മക്ക: ഈ വര്‍ഷത്തെ ഹജ്ജ് സീസണിന്റെ ഭാഗമായി മക്കയിലേക്ക് പ്രവേശിക്കുന്ന പ്രധാന പാതകളിലൂടെ എഴുപതിനായിരത്തിലധികം (70,000) വാഹനങ്ങള്‍ കടന്നുപോയതായി ജനറല്‍ അതോറിറ്റി ഫോര്‍ റോഡ്സ് അറിയിച്ചു. തീര്‍ത്ഥാടകരുടെ ചരക്കുനീക്കവും യാത്രയും സുഗമമാക്കുന്നതിനും റോഡ് ശൃംഖലകളുടെ കാര്യക്ഷമത വര്‍ദ്ധിപ്പിക്കുന്നതിനുമായി അതോറിറ്റി നടപ്പിലാക്കിയ പ്രവര്‍ത്തനങ്ങളുടെ ഭാഗമായാണ് ഈ കണക്കുകള്‍ പുറത്തുവിട്ടത്.

വിവിധ ദിശകളില്‍ നിന്ന് വിശുദ്ധ നഗരത്തിലേക്ക് പ്രവേശിച്ച വാഹനങ്ങളുടെ റോഡ് തിരിച്ചുള്ള ഔദ്യോഗിക വിവരങ്ങള്‍ താഴെ നല്‍കുന്നു:

പ്രിന്‍സ് മുഹമ്മദ് ബിന്‍ സല്‍മാന്‍ റോഡ്: ഏറ്റവും കൂടുതല്‍ വാഹനങ്ങള്‍ കടന്നുപോയത് ഈ പാതയിലൂടെയാണ് 24,600 വാഹനങ്ങള്‍.

അല്‍-സൈല്‍ അല്‍-കബീര്‍ വഴിയുള്ള ത്വാഇഫ് - മക്ക റോഡ്: 11,600 വാഹനങ്ങള്‍.

അല്‍-ലൈത്ത് റോഡ്: 13,400 വാഹനങ്ങള്‍.

മദീന - മക്ക റോഡ്: 9,500 വാഹനങ്ങള്‍.

മക്ക - ത്വാഇഫ് റോഡ് (അഖബ അല്‍-ഹദ): 7,600 വാഹനങ്ങള്‍.

മക്ക - ജിദ്ദ റോഡ് (ബഹ്‌റ): 6,900 വാഹനങ്ങള്‍.

മക്ക - ജിദ്ദ ഡയറക്ട് റോഡ്: 3,000 വാഹനങ്ങള്‍.

പുണ്യസ്ഥലങ്ങളിലേക്ക് നീളുന്ന എല്ലാ റോഡുകളിലും തങ്ങളുടെ ഫീല്‍ഡ് ടീമുകള്‍ മുഴുവന്‍ സമയ നിരീക്ഷണത്തിലാണെന്ന് അതോറിറ്റി വ്യക്തമാക്കി. ട്രാഫിക് നിയന്ത്രിക്കുന്നതിനൊപ്പം റോഡ് സുരക്ഷ ഉറപ്പാക്കാനും തീര്‍ത്ഥാടകര്‍ക്ക് മികച്ച സേവനങ്ങള്‍ ലഭ്യമാക്കാനുമുള്ള തയ്യാറെടുപ്പുകള്‍ പൂര്‍ത്തിയായിട്ടുണ്ട്. ഹജ്ജ് വേളയില്‍ വാഹനങ്ങളുടെ സുഗമമായ ഒഴുക്കും തീര്‍ത്ഥാടകരുടെ യാത്രാ സുഖവും ഉറപ്പാക്കാന്‍ അതോറിറ്റി പ്രതിജ്ഞാബദ്ധമാണെന്നും അധികൃതര്‍ അറിയിച്ചു.