ആലപ്പുഴ: ഗര്ഭിണിയായ ഭാര്യ ജീവനൊടുക്കിയതറിഞ്ഞ് ദോഹയില് നിന്ന് നാട്ടിലേക്ക് തിരിച്ച പ്രവാസി യുവാവിനെ ബെംഗളൂരുവിലെ ലോഡ്ജില് തൂങ്ങിമരിച്ച നിലയില് കണ്ടെത്തി. എടത്വ കൊടുപ്പുന്ന പുത്തന്വീട്ടില് പി.എസ്. സനുക്കുട്ടനെയാണ് (30) മരിച്ച നിലയില് കണ്ടെത്തിയത്. ഇയാളുടെ ഭാര്യ മാവേലിക്കര ഉമ്പര്നാട് പഴയതോപ്പില് ഹരീഷ്മയെ (27) കഴിഞ്ഞ ദിവസം വീട്ടിനുള്ളില് തൂങ്ങിമരിച്ച നിലയില് കണ്ടെത്തിയിരുന്നു. നാലുമാസം മുന്പായിരുന്നു ഇവരുടെ വിവാഹം. ഒരു മാസം മുന്പാണ് സനുക്കുട്ടന് ജോലിക്കായി ദോഹയിലേക്ക് പോയത്. ഹരീഷ്മ മൂന്ന് മാസം ഗര്ഭിണിയായിരുന്നു.
ഭാര്യയുടെ മരണവിവരമറിഞ്ഞ് സനുക്കുട്ടന് അടിയന്തരമായി നാട്ടിലേക്ക് പുറപ്പെടുകയായിരുന്നു. ബെംഗളൂരു വഴി കണക്ഷന് ഫ്ലൈറ്റില് നെടുമ്പാശേരി വിമാനത്താവളത്തില് എത്തുമെന്നാണ് വീട്ടുകാരെ അറിയിച്ചിരുന്നത്. ഇതനുസരിച്ച് സഹോദരനും ബന്ധുവും നെടുമ്പാശേരിയില് കാത്തുനിന്നെങ്കിലും അദ്ദേഹം എത്തിയില്ല. തുടര്ന്ന് നടത്തിയ അന്വേഷണത്തില് സനുക്കുട്ടന് ബെംഗളൂരു വിമാനത്താവളത്തില് ഇറങ്ങിയതായി സ്ഥിരീകരിച്ചു. ഫോണില് ബന്ധപ്പെടാന് കഴിയാതെ വന്നതോടെ ബന്ധുക്കള് ബെംഗളൂരുവിലെത്തി മലയാളി അസോസിയേഷന്റെയും പൊലീസിന്റെയും സഹായം തേടുകയായിരുന്നു. ഇതിനിടെ ഒരു ലോഡ്ജില് മലയാളി യുവാവിനെ തൂങ്ങിമരിച്ച നിലയില് കണ്ടെത്തിയതായി പൊലീസ് അറിയിക്കുകയും ബന്ധുക്കള് എത്തി മരിച്ചത് സനുക്കുട്ടനാണെന്ന് തിരിച്ചറിയുകയുമായിരുന്നു.
സംഭവത്തിന് പിന്നാലെ സനുക്കുട്ടനും കുടുംബത്തിനുമെതിരെ ഗുരുതര ഗാര്ഹിക പീഡന ആരോപണവുമായി ഹരീഷ്മയുടെ കുടുംബം രംഗത്തുവന്നു. വിവാഹശേഷം സനുക്കുട്ടന് മദ്യപിച്ച് വീട്ടിലെത്തി ഹരീഷ്മയെ ശാരീരികമായി ഉപദ്രവിച്ചിരുന്നുവെന്നും ഇതിന്റെ ദൃശ്യങ്ങള് ബന്ധുക്കള്ക്ക് അയച്ചുനല്കിയിരുന്നുവെന്നും പ്രദേശവാസികളും വെളിപ്പെടുത്തുന്നു. ഹരീഷ്മയുടെ വീട്ടുകാര് മാവേലിക്കര പോലീസില് പരാതിയും നല്കിയിട്ടുണ്ട്.
ഞായറാഴ്ച മാവേലിക്കരയില് നടന്ന ഹരീഷ്മയുടെ സംസ്കാര ചടങ്ങുകളില് പങ്കെടുക്കാനെത്തിയ സനുക്കുട്ടന്റെ ബന്ധുക്കളെ യുവതിയുടെ വീട്ടുകാര് തടയുകയും മൃതദേഹം കാണാന് അനുവദിക്കാതിരിക്കുകയും ചെയ്തു. ഗാര്ഹിക പീഡന ആരോപണങ്ങള് ഉള്പ്പെടെയുള്ള കാര്യങ്ങളില് പൊലീസ് സമഗ്രമായ അന്വേഷണം നടത്തിവരികയാണ്.
Related News
