റിയാദ്: ടാന്സാനിയയില് നിന്നുള്ള നാന്സി, നൈസ് എന്നീ ഇരട്ടക്കുട്ടികളെ വേര്പെടുത്തുന്ന സങ്കീര്ണ്ണമായ ശസ്ത്രക്രിയ റിയാദിലെ കിംഗ് അബ്ദുള്ള സ്പെഷ്യലിസ്റ്റ് ചില്ഡ്രന്സ് ഹോസ്പിറ്റലില് വിജയകരമായി പൂര്ത്തിയാക്കി. സൗദി അറേബ്യയുടെ സ്പെഷ്യലൈസ്ഡ് മെഡിക്കല് സംഘമാണ് ഈ നേട്ടം കൈവരിച്ചത്.
കിംഗ് സല്മാന് ഹ്യുമാനിറ്റേറിയന് എയ്ഡ് ആന്ഡ് റിലീഫ് സെന്റര് (KSrelief) സൂപ്പര്വൈസര് ജനറലും സൗദി കണ്ജോയിന്ഡ് ട്വിന്സ് പ്രോഗ്രാം തലവനുമായ ഡോ. അബ്ദുള്ള അല് റാബിഅയുടെ നേതൃത്വത്തിലായിരുന്നു ശസ്ത്രക്രിയ. 16.5 മണിക്കൂര് നീണ്ടുനിന്ന ശസ്ത്രക്രിയ 10 ഘട്ടങ്ങളിലായാണ് പൂര്ത്തിയാക്കിയത്.
പീഡിയാട്രിക് സര്ജറി, അനസ്തേഷ്യ, പ്ലാസ്റ്റിക് സര്ജറി, യൂറോളജി, ഓര്ത്തോപീഡിക്സ് തുടങ്ങിയ വിഭാഗങ്ങളില് നിന്നുള്ള 35 കണ്സള്ട്ടന്റുമാരും സ്പെഷ്യലിസ്റ്റുകളും നഴ്സുമാരും ടെക്നീഷ്യന്മാരും ദൗത്യത്തില് പങ്കാളികളായി. നെഞ്ചിന്റെ താഴ്ഭാഗം, വയര്, ഇടുപ്പ് എന്നീ ഭാഗങ്ങള് ഒട്ടിച്ചേര്ന്ന നിലയിലായിരുന്നു കുട്ടികള്. കരള്, വന്കുടല്, മൂത്രനാളി, പ്രത്യുല്പാദന അവയവങ്ങള് എന്നിവ ഇവര് പങ്കുവെച്ചിരുന്നു. കൂടാതെ ഇരുവര്ക്കുമായി വൈകല്യമുള്ള ഒരു താഴത്തെ അവയവവും ഉണ്ടായിരുന്നു.
ടാന്സാനിയയില് നിന്നുള്ള ഇരട്ടക്കുട്ടികളെ വേര്പെടുത്തുന്ന മൂന്നാമത്തെ വിജയകരമായ ശസ്ത്രക്രിയയാണിത്. സൗദി കണ്ജോയിന്ഡ് ട്വിന്സ് പ്രോഗ്രാമിന് കീഴില് നടക്കുന്ന 71-ാമത്തെ ശസ്ത്രക്രിയയാണിതെന്ന് ഡോ. അല് റാബിഅ ചൂണ്ടിക്കാട്ടി.
കഴിഞ്ഞ 35 വര്ഷത്തിനിടെ 28 രാജ്യങ്ങളില് നിന്നായി 157 കേസുകളാണ് ഈ പദ്ധതിയുടെ ഭാഗമായി പരിശോധിച്ചിട്ടുള്ളത്. ആഗോളതലത്തില് സൗദി അറേബ്യ വഹിക്കുന്ന മാനുഷികവും വൈദ്യശാസ്ത്രപരവുമായ മുന്നിര പങ്കിന്റെ തെളിവായി ഈ വിജയം മാറുന്നു. കുട്ടികളുടെ ആരോഗ്യനില തൃപ്തികരമാണെന്നും ഡോക്ടര്മാര് അറിയിച്ചു.
Related News
