ഗാസ- ഫലസ്തീനിലെ ഭരണകക്ഷിയായ ഫതഹ് പ്രസ്ഥാനത്തിന്റെ സെന്‍ട്രല്‍ കമ്മിറ്റിയിലേക്ക് നടന്ന തിരഞ്ഞെടുപ്പിന്റെ പ്രാഥമിക ഫലങ്ങള്‍ പുറത്തുവന്നു. ഫലസ്തീന്‍ നാഷണല്‍ ഇന്റലിജന്‍സ് സര്‍വീസ് മേധാവി മജീദ് ഫറജ്, അല്‍-അഖ്‌സ ശഹീദ് ബ്രിഗേഡ്‌സ് നേതാവ് സക്കറിയ സുബൈദി (50), ഫലസ്തീന്‍ അതോറിറ്റി പ്രസിഡന്റിന്റെ മൂത്ത മകനായ യാസര്‍ അബ്ബാസ് എന്നിവര്‍ പ്രാഥമിക ഫലങ്ങളില്‍ വിജയം ഉറപ്പിച്ചു. റാമല്ല, ഗാസ, കെയ്റോ, ബെയ്‌റൂട്ട് എന്നിവിടങ്ങളിലായി നടന്ന പ്രസ്ഥാനത്തിന്റെ എട്ടാമത് ജനറല്‍ കോണ്‍ഫറന്‍സിന്റെ സമാപനത്തിലാണ് വോട്ടെടുപ്പ് നടന്നതെന്ന് വാര്‍ത്താ ഏജന്‍സികള്‍ റിപ്പോര്‍ട്ട് ചെയ്തു.

തിരഞ്ഞെടുക്കപ്പെട്ടവരില്‍ അല്‍-അഖ്‌സ ശഹീദ് ബ്രിഗേഡ്‌സിന്റെ മുന്‍നിര നേതാവായ സക്കറിയ സുബൈദി, ഇസ്രായേലും ഹമാസും തമ്മില്‍ നടന്ന തടവുകാരുടെ കൈമാറ്റ കരാറിലൂടെയാണ് കഴിഞ്ഞ വര്‍ഷം ഇസ്രായേല്‍ ജയിലില്‍ നിന്ന് മോചിതനായത്. അതേസമയം, ബിസിനസുകാരനായ യാസര്‍ അബ്ബാസ് (64) കഴിഞ്ഞ അഞ്ച് വര്‍ഷമായി പ്രസിഡന്റിന്റെ പ്രത്യേക പ്രതിനിധിയായി നിയമിതനായതിന് ശേഷമാണ് ഫലസ്തീന്‍ രാഷ്ട്രീയത്തില്‍ സജീവമാകുന്നത്. എന്നാല്‍, 2002 മുതല്‍ ഇസ്രായേല്‍ ജയിലില്‍ കഴിയുന്ന പ്രമുഖ നേതാവ് മര്‍വാന്‍ ബര്‍ഗൂതി തന്റെ സീറ്റ് നിലനിര്‍ത്തുകയും തിരഞ്ഞെടുപ്പില്‍ ഏറ്റവും കൂടുതല്‍ വോട്ടുകള്‍ നേടുകയും ചെയ്തു.

ഫതഹ് ഡെപ്യൂട്ടി ലീഡര്‍ മഹ്‌മൂദ് അല്‍-ആലൂല്‍, ഫലസ്തീന്‍ അതോറിറ്റി ഡെപ്യൂട്ടി ഹെഡ് ഹുസൈന്‍ അല്‍-ഷെയ്ഖ്, മുന്‍ സെക്രട്ടറി ജിബ്രീല്‍ റജൂബ്, മുന്‍ ഇന്റലിജന്‍സ് ഡയറക്ടര്‍ തൗഫീഖ് അല്‍-തിരാവി എന്നിവരും സെന്‍ട്രല്‍ കമ്മിറ്റിയിലെ തങ്ങളുടെ സീറ്റുകള്‍ നിലനിര്‍ത്തിയിട്ടുണ്ട്. ഇത്തവണ കനത്ത പോരാട്ടമാണ് തിരഞ്ഞെടുപ്പില്‍ നടന്നത്. സെന്‍ട്രല്‍ കമ്മിറ്റിയിലെ 18 സീറ്റുകളിലേക്ക് 59 സ്ഥാനാര്‍ത്ഥികളും, വിപ്ലവ കൗണ്‍സിലിലെ 80 സീറ്റുകളിലേക്ക് 450 അംഗങ്ങളും മത്സരിച്ചു. ആകെയുള്ള 2,507 വോട്ടര്‍മാരില്‍ 94.64 ശതമാനം പേരും വോട്ട് രേഖപ്പെടുത്തിയതായി കോണ്‍ഫറന്‍സ് എക്‌സിക്യൂട്ടീവ് ഡയറക്ടര്‍ മുനീര്‍ സലാമേഹ് അറിയിച്ചു.

കഴിഞ്ഞ വ്യാഴാഴ്ച ആരംഭിച്ച ഫതഹ് ജനറല്‍ കോണ്‍ഫറന്‍സില്‍ മഹ്‌മൂദ് അബ്ബാസിനെ പ്രസ്ഥാനത്തിന്റെ തലവനായി വീണ്ടും ഐകകണ്‌ഠ്യേന തിരഞ്ഞെടുത്തു. കഴിഞ്ഞ രണ്ട് പതിറ്റാണ്ടിലേറെയായി പ്രസ്ഥാനത്തെയും ഫലസ്തീന്‍ അതോറിറ്റിയെയും അദ്ദേഹം തന്നെയാണ് നയിക്കുന്നത്. ഗാസ യുദ്ധാനന്തരം ഫലസ്തീന്‍ അതോറിറ്റിയുടെ ഭരണം പുനഃസ്ഥാപിക്കുന്നതിന് മുന്നോടിയായി നേതൃത്വത്തില്‍ പരിഷ്‌കാരങ്ങള്‍ കൊണ്ടുവരണമെന്ന അന്താരാഷ്ട്ര സമ്മര്‍ദ്ദങ്ങള്‍ക്കിടയിലാണ് ഫതഹ് പ്രസ്ഥാനത്തില്‍ ഈ പുതിയ നേതൃമാറ്റങ്ങള്‍ നടക്കുന്നത്.