ന്യൂഡല്‍ഹി: മുംബൈയില്‍ നിന്ന് ദുബായിലേക്ക് പുറപ്പെട്ട ഇന്‍ഡിഗോ വിമാനം കാര്‍ഗോ ഹോള്‍ഡില്‍ പുക കണ്ടെത്തിയതിനെ തുടര്‍ന്ന് ഗുജറാത്തിലെ രാജ്‌കോട്ടില്‍ അടിയന്തരമായി ഇറക്കി. 194 യാത്രക്കാരുമായി സഞ്ചരിച്ച 6C 1452 (6E 1452) നമ്പര്‍ വിമാനമാണ് സുരക്ഷിതമായി ലാന്‍ഡ് ചെയ്തത്. വിമാനത്തിലുണ്ടായിരുന്ന എല്ലാ യാത്രക്കാരും സുരക്ഷിതരായി പുറത്തിറങ്ങിയതായി അധികൃതര്‍ അറിയിച്ചു.

വിമാനത്തിന്റെ കാര്‍ഗോ ഭാഗത്ത് പുക പടരുന്നതായി ശ്രദ്ധയില്‍പ്പെട്ടയുടന്‍ പൈലറ്റുമാര്‍ രാജ്‌കോട്ട് വിമാനത്താവള അധികൃതരുമായി ബന്ധപ്പെടുകയും, തുടര്‍ന്ന് വിമാനത്താവളത്തില്‍ പൂര്‍ണ്ണ അടിയന്തരാവസ്ഥ പഖ്യാപിക്കുകയും ചെയ്തു. 'ദുബായിലേക്ക് പോകുകയായിരുന്ന ഇന്‍ഡിഗോ വിമാനത്തിന്റെ കാര്‍ഗോ ഭാഗത്ത് പുക കണ്ടെത്തിയതിനെ തുടര്‍ന്ന് രാജ്‌കോട്ട് വിമാനത്താവളത്തില്‍ അടിയന്തരമായി ഇറക്കുകയായിരുന്നു. വിമാനം സുരക്ഷിതമായി ലാന്‍ഡ് ചെയ്തു, എല്ലാ യാത്രക്കാരും സുരക്ഷിതരാണ്,' രാജ്‌കോട്ട് എയര്‍പോര്‍ട്ട് ഡയറക്ടര്‍ ദിഗന്ത ബോറ വ്യക്തമാക്കി.

എണ്‍പതിലധികം ആഭ്യന്തര നഗരങ്ങളിലേക്കും മുപ്പതിലേറെ അന്താരാഷ്ട്ര കേന്ദ്രങ്ങളിലേക്കും ഇന്‍ഡിഗോ സര്‍വീസ് നടത്തുന്നുണ്ട്. എയര്‍ബസ് എ320, എ321 സീരീസ് വിമാനങ്ങളും എ.ടി.ആര്‍ 72-600 ടര്‍ബോപ്രോപ്പ് വിമാനങ്ങളുമാണ് ഇന്‍ഡിഗോ പ്രധാനമായും സര്‍വീസുകള്‍ക്കായി ഉപയോഗിക്കുന്നത്.