ന്യൂഡല്‍ഹി: പ്രതിഷേധങ്ങള്‍ക്ക് അനുമതി നിഷേധിക്കപ്പെട്ട ജന്തര്‍ മന്തറി്ല്‍ പ്രവേശിച്ച് പ്രതിഷേധിച്ച കോക്രോച്ച് ജനതാ പാര്‍ട്ടി (സി.ജെ.പി) നേതാക്കളെ ഡല്‍ഹി പൊലീസ് കസ്റ്റഡിയിലെടുത്തു. സൗരവ് ദാസ്, അശുതോഷ് റങ്ക, അജിന്‍ക്യ ഷിന്‍ഡെ എന്നിവരെയാണ് കസ്റ്റഡിയിലെടുത്തത്.
മുഖഅയ തിരഞ്ഞെടുപ്പ് കമ്മിഷണര്‍ ഗ്യാനേഷ് കുമാറിനെതിരെ പ്രതിഷേധിക്കാനായി ജന്തര്‍ മന്തറിലെത്തിയ സി.ജെ.പി പ്രവര്‍ത്തകര്‍ അടച്ചിട്ട ബാരിക്കേഡുകള്‍ മറികടന്ന് സ്ഥലത്ത് പ്രവേശിക്കുകയായിരുന്നുവെന്നാണ് പൊലീസ് പറയുന്നത്. നേതാക്കള്‍ക്കൊപ്പം മറ്റു പ്രവര്‍ത്തകരെയും കസ്റ്റഡിയിലെടുത്തിട്ടുണ്ട്.
അനുമതിയില്ലാതെ പ്രവേശിക്കല്‍, മുന്‍കരുതല്‍ നടപടികളുമായി ബന്ധപ്പെട്ട വ്യവസ്ഥകളുടെ ലംഘനം, ഔദ്യോഗിക കൃത്യനിര്‍വഹണം തടസ്സപ്പെടുത്തല്‍ തുടങ്ങിയ കുറ്റങ്ങള്‍ ചുമത്തിയതായി സി.ജെ.പിയുടെ നിയമവിഭാഗം മേധാവി രത്‌ന സിങ് അറിയിച്ചു. നേതാക്കളെ അറസ്റ്റ് ചെയ്‌തെന്നാണ് പാര്‍ട്ടി പറയുന്നത്. എന്നാല്‍, ഇവരെ മുന്‍കരുതല്‍ കസ്റ്റഡിയിലാണ് എടുത്തതെന്നാണ് പൊലീസ് വൃത്തങ്ങള്‍ വ്യക്തമാക്കിയത്.
ജന്തര്‍ മന്തറിനെ പ്രതിഷേധകേന്ദ്രങ്ങളുടെ പട്ടികയില്‍നിന്ന് നീക്കിയ ഡല്‍ഹി പൊലീസിന്റെ തീരുമാനത്തിനെതിരെ സി.ജെ.പി രംഗത്തെത്തിയിരുന്നു. പ്രതിഷേധത്തിന് മറ്റൊരു തീയതി അനുവദിക്കണമെന്ന് ആവശ്യപ്പെട്ട് പാര്‍ട്ടി അധികൃതര്‍ക്ക് അന്ത്യശാസനവും നല്‍കിയിരുന്നു.
പ്രതിപക്ഷത്തിന്റെ പ്രതിഷേധം തുടരുമെന്ന് ലോക്‌സഭയിലെ പ്രതിപക്ഷ നേതാവ് രാഹുല്‍ ഗാന്ധി വ്യക്തമാക്കി. ചീഫ് ജസ്റ്റിസിനോടും സുപ്രീംകോടതിയോടും നീതിന്യായ വ്യവസ്ഥയോടും കോണ്‍ഗ്രസിന് പരമമായ ബഹുമാനമുണ്ടെന്നും രാഷ്ട്രീയവും ജനകീയവുമായ ചെറുത്തുനില്‍പ്പ് തുടരുമെന്നും അദ്ദേഹം പറഞ്ഞു.
ഡല്‍ഹിയില്‍ സമരക്കാരെ നിയന്ത്രിക്കാന്‍ സര്‍ക്കാര്‍ അവര്‍ക്ക് അവസരം നിഷേധിക്കുന്നത് തുടരുകയാണ്. പ്രതിഷേധങ്ങള്‍ക്കായി പുതുതായി നിര്‍ദേശിച്ച മൂന്ന് കേന്ദ്രങ്ങളില്‍ ഒന്നായ രാംലീല മൈതാനത്ത് അടുത്ത രണ്ടര മാസത്തേക്ക് ഒഴിവുള്ള തീയതികളില്ല. ഡിസംബര്‍ 29, 30, 31 തീയതികളില്‍ മാത്രമാണ് ബുക്കിങ്ങിന് അവസരമുള്ളത്.
Related News
