സിയാറ്റില്‍: രണ്ട് ഗോളിന് പിന്നിലായ ശേഷം തകര്‍പ്പന്‍ തിരിച്ചുവരവുമായി ബെല്‍ജിയം ലോകകപ്പിന്റെ അടുത്ത ഘട്ടത്തിലേക്ക് യോഗ്യത നേടി. സിയാറ്റിലില്‍ നടന്ന ആവേശകരമായ അവസാന 32 ഘട്ട (Round of 32) മത്സരത്തില്‍ രണ്ടിനെതിരെ മൂന്ന് ഗോളുകള്‍ക്കാണ് ബെല്‍ജിയം സെനഗലിനെ പരാജയപ്പെടുത്തിയത്. എക്‌സ്ട്രാ ടൈമിന്റെ അവസാന നിമിഷത്തില്‍ (125ാം മിനിറ്റില്‍) യൂറി ടീലേമാന്‍സ് നേടിയ പെനാല്‍റ്റി ഗോളാണ് ബെല്‍ജിയത്തിന് നാടകീയ വിജയം സമ്മാനിച്ചത്.

മത്സരത്തില്‍ ഒരു ഘട്ടത്തില്‍ ഹബീബ് ദിയാറ, ഇസ്മായില സാര്‍ എന്നിവരുടെ ഗോളുകളില്‍ സെനഗല്‍ 2-0 ന് മുന്നിലായിരുന്നു. എന്നാല്‍ നിശ്ചിത സമയം അവസാനിക്കാന്‍ നാല് മിനിറ്റ് മാത്രം ബാക്കിയുള്ളപ്പോള്‍ റൊമേലു ലുക്കാക്കു, ടീലേമാന്‍സ് എന്നിവരിലൂടെ ഇരട്ട ഗോള്‍ നേടി ബെല്‍ജിയം അവിശ്വസനീയമായി കളി എക്‌സ്ട്രാ ടൈമിലേക്ക് നീട്ടുകയായിരുന്നു. തിങ്കളാഴ്ച സിയാറ്റിലില്‍ നടക്കുന്ന അടുത്ത റൗണ്ട് മത്സരത്തില്‍ അമേരിക്കയെയാവും ബെല്‍ജിയം നേരിടുക.

മത്സരത്തിന്റെ ഭൂരിഭാഗം സമയവും നിയന്ത്രിക്കുകയും രണ്ട് തവണ പന്ത് പോസ്റ്റിലിടിക്കുകയും ചെയ്ത സെനഗലിന് ഈ തോല്‍വി കടുത്ത തിരിച്ചടിയായി. ദക്ഷിണാഫ്രിക്ക, ഐവറി കോസ്റ്റ്, ഡെമോക്രാറ്റിക് റിപ്പബ്ലിക് ഓഫ് കോംഗോ എന്നിവര്‍ക്ക് ശേഷം ഈ ഘട്ടത്തില്‍ ടൂര്‍ണമെന്റില്‍ നിന്ന് പുറത്താകുന്ന നാലാമത്തെ ആഫ്രിക്കന്‍ രാജ്യമാണ് സെനഗല്‍.

മത്സരത്തിന്റെ 25-ാം മിനിറ്റില്‍ സെനഗല്‍ ലീഡ് എടുത്തു. സാദിയോ മാനെയുടെ ക്രോസില്‍ നിന്ന് ഇസ്മായില സാര്‍ തൊടുത്ത ഹെഡര്‍ പോസ്റ്റില്‍ തട്ടി തിരിച്ചുവന്നപ്പോള്‍, ലഭിച്ച അവസരം ഹബീബ് ദിയാറ കൃത്യമായി വലയിലെത്തിച്ചു. ഒന്നാം പകുതിയുടെ അവസാനത്തില്‍ ബെല്‍ജിയത്തിന്റെ മാക്‌സിം ഡി കുപ്പറിന്റെ മികച്ചൊരു ഷോട്ട് സെനഗല്‍ ഗോള്‍കീപ്പര്‍ മോറി ദിയാവ് തട്ടിയകറ്റി.

രണ്ടാം പകുതിയില്‍ മങ്ങിയ പ്രകടനം കാഴ്ചവെച്ച ചാള്‍സ് ഡി കെറ്റലറെയ്ക്ക് പകരം സൂപ്പര്‍ താരം റൊമേലു ലുക്കാക്കുവിനെ ബെല്‍ജിയം കളത്തിലിറക്കി. എന്നാല്‍ 51-ാം മിനിറ്റില്‍ സെനഗല്‍ തങ്ങളുടെ രണ്ടാം ഗോളും നേടി. മൂസ നിയാഖാട്ടെയുടെ ദീര്‍ഘദൂര പാസ് നെഞ്ചിലൊതുക്കി, രണ്ട് പ്രതിരോധനിരക്കാരെ വെട്ടിച്ച് ഇസ്മായില സാര്‍ തൊടുത്ത വെടിയുണ്ട കണക്കെയുള്ള ഷോട്ട് ബെല്‍ജിയം ഗോള്‍കീപ്പര്‍ തിബോ കോര്‍ട്ടോയെ കാഴ്ചക്കാരനാക്കി വല തുളച്ചു.

കളി കൈവിട്ടു എന്ന് കരുതിയ ഇടത്തുനിന്നാണ് അവസാന അഞ്ച് മിനിറ്റില്‍ ബെല്‍ജിയം തിരിച്ചടിച്ചത്. 86-ാം മിനിറ്റില്‍ തോമസ് മ്യുനിയറുടെ ക്രോസില്‍ നിന്ന് ലുക്കാക്കു ആദ്യ ഗോള്‍ നേടി. മൂന്ന് മിനിറ്റുകള്‍ക്ക് ശേഷം ലിയാന്‍ഡ്രോ ട്രൊസാര്‍ഡിന്റെ പാസില്‍ നിന്ന് ഹെഡറിലൂടെ ടീലേമാന്‍സ് സമനില ഗോളും (2-2) നേടി.

മത്സരത്തിനിടെ കളത്തില്‍ വെച്ച് തര്‍ക്കത്തിലേര്‍പ്പെട്ട ടീലേമാന്‍സും ട്രൊസാര്‍ഡും സമനില ഗോളിന് ശേഷം കെട്ടിപ്പിടിച്ചാണ് സന്തോഷം പങ്കിട്ടത്. ഒടുവില്‍ എക്‌സ്ട്രാ ടൈമിന്റെ 125-ാം മിനിറ്റില്‍ സെനഗല്‍ താരം ലമീന്‍ കമാര ടീലേമാന്‍സിനെ ഫൗള്‍ ചെയ്തതിന് VAR പരിശോധനയിലൂടെ ബെല്‍ജിയത്തിന് പെനാല്‍റ്റി ലഭിച്ചു. കിക്ക് എടുത്ത ടീലേമാന്‍സ് പന്ത് വലയുടെ മുകളില്‍ എത്തിച്ച് ബെല്‍ജിയത്തിന് അവിശ്വസനീയ വിജയം സമ്മാനിക്കുകയായിരുന്നു.