ജിദ്ദ- സൗദി അറേബ്യയിലെ പ്രമുഖ ഡിജിറ്റല് സേവന ദാതാക്കളായ സെയിന്, ഇ-ബാന്ഡ് തരംഗദൈര്ഘ്യത്തില് 'ഫുള് ഡ്യൂപ്ലക്സ്' സാങ്കേതികവിദ്യ ഉപയോഗിച്ചുള്ള രാജ്യത്തെ ആദ്യത്തെ വാണിജ്യ ഫിക്സഡ് വയര്ലെസ് ലിങ്ക് വിജയകരമായി പ്രവര്ത്തിപ്പിച്ചു. സെക്കന്ഡില് 50 ജിഗാബിറ്റ്സ് വരെയുള്ള അതിവേഗ ഡാറ്റാ പ്രസരണ ശേഷിയാണ് ഈ അത്യാധുനിക സംവിധാനത്തിലൂടെ കമ്പനി കൈവരിച്ചിരിക്കുന്നത്.
നെറ്റ്വര്ക്ക് വികസനത്തില് കമ്പനിയുടെ നേതൃത്വം ഉറപ്പിക്കുന്ന ഈ നേട്ടം ബിസിനസ്സ് ഉപഭോക്താക്കള്ക്ക് കുറഞ്ഞ റെസ്പോണ്സ് ടൈമും ഉയര്ന്ന വിശ്വാസ്യതയുമുള്ള മികച്ച ഡിജിറ്റല് അനുഭവം സമ്മാനിക്കും. 5ജി-അഡ്വാന്സ്ഡ് ആപ്ലിക്കേഷനുകള്, ആര്ട്ടിഫിഷ്യല് ഇന്റലിജന്സ് അധിഷ്ഠിത സൊല്യൂഷനുകള് എന്നിവയ്ക്കുള്ള വര്ദ്ധിച്ചുവരുന്ന ആവശ്യകതകള് നിറവേറ്റാന് പ്രാപ്തമായ ശക്തമായ ഡിജിറ്റല് ഇന്ഫ്രാസ്ട്രക്ചര് ഒരുക്കുന്നതില് സെയിന് നടത്തുന്ന നിക്ഷേപങ്ങളുടെ തുടര്ച്ചയാണിത്.
സൗദി വിഷന് 2030-ന്റെ ലക്ഷ്യങ്ങള് കൈവരിക്കുന്നതിനും രാജ്യത്തെ അത്യാധുനിക ഡിജിറ്റല് സമ്പദ്വ്യവസ്ഥയായി മാറ്റുന്നതിനും ഡിജിറ്റല് ഇന്ഫ്രാസ്ട്രക്ചര് വികസിപ്പിക്കേണ്ടത് അനിവാര്യമാണെന്ന് സെയിന് സൗദി അറേബ്യയുടെ ചീഫ് ടെക്നോളജി ഓഫീസര് എന്ജിനീയര് മുഹമ്മദ് ബിന് അബ്ദുല് അസീസ് അല്-നജിദി പ്രസ്താവിച്ചു. ആധുനിക സാങ്കേതികവിദ്യകളിലെ നിക്ഷേപത്തിനും നവീകരണത്തിനും അനുയോജ്യമായ അന്തരീക്ഷം രാജ്യത്ത് ഒരുക്കുകയാണ് തങ്ങളുടെ ലക്ഷ്യമെന്നും അദ്ദേഹം കൂട്ടിച്ചേര്ത്തു. സൗദിയില് ഇത്തരമൊരു ഫിക്സഡ് വയര്ലെസ് ലിങ്ക് വിജയകരമായി പ്രവര്ത്തിപ്പിക്കാന് കഴിഞ്ഞത് കമ്പനിയുടെ പ്രയാണത്തിലെ നിര്ണായക നാഴികക്കല്ലാണെന്നും, ഇത് സര്ക്കാര് സ്ഥാപനങ്ങള്ക്കും മറ്റ് സുപ്രധാന മേഖലകള്ക്കും കൂടുതല് വഴക്കമുള്ളതും സുരക്ഷിതവുമായ കണക്റ്റിവിറ്റി ഉറപ്പാക്കുമെന്നും അദ്ദേഹം വ്യക്തമാക്കി.
Related News
