ന്യൂഡല്‍ഹി: ഇന്ത്യക്കെതിരായ ഉപരോധ ഭീഷണി തിരിച്ചടിക്കുമെന്ന് റഷ്യന്‍ പ്രസിഡന്റ് വ്ളാദിമിര്‍ പുടിന്‍. ഇന്ത്യയുടെ തന്ത്രപരമായ സ്വയംഭരണാവകാശത്തെ താന്‍ പിന്തുണക്കുന്നു. ഉപരോധങ്ങളിലൂടെ ഇന്ത്യയെ സമ്മര്‍ദത്തിലാക്കാനുള്ള ഏത് ശ്രമവും പരാജയപ്പെടുമെന്ന് അദ്ദേഹം പറഞ്ഞു.
പരമാധികാര രാജ്യങ്ങള്‍ക്ക് തങ്ങളുടെ പ്രതിരോധ-സാമ്പത്തിക പങ്കാളികളെ തിരഞ്ഞെടുക്കാനുള്ള സ്വാതന്ത്ര്യം ഉണ്ടായിരിക്കണമെന്നും പുടിന്‍ വ്യക്തമാക്കി. റഷ്യയിലെ സെന്റ് പീറ്റേഴ്‌സ്ബര്‍ഗ് ഇന്റര്‍നാഷണല്‍ ഇക്കണോമിക് ഫോറത്തില്‍ സംസാരിക്കുകയായിരുന്നു അദ്ദേഹം.

ഇന്ത്യ എപ്പോഴും സ്വന്തം ദേശീയ താത്പര്യങ്ങള്‍ക്കനുസരിച്ചാണ് പ്രവര്‍ത്തിച്ചിട്ടുള്ളതെന്നും പുടിന്‍ പറഞ്ഞു. റഷ്യയുമായുള്ള ബന്ധത്തിന്റെ പേരില്‍ ബാഹ്യസമ്മര്‍ദങ്ങളുണ്ടായാലും അത് തുടരും. ഒരു പരമാധികാര രാജ്യമെന്ന നിലയിലാണ് ഇന്ത്യ എപ്പോഴും പ്രവര്‍ത്തിക്കുന്നത്. ഉപരോധ ഭീഷണികളുണ്ടായാല്‍ മോദിയുടെ നേതൃത്വത്തില്‍ ഇന്ത്യ ഉടന്‍ തിരിച്ചടിക്കുമെന്നും അദ്ദേഹം വ്യക്തമാക്കി.

ഇന്ത്യക്ക് ഏറ്റവും ആധുനികവും അനുയോജ്യവുമെന്ന് കരുതുന്ന ഉത്പന്നങ്ങള്‍ തിരഞ്ഞെടുക്കാന്‍ സ്വാതന്ത്ര്യമുണ്ടെന്നും അദ്ദേഹം കൂട്ടിച്ചേര്‍ത്തു. മറ്റുള്ളവര്‍ എന്ത് പറഞ്ഞാലും ഇന്ത്യ എപ്പോഴും ഈ രീതിയിലാണ് പ്രവര്‍ത്തിച്ചിട്ടുള്ളത്. റഷ്യന്‍ പ്രതിരോധ സംവിധാനങ്ങളായ Su57 അല്ലെങ്കില്‍ S500 എയര്‍ ഡിഫന്‍സ് പ്ലാറ്റ്‌ഫോം സ്വന്തമാക്കിയാല്‍ യു.എസില്‍നിന്ന് ഇന്ത്യയ്ക്ക് ഉപരോധ സമ്മര്‍ദം നേരിടേണ്ടിവരുമോ എന്ന ചോദ്യത്തിന്, ഇന്ത്യ ദേശീയ താത്പര്യങ്ങളാല്‍ നയിക്കപ്പെടുന്ന സ്വതന്ത്ര വിദേശനയമാണ് സ്ഥിരമായി പിന്തുടരുന്നതെന്നും പുടിന്‍ മറുപടി നല്‍കി.