ന്യൂഡല്ഹി: ഡല്ഹിയില് നടന്ന പൊളിറ്റ്ബ്യൂറോ യോഗത്തില് പങ്കെടുത്ത ശേഷം മടങ്ങാനിരുന്ന പ്രതിപക്ഷ നേതാവ് പിണറായി വിജയന്റെ വിമാനയാത്ര മുടങ്ങിയ സംഭവത്തില് സര്ക്കാര് പ്രോട്ടോക്കോള് വിഭാഗത്തോട് വിശദീകരണം തേടി.
ശനിയാഴ്ച ഉച്ചതിരിഞ്ഞ് 2.50-നുള്ള ഡല്ഹി-കോഴിക്കോട് ഇന്ഡിഗോ വിമാനത്തിലാണ് അദ്ദേഹത്തിന് യാത്ര ചെയ്യേണ്ടിയിരുന്നത്. യാത്രയ്ക്കായി ഒന്നരയോടു കൂടി കേരള ഹൗസില്നിന്ന് പുറപ്പെട്ട അദ്ദേഹം കൃത്യസമയത്ത് തന്നെ വിമാനത്താവളത്തില് എത്തിയിരുന്നു. എന്നാല്, വിമാനത്താവളത്തിലെ ലോഞ്ചില് വിശ്രമിക്കുകയായിരുന്ന അദ്ദേഹത്തിന് വിമാനത്തില് കയറാനുള്ള അറിയിപ്പ് ലഭിക്കാത്തതിനെ തുടര്ന്നാണ് യാത്ര മുടങ്ങിയത്.
വിമാനക്കമ്പനിയുമായുള്ള ആശയവിനിമയത്തില് പ്രോട്ടോക്കോള് വിഭാഗത്തിന് സംഭവിച്ച വീഴ്ചയാണ് ഇതിന് കാരണമായതെന്നാണ് പ്രാഥമിക വിവരം. സാധാരണയായി വിഐപി യാത്രകള് ഏകോപിപ്പിക്കുന്നത് പ്രോട്ടോക്കോള് വിഭാഗമാണെങ്കിലും ഇത്തവണ വിമാനത്താവളത്തിനകത്ത് യാത്രയ്ക്കായി നല്കേണ്ട ബഗ്ഗി ഉള്പ്പെടെയുള്ള യാതൊരുവിധ വിഐപി പരിഗണനകളും അദ്ദേഹത്തിന് ലഭിച്ചില്ലെന്ന് പരാതി ഉയര്ന്നിട്ടുണ്ട്.
സംഭവത്തില് വീഴ്ചയുണ്ടായ പശ്ചാത്തലത്തില് പ്രോട്ടോക്കോള് വിഭാഗത്തിന് സര്ക്കാര് കാരണം കാണിക്കല് നോട്ടീസ് നല്കി. ഇതിന് പ്രോട്ടോക്കോള് വിഭാഗം മറുപടി നല്കുകയും ചെയ്തിട്ടുണ്ട്. ഈ റിപ്പോര്ട്ടിന്റെ അടിസ്ഥാനത്തില് തുടര്നടപടികള് സ്വീകരിക്കുന്നതിനായി ഇന്ന് ഡല്ഹി കേരള ഹൗസില് ഉന്നതതല യോഗം ചേര്ന്നേക്കും.
Related News
