജയത്തേക്കാള്‍, ആകാശത്തേക്ക് നോക്കി കണ്ണീരണിഞ്ഞ ബയേനയുടെ മുഖവും, അവന് കരുത്തായി മാറിയ മരിയ എന്ന പോരാളി പെണ്‍കുട്ടിയുടെ ഓര്‍മ്മകളുമാണ് ആ ലോകകപ്പ് രാവില്‍ ഫുട്‌ബോള്‍ ലോകം നെഞ്ചിലേറ്റിയത്.