മക്ക: സൗദി അറേബ്യയില്‍ പുതിയ ഉംറ സീസണിന് തുടക്കം കുറിച്ചുകൊണ്ട് ഉംറ വിസകളുടെ വിതരണവും തീര്‍ത്ഥാടകരുടെ പ്രവേശനവും ആരംഭിച്ചു. ദുല്‍ഹജ്ജ് 14 (മേയ് 31, ഞായറാഴ്ച) മുതലാണ് വിസകള്‍ അനുവദിച്ചു തുടങ്ങിയതെന്ന് സൗദി ഹജ്ജ്-ഉംറ മന്ത്രാലയം അറിയിച്ചു. ഹിജ്‌റ വര്‍ഷം 1448-ലെ ഉംറ കലണ്ടര്‍ പ്രകാരം, തിങ്കളാഴ്ച മുതല്‍ തീര്‍ത്ഥാടകര്‍ക്ക് മക്കയില്‍ പ്രവേശിക്കാനും 'നുസുക്' ആപ്പ് വഴി ഉംറ പെര്‍മിറ്റുകള്‍ നേടാനും സാധിക്കും.

പുതിയ സീസണിലെ വിസ വിതരണവും തീര്‍ത്ഥാടന കാലാവധിയും സംബന്ധിച്ച കൃത്യമായ സമയവിവരങ്ങള്‍ മന്ത്രാലയം പുറത്തുവിട്ടിട്ടുണ്ട്. ഇതനുസരിച്ച് ഉംറ വിസകള്‍ അനുവദിക്കുന്ന അവസാന തീയതി 1448 ശവ്വാല്‍ 1 (2027 മാര്‍ച്ച് 9) ആയിരിക്കും. തീര്‍ത്ഥാടകര്‍ക്ക് സൗദി അറേബ്യയിലേക്ക് പ്രവേശിക്കാവുന്ന അവസാന തീയതി ശവ്വാല്‍ 15 (2027 മാര്‍ച്ച് 23) ആണ്. പുതിയ സീസണിലെ ഉംറ തീര്‍ത്ഥാടകര്‍ക്ക് തിരിച്ചുപോകാനുള്ള അവസാന തീയതി ശവ്വാല്‍ 30 (2027 ഏപ്രില്‍ 7) ആയിരിക്കുമെന്നും മന്ത്രാലയം സ്ഥിരീകരിച്ചു.

തീര്‍ത്ഥാടകര്‍ക്ക് ഉന്നത നിലവാരത്തിലുള്ള സേവനങ്ങള്‍ ഉറപ്പാക്കുന്നതിനായി, അംഗീകൃത സമയവിവരങ്ങളും മന്ത്രാലയത്തിന്റെ നിര്‍ദ്ദേശങ്ങളും കൃത്യമായി പാലിക്കണമെന്ന് ഉംറ സര്‍വീസ് കമ്പനികളോടും വിദേശ ഏജന്റുമാരോടും മന്ത്രാലയം ആവശ്യപ്പെട്ടു. നിര്‍ദ്ദിഷ്ട നിയമങ്ങള്‍ ലംഘിക്കുന്നവര്‍ക്കെതിരെ കര്‍ശന നടപടിയുണ്ടാകുമെന്നും അധികൃതര്‍ വ്യക്തമാക്കി.