ദോഹ: ഖത്തറിലെ റാസ് ലഫാന്‍ വ്യവസായ നഗരത്തിലെ ഗ്യാസ് കേന്ദ്രത്തിലുണ്ടായ വന്‍ സ്ഫോടനത്തില്‍ 13 പേര്‍ കൊല്ലപ്പെട്ടു. 66 പേര്‍ക്ക് പരിക്കേറ്റു. ഗള്‍ഫ് മേഖലയിലെ ഊര്‍ജ്ജ കേന്ദ്രങ്ങളില്‍ അടുത്തിടെയുണ്ടായ ഏറ്റവും വലിയ അപകടങ്ങളിലൊന്നാണിത്.

അപകടം നടന്ന വിവരം ഖത്തര്‍ ഊര്‍ജ്ജ മന്ത്രി സാദ് അല്‍ കാബിയാണ് സ്ഥിരീകരിച്ചത്. കൊല്ലപ്പെട്ടവര്‍ ഇന്ത്യക്കാരും പാകിസ്ഥാനികളുമാണ്. പരിക്കേറ്റ 66 പേരും ചികിത്സയിലാണെന്നും, ആരുടെയും നില ഗുരുതരമല്ലെന്നും അദ്ദേഹം അറിയിച്ചു. ഇവര്‍ക്ക് ആവശ്യമായ എല്ലാ വൈദ്യസഹായങ്ങളും ലഭ്യമാക്കുന്നുണ്ട്.

അട്ടിമറിയല്ല, സാങ്കേതിക തകരാര്‍
മധ്യേഷ്യയിലെ യുദ്ധത്തിന്റെ പശ്ചാത്തലത്തില്‍ മേഖലയിലെ ഊര്‍ജ്ജ കേന്ദ്രങ്ങള്‍ക്കു നേരെ ഇറാന്‍ ആക്രമണങ്ങള്‍ നടത്തുന്ന സാഹചര്യത്തില്‍, സ്ഫോടനം അട്ടിമറിയാണോ എന്ന് സംശയമുയര്‍ന്നിരുന്നു. എന്നാല്‍, ഇത് അട്ടിമറിയല്ലെന്നും തികച്ചും ആകസ്മികമായ ഒരു അപകടമാണെന്നും ഊര്‍ജ്ജ മന്ത്രി വ്യക്തമാക്കി. ഞായറാഴ്ച രാത്രിയുണ്ടായ സ്ഫോടനത്തിന് കാരണം ഒരു 'സാങ്കേതിക തകരാറാണെന്ന്' ആഭ്യന്തര മന്ത്രാലയവും അറിയിച്ചു.

ബാഴ്സാന്‍ പ്രാദേശിക ഗ്യാസ് വിതരണ കേന്ദ്രത്തില്‍, പ്രവര്‍ത്തനം ആരംഭിക്കുന്നതിനിടെയാണ് സ്ഫോടനവും തീപിടുത്തവും ഉണ്ടായത്. തീ അണച്ചതായും സ്ഥിതിഗതികള്‍ നിയന്ത്രണവിധേയമാണെന്നും ഖത്തര്‍ എനര്‍ജി അറിയിച്ചു. സ്ഫോടനം ഗ്യാസ് കയറ്റുമതിയെയോ ആഭ്യന്തര ആവശ്യങ്ങള്‍ക്കായുള്ള വിതരണത്തെയോ ബാധിക്കില്ലെന്നും, പരിസ്ഥിതിക്ക് ദോഷകരമായ യാതൊരു പ്രത്യാഘാതങ്ങളും ഉണ്ടായിട്ടില്ലെന്നും മന്ത്രി സാദ് അല്‍ കാബി ഉറപ്പുനല്‍കി.

ഖത്തറിന്റെ തലസ്ഥാനമായ ദോഹയില്‍ നിന്ന് 64 കിലോമീറ്റര്‍ അകലെയാണ് സ്ഫോടനം നടന്നത്. 20 കിലോമീറ്റര്‍ അകലെ നിന്നുപോലും തീജ്വാലകളും പുകയും ദൃശ്യമായിരുന്നു. സംഭവത്തില്‍ സമഗ്രമായ സാങ്കേതിക അന്വേഷണം നടന്നു വരികയാണെന്ന് അധികൃതര്‍ വ്യക്തമാക്കി.