റിയാദ്: റിയാദ് നഗരത്തിലും അല്‍-ഖര്‍ജ് ഗവര്‍ണറേറ്റിലും പുറപ്പെടുവിച്ചിരുന്ന അപകടമുന്നറിയിപ്പ് സൗദി സിവില്‍ ഡിഫന്‍സ് പിന്‍വലിച്ചു. നാഷണല്‍ ഏര്‍ലി വാണിംഗ് പ്ലാറ്റ്ഫോം വഴിയാണ് റിയാദിലും പരിസര പ്രദേശങ്ങളിലും അപകടസാധ്യത ഒഴിവായതായി സിവില്‍ ഡിഫന്‍സ് അറിയിച്ചത്.
റിയാദ് നഗരത്തെ ലക്ഷ്യമിട്ടെത്തിയ ഹൂതി ബാലിസ്റ്റിക് മിസൈല്‍ സൗദി വ്യോമസേന വിജയകരമായി തടയുകയും തകര്‍ക്കുകയും ചെയ്തതായി യെമനിലെ സഖ്യസേന വക്താവ് മേജര്‍ ജനറല്‍ തുര്‍ക്കി അല്‍-മാലിക്കിയും അറിയിച്ചു.
അപകട സാഹചര്യങ്ങള്‍ ഒഴിവായെങ്കിലും സുരക്ഷാ നിര്‍ദേശങ്ങള്‍ പൂര്‍ണ്ണമായും പാലിക്കണമെന്ന് സിവില്‍ ഡിഫന്‍സ് പൊതുജനങ്ങളോട് അഭ്യര്‍ത്ഥിച്ചു. അപകടസ്ഥലങ്ങളില്‍ ആളുകള്‍ തടിച്ചുകൂടുന്നതും ദൃശ്യങ്ങള്‍ ചിത്രീകരിക്കുന്നതും ഒഴിവാക്കണം.
മിസൈലുകളും ഡ്രോണുകളും പ്രതിരോധിക്കുന്നതിന്റെയോ അവ പതിച്ച സ്ഥലങ്ങളുടെയോ ദൃശ്യങ്ങള്‍ ചിത്രീകരിക്കുന്നതും സോഷ്യല്‍ മീഡിയ വഴി പ്രചരിപ്പിക്കുന്നതും നിയമവിരുദ്ധവും ശിക്ഷാര്‍ഹവുമാണെന്ന് ആഭ്യന്തര മന്ത്രാലയം മുന്നറിയിപ്പ് നല്‍കി. ഏതെങ്കിലും തരത്തിലുള്ള അടിയന്തര സാഹചര്യങ്ങളുണ്ടായാല്‍ 911 എന്ന നമ്പറില്‍ ബന്ധപ്പെടണമെന്നും അധികൃതര്‍ അറിയിച്ചു.
Related News
