ലണ്ടന്- ലണ്ടന് സര്വകലാശാലയിലെ ബിര്ക്ക്ബെക്കില് ചീഫ് ജസ്റ്റിസ് സൂര്യകാന്ത് നടത്തിയ പ്രഭാഷണത്തിനിടെ നാടകീയ രംഗങ്ങള് അരങ്ങേറി. ഇന്ത്യയിലെ വിയോജിപ്പുകളോടുള്ള ഭരണകൂട സമീപനത്തെയും അദ്ദേഹത്തിന്റെ വിവാദപരമായ 'പാറ്റ' പരാമര്ശത്തെയും കുറിച്ച് സദസ്സില് നിന്നു ഉയര്ന്ന ചോദ്യങ്ങളാണ് കടുത്ത വാഗ്വാദത്തിനും സംഘര്ഷാവസ്ഥക്കും കാരണമായത്. ജൂണ് 4-ന് 'ആര്ട്ടിഫിഷ്യല് ഇന്റലിജന്സും അന്താരാഷ്ട്ര നിയമവും' എന്ന വിഷയത്തില് ചീഫ് ജസ്റ്റിസ് സംസാരിച്ചതിന് പിന്നാലെയായിരുന്നു സംഭവം.
ചോദ്യോത്തര വേളയിലാണ് സദസ്സിലുണ്ടായിരുന്ന ചിലര് ഇന്ത്യയിലെ ജനാധിപത്യ മൂല്യങ്ങളുടെ തകര്ച്ചയെക്കുറിച്ചും വിയോജിക്കുന്നവരോടുള്ള ശത്രുതയെക്കുറിച്ചും ചോദ്യങ്ങള് ഉന്നയിച്ചത്. ഇന്ത്യയിലും അന്താരാഷ്ട്ര തലത്തിലും വിയോജിപ്പുകളോടുള്ള ഭരണകൂടത്തിന്റെ വിദ്വേഷത്തില് വലിയ ആശങ്കയുണ്ടെന്നും അത് ചീഫ് ജസ്റ്റിസിന്റെ സമീപനങ്ങളിലും നിഴലിക്കുന്നുണ്ടെന്നും ഒരു പ്രതിനിധി ആരോപിച്ചു. എന്നാല് ഈ ചോദ്യങ്ങള് ചര്ച്ചാവിഷയവുമായി ബന്ധമില്ലാത്തതാണെന്ന് ചൂണ്ടിക്കാട്ടി മോഡറേറ്റര് ഇടപെട്ട് തടയാന് ശ്രമിച്ചതോടെ സദസ്സില് കടുത്ത ബഹളവും തര്ക്കവുമുണ്ടായി.
ഈ തടസ്സപ്പെടുത്തലുകളെയും ബഹളത്തെയും ലണ്ടനിലെ ഇന്ത്യന് ഹൈക്കമ്മീഷന് ശക്തമായി അപലപിച്ചു. ചീഫ് ജസ്റ്റിസിനോട് മോശമായി പെരുമാറിയവരുടെ നടപടി ഒട്ടും ഉചിതമല്ലെന്നും ജനാധിപത്യ സമൂഹത്തില് അഭിപ്രായവ്യത്യാസങ്ങള് സ്വാഭാവികമാണെങ്കിലും അത് മാന്യവും സഭ്യവുമായ രീതിയിലായിരിക്കണം പ്രകടിപ്പിക്കേണ്ടതെന്നും ഹൈക്കമ്മീഷന് വെള്ളിയാഴ്ച പുറത്തിറക്കിയ പ്രസ്താവനയില് വ്യക്തമാക്കി. പൊതുവേദികളില് പാലിക്കേണ്ട മര്യാദകളുടെ ലംഘനമാണ് ലണ്ടനില് നടന്നതെന്നും അവര് കൂട്ടിച്ചേര്ത്തു.
മെയ് 15-ന് ഒരു കോടതി വാദത്തിനിടെ ചീഫ് ജസ്റ്റിസ് സൂര്യകാന്ത് നടത്തിയ പരാമര്ശമാണ് ഈ പ്രതിഷേധങ്ങള്ക്ക് ആധാരം. തൊഴിലില്ലാത്ത യുവാക്കള് സോഷ്യല് മീഡിയയിലേക്കും വിവരാവകാശ ആക്ടിവിസത്തിലേക്കും തിരിയുന്നതിനെക്കുറിച്ച് ആശങ്ക പ്രകടിപ്പിക്കുന്നതിനിടയിലാണ്, ഇത്തരം യുവാക്കള് 'പാറ്റകളെപ്പോലെ' സമൂഹത്തില് പരാദങ്ങളായി മാറുന്നു എന്ന് അദ്ദേഹം വാക്കാല് നിരീക്ഷിച്ചത്. ഈ പരാമര്ശം രാജ്യവ്യാപകമായി വലിയ ജനരോഷത്തിന് കാരണമായിരുന്നു. എന്നാല് താന് വ്യാജ ബിരുദങ്ങള് ഉപയോഗിച്ച് ഇത്തരം പ്രവര്ത്തനങ്ങളില് ഏര്പ്പെടുന്നവരെയാണ് ഉദ്ദേശിച്ചതെന്നും അല്ലാതെ പൊതുവെ തൊഴിലില്ലാത്ത യുവാക്കളെയല്ലെന്നും ചീഫ് ജസ്റ്റിസ് പിന്നീട് വ്യക്തത വരുത്തിയിരുന്നു.
ചീഫ് ജസ്റ്റിസിന്റെ ഈ പരാമര്ശത്തെ പരിഹസിച്ചുകൊണ്ട് സോഷ്യല് മീഡിയയില് രൂപംകൊണ്ട 'കോക്രോച്ച് ജനതാ പാര്ട്ടി' എന്ന കൂട്ടായ്മ ഈ വിഷയം വീണ്ടും ഏറ്റെടുത്തു കഴിഞ്ഞു. ലണ്ടനില് നടന്ന പ്രതിഷേധത്തിന്റെ വീഡിയോകള് ഇവര് ഓണ്ലൈനില് വ്യാപകമായി പ്രചരിപ്പിക്കുകയും രാജ്യത്തെ തൊഴിലില്ലായ്മയ്ക്കും സ്ഥാപനങ്ങളുടെ ഉത്തരവാദിത്തമില്ലായ്മയ്ക്കുമെതിരെ ശബ്ദമുയര്ത്താന് ഇത് ഉപയോഗിക്കുകയും ചെയ്യുന്നു. ഈ സംഭവങ്ങളുടെ പശ്ചാത്തലത്തില്, നീറ്റ്, സി.ബി.എസ്.ഇ പരീക്ഷാ ക്രമക്കേടുകളില് പ്രതിഷേധിച്ച് ഇന്ന് ദല്ഹിയിലെ ജന്തര് മന്തറില് കേന്ദ്ര വിദ്യാഭ്യാസ മന്ത്രി ധര്മേന്ദ്ര പ്രധാന്റെ രാജി ആവശ്യപ്പെട്ട് വന് പ്രതിഷേധം സംഘടിപ്പിച്ചിരിക്കുകയാണ് സി.ജെ.പി.
Related News
