ഗാങ്‌ടോക്ക്, സിക്കിം : 42ാമത് ഓള്‍ ഇന്ത്യ ഗവര്‍ണേഴ്‌സ് ഗോള്‍ഡ് കപ്പ് ഫുട്‌ബോള്‍ ടൂര്‍ണമെന്റില്‍ സുദേവ ഡല്‍ഹി എഫ്‌സിയെ 2-1ന് പരാജയപ്പെടുത്തി ഗോകുലം കേരള എഫ്‌സി സെമിഫൈനലില്‍ പ്രവേശിച്ചു. ഗാങ്‌ടോക്കിലെ പാല്‍ജോര്‍ സ്‌റ്റേഡിയത്തില്‍ ബ്രസീലിയന്‍ മുന്നേറ്റ താരം വിക്ടര്‍ മാത്യൂസിന്റെ രണ്ടാം പകുതിയിലെ ഇരട്ടഗോളുകളാണ് മലബാറിയന്‍സിന് വിജയം സമ്മാനിച്ചത്.
ആദ്യ പകുതി ഗോള്‍രഹിതമായി അവസാനിച്ച മത്സരത്തില്‍ 63, 73 മിനിറ്റുകളിലാണ് വിക്ടര്‍ മാത്യൂസ് ഗോളുകള്‍ നേടിയത്. ആദ്യ പകുതിയില്‍ മികച്ച കളിയോടെയാണ് സുദേവ ഡല്‍ഹി എഫ്‌സി കളത്തിലിറങ്ങിയത്. മധ്യനിരയിലെ ഗോകുലത്തിന്റെ പാസിങ് നീക്കങ്ങളെ ഫലപ്രദമായി തടഞ്ഞ ഡല്‍ഹി ടീം, എതിരാളികള്‍ക്ക് അവസരങ്ങള്‍ സൃഷ്ടിക്കുന്നത് പ്രയാസകരമാക്കി. ഇരുടീമുകളും ഗോള്‍ നേടാന്‍ ശ്രമിച്ചെങ്കിലും ആദ്യ പകുതി 0-0 ല്‍ അവസാനിച്ചു.
രണ്ടാം പകുതിയില്‍ കൂടുതല്‍ ആക്രമണോത്സുകമായാണ് ഗോകുലം കേരള തിരിച്ചെത്തിയത്. പകരക്കാരായി വിക്ടര്‍ മാത്യൂസും ക്രിസ്‌ലന്‍ ഹെന്റികെയും കളത്തിലിറങ്ങിയത് ടീമിന്റെ മുന്നേറ്റനിരയ്ക്ക് കൂടുതല്‍ കരുത്തേകി. 63ാം മിനിറ്റില്‍ വിക്ടര്‍ മാത്യൂസ് ഗോകുലത്തിന് ലീഡ് സമ്മാനിച്ചു.
എന്നാല്‍ സുദേവ ഡല്‍ഹി തിരിച്ചടിച്ച് സ്‌കോര്‍ 1-1 ആക്കി. പിന്നാലെ ഗോകുലം കേരള ആക്രമണം ശക്തമാക്കിയപ്പോള്‍ 73ാം മിനിറ്റില്‍ വിക്ടര്‍ വീണ്ടും വലകുലുക്കി.
കഴിഞ്ഞ മത്സരത്തിലും ഗോള്‍ നേടിയ വിക്ടര്‍ മാത്യൂസ് മികച്ച പ്രകടനമാണ് കാഴ്ചവെക്കുന്നത്. രണ്ടാം പകുതിയിലെ പകരക്കാരുടെ നിര്‍ണായക സ്വാധീനവും മുഖ്യ പരിശീലകന്‍ കാര്‍ലോസ് എഡ്വാര്‍ഡോ പരെയ്‌റയുടെ തന്ത്രപരമായ നീക്കങ്ങളും ഗോകുലത്തിന്റെ വിജയത്തില്‍ നിര്‍ണായകമായി.
13ന് നടക്കുന്ന സെമിഫൈനലില്‍ സിക്കിം അക്രമണ്‍ എഫ്‌സിയും ഈസ്റ്റ് ബംഗാള്‍ എഫ്‌സിയും തമ്മിലുള്ള ക്വാര്‍ട്ടര്‍ ഫൈനലിലെ വിജയികളെയാണ് ഗോകുലം കേരള എഫ്‌സി നേരിടുക.