വാഷിംഗ്ടണ്‍: സമാധാന കരാര്‍ അന്തിമമാക്കിയില്ലെങ്കില്‍ ഇറാനെതിരെ അമേരിക്ക 'വളരെ ശക്തമായി' ആക്രമണം നടത്തുമെന്ന് യുഎസ് പ്രസിഡന്റ് ഡൊണാള്‍ഡ് ട്രംപ്. ബുധനാഴ്ച വൈറ്റ് ഹൗസില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. ഹോര്‍മുസ് കടലിടുക്കില്‍ വെച്ച് ഇറാന്‍ അമേരിക്കന്‍ അപ്പാച്ചെ ഹെലികോപ്റ്റര്‍ വെടിവെച്ചിട്ട സംഭവത്തെ തുടര്‍ന്നാണ് ഈ പ്രഖ്യാപനം.

ആണവായുധങ്ങള്‍ നിര്‍മ്മിക്കില്ലെന്ന് ഇറാന്‍ സമ്മതിച്ചിട്ടുണ്ടെങ്കിലും, ആ കരാര്‍ ഇതുവരെ ഒപ്പുവെച്ചിട്ടില്ലെന്ന് ട്രംപ് ചൂണ്ടിക്കാട്ടി. ഒരു സമ്പൂര്‍ണ്ണ കരാറാണ് അമേരിക്ക ലക്ഷ്യമിടുന്നത്. അതേസമയം, ഇറാനില്‍ നിന്ന് ലക്ഷക്കണക്കിന് ബാരല്‍ എണ്ണ രഹസ്യമായി അമേരിക്ക കൈക്കലാക്കുന്നുണ്ടെന്നും ട്രംപ് വെളിപ്പെടുത്തി. ഇത് മൂലമാണ് എണ്ണവില ബാരലിന് 250 ഡോളറിലേക്ക് കുതിക്കാതെ 85-90 ഡോളറില്‍ പിടിച്ചുനിര്‍ത്താന്‍ സാധിച്ചതെന്നും അദ്ദേഹം അവകാശപ്പെട്ടു.

അമേരിക്കന്‍ ഹെലികോപ്റ്റര്‍ വെടിവെച്ചിട്ടതിന് മറുപടിയായി നടത്തിയ വ്യോമാക്രമണത്തിന് പിന്നാലെ, കൂടുതല്‍ വെല്ലുവിളികള്‍ ഇറാന്‍ ഒഴിവാക്കുന്നതാണ് അവര്‍ക്ക് നല്ലതെന്ന് യുഎസ് പ്രതിരോധ സെക്രട്ടറി പീറ്റ് ഹെഗ്സെത്ത് മുന്നറിയിപ്പ് നല്‍കി. നിലവില്‍ തങ്ങളുടെ സൈനികരെ സംരക്ഷിക്കുന്നതിനായുള്ള പ്രതിരോധ നടപടികളാണ് സ്വീകരിക്കുന്നതെന്ന് അദ്ദേഹം ഗ്വാണ്ടനാമോ ബേയിലെ യുഎസ് താവളത്തില്‍ വെച്ച് പറഞ്ഞു. ഇറാന്‍ ആണവായുധങ്ങള്‍ സ്വന്തമാക്കാതിരിക്കാന്‍ ഉതകുന്ന ഒരു മികച്ച കരാറാണ് പ്രസിഡന്റ് ട്രംപ് ലക്ഷ്യമിടുന്നതെന്നും അദ്ദേഹം കൂട്ടിച്ചേര്‍ത്തു.