വാഷിങ്ടണ്:സി.എന്.എന്, പൊളിറ്റിക്കൊ, എം.എസ് നൗ എന്നീ മാധ്യമസ്ഥാപനങ്ങള്ക്ക് വൈറ്റ് ഹൗസില് പ്രവേശനം നിഷേധിച്ച പ്രസിഡന്റ് ഡൊണാള്ഡ് ട്രംപ് ഭരണകൂടത്തിന്റെ നടപടി അമേരിക്കയിലെ പ്രമുഖ ടെലിവിഷന് ശൃംഖലകള് ഒറ്റക്കെട്ടായി എതിര്ക്കും.. പ്രമുഖ മാധ്യമങങള് ഉള്പ്പെടുന്ന ടിവി പൂള് പ്രസിഡന്റിന്റെ 'പൂള് കവറേജ്' താല്ക്കാലികമായി നിര്ത്തിവച്ചു.
വൈറ്റ് ഹൗസ് യാത്രകളിലും പരിപാടികളിലും അഞ്ച് പ്രധാന നെറ്റ്വര്ക്കുകള് മാറിമാറിയാണ് ടിവി പൂളിന്റെ ചുമതല വഹിക്കുന്നത്. ഒരേസമയം എല്ലാ ടെലിവിഷന് സംഘങ്ങള്ക്കും പ്രസിഡന്റിനെ പിന്തുടരാന് ആവശ്യമായ സ്ഥലവും സൗകര്യവും ലഭ്യമല്ലാത്തതിനാല് ഒരു നെറ്റ്വര്ക്ക് ശേഖരിക്കുന്ന ലൈവ് വീഡിയോ മറ്റ് മാധ്യമങ്ങള്ക്ക് പങ്കുവയ്ക്കുകയാണ് ഈ സംവിധാനത്തിന്റെ രീതി. സി.എന്.എന്നിനും പ്രസിഡന്റ് ട്രംപിന്റെ ന്യൂയോര്ക്ക് സന്ദര്ശനവും യുഎന് പൊതുസഭാ പരിപാടികളും കവര് ചെയ്യാനുള്ള ചുമതലയുണ്ടായിരുന്നു. എന്നാല് വൈറ്റ് ഹൗസ് പ്രവേശനം തടഞ്ഞതോടെ സി.എന്.എന്നിന് ചുമതല നിര്വഹിക്കാനായില്ല. തുടര്ന്ന് മറ്റൊരു നെറ്റ്വര്ക്ക് പകരം ചുമതലയെടുക്കേണ്ടതില്ലെന്നായിരുന്നു തീരുമാനം.
ഇതോടെ പ്രസിഡന്റിന്റെ ചില പരിപാടികളുടെ ടെലിവിഷന് ദൃശ്യങ്ങളും ശബ്ദവും സാധാരണ രീതിയില് ലഭ്യമാകാതിരുന്ന സാഹചര്യമുണ്ടായി. അതേസമയം പ്രിന്റ്, റേഡിയോ, വാര്ത്താ ഏജന്സി പൂളുകള് തുടര്ന്നും പ്രവര്ത്തിച്ചു.
ട്രംപ് ഭരണകൂടത്തിനെതിരെ വാഷിങ്ടണ് ഡിസിയിലെ ഫെഡറല് കോടതിയില് മാധ്യമങ്ങള് സംയുക്തമായി കേസ് നല്കി. തങ്ങളുടെ റിപ്പോര്ട്ടിങ്ങിന്റെ ഉള്ളടക്കത്തോടുള്ള ഭരണകൂടത്തിന്റെ എതിര്പ്പാണ് പ്രവേശനം നിഷേധിച്ചതിന് കാരണമെന്നും ഇത് അമേരിക്കന് ഭരണഘടന ഉറപ്പുനല്കുന്ന മാധ്യമസ്വാതന്ത്ര്യത്തിന്റെയും സ്വതന്ത്ര മാധ്യമപ്രവര്ത്തനത്തിന്റെയും അവകാശങ്ങളെ ലംഘിക്കുന്നതാണെന്നും ഹര്ജിയില് ആരോപിച്ചു. വിലക്ക് അടിയന്തരമായി തടയുന്നതിനുള്ള താല്ക്കാലിക ഉത്തരവും മാധ്യമപ്രവര്ത്തകരുടെ പ്രവേശനം പുനഃസ്ഥാപിക്കണമെന്നും സ്ഥാപനങ്ങള് കോടതിയോട് ആവശ്യപ്പെട്ടു. കേസില് ബുധനാഴ്ച വാദം കേള്ക്കാന് തീരുമാനിച്ചിട്ടുണ്ട്.
'വ്യാജവാര്ത്ത' നല്കുന്നുവെന്നും ദേശീയസുരക്ഷയ്ക്ക് ഭീഷണിയാകുന്ന തെറ്റായ റിപ്പോര്ട്ടുകള് പ്രസിദ്ധീകരിക്കുന്നുവെന്നുമാണ് ട്രംപിന്റെ ആരോപണം. വൈറ്റ് ഹൗസ് പ്രവേശനം മാധ്യമങ്ങളുടെ അവകാശമല്ലെന്നും തങ്ങള് അുവദിക്കുന്ന സൗകര്യമാണെന്നുമാണ് വൈറ്റ് ഹൗസ് പറയുന്നത്
.jpg)
Related News
