വാന്കോവര്: 2026 ഫിഫ ലോകകപ്പ് പ്രീക്വാര്ട്ടര് പോരാട്ടത്തില് കൊളംബിയയെ പെനാല്റ്റി ഷൂട്ടൗട്ടില് (4-3) പരാജയപ്പെടുത്തി സ്വിറ്റ്സര്ലന്ഡ് ക്വാര്ട്ടര് ഫൈനലില് പ്രവേശിച്ചു. നിശ്ചിത സമയത്തും അധികസമയത്തും ഇരുടീമുകളും ഗോള്രഹിത സമനില പാലിച്ചതിനെത്തുടര്ന്നാണ് മത്സരം പെനാല്റ്റി ഷൂട്ടൗട്ടിലേക്ക് നീണ്ടത്. വിജയത്തോടെ നിലവിലെ ചാമ്പ്യന്മാരായ അര്ജന്റീനയുമായുള്ള ക്വാര്ട്ടര് ഫൈനല് പോരാട്ടത്തിന് സ്വിറ്റ്സര്ലന്ഡ് ടാറ്റുറപ്പിച്ചു.
1954-ല് സ്വന്തം നാട്ടില് ലോകകപ്പിന് ആതിഥേയത്വം വഹിച്ച ശേഷം ആദ്യമായിട്ടാണ് സ്വിറ്റ്സര്ലന്ഡ് ലോകകപ്പിന്റെ അവസാന എട്ടില് ഇടംനേടുന്നത്. വാന്കോവറിലെ ബിസി പ്ലേസ് സ്റ്റേഡിയത്തില് നടന്ന ഈ മത്സരം, ഈ ടൂര്ണമെന്റില് യുണൈറ്റഡ് സ്റ്റേറ്റ്സിന് പുറത്ത് നടന്ന അവസാനത്തെ മത്സരം കൂടിയായിരുന്നു.
ഗോള്രഹിതമായി അവസാനിച്ച മത്സരത്തിന്റെ വിധി നിര്ണയിച്ചത് പെനാല്റ്റി ഷൂട്ടൗട്ടാണ്. കൊളംബിയയുടെ ഡാവിന്സണ് സാഞ്ചസിന്റെ കിക്ക് ക്രോസ്ബാറിലിടിച്ച് പുറത്തുപോയപ്പോള്, സ്വിറ്റ്സര്ലന്ഡിന്റെ മാനുവല് അക്കാഞ്ജിയുടെ ഷോട്ട് ലക്ഷ്യം കാണാതെ പാഴായി. എന്നാല്, കൊളംബിയന് താരം കുച്ചോ ഹെര്ണാണ്ടസിന്റെ കിക്ക് തടഞ്ഞിട്ട് സ്വിസ് ഗോള്കീപ്പര് ഗ്രെഗോര് കോബെല് ടീമിന് വീണ്ടും മുന്തൂക്കം നല്കി. തുടര്ന്ന് കിക്കെടുത്ത റൂബന് വര്ഗാസ് പിഴവുകളൊന്നുമില്ലാതെ പന്ത് വലയിലെത്തിച്ചതോടെ സ്വിറ്റ്സര്ലന്ഡിന്റെ ചരിത്രവിജയം പൂര്ത്തിയായി.
ആയിരക്കണക്കിന് കൊളംബിയന് ആരാധകരുടെ പിന്തുണയോടെയാണ് ടീം കളത്തിലിറങ്ങിയത്. ടൂര്ണമെന്റില് ഇതുവരെ ഒരു ഗോളുകള് മാത്രം വഴങ്ങിയ കൊളംബിയയും മികച്ച പ്രതിരോധനിരയുള്ള സ്വിറ്റ്സര്ലന്ഡും ആദ്യ പകുതിയില് പരസ്പരം പൂട്ടുന്ന കാഴ്ചയാണ് കണ്ടത്. 21-ാം മിനിറ്റില് കൊളംബിയയുടെ ഗുസ്താവോ പുര്ട്ടയുടെ മികച്ചതൊരു ഷോട്ട് സ്വിസ് ഗോള്കീപ്പര് കോബെല് അത്ഭുതകരമായി രക്ഷപ്പെടുത്തി.
രണ്ടാം പകുതിയിലും ഇരുടീമുകളും ഗോളിനായി കഠിനമായി പരിശ്രമിച്ചെങ്കിലും മുന്നേറ്റങ്ങള് പലതും ലക്ഷ്യം കണ്ടില്ല. ലൂയിസ് ഡിയാസിനെ ഫലപ്രദമായി പൂട്ടാന് സ്വിസ് പ്രതിരോധത്തിന് കഴിഞ്ഞു. അധികസമയത്ത് കൊളംബിയന് താരം ജോണ് ലുകുമിയുടെ ഹെഡര് ക്രോസ്ബാറിലിടിച്ച് മടങ്ങിയത് അവര്ക്ക് തിരിച്ചടിയായി. ജാമിന്റണ് കാമ്പസിനും ഗോള് നേടാനുള്ള സുവര്ണാവസരങ്ങള് ലഭിച്ചെങ്കിലും കോബെലിന്റെ മികച്ച പ്രകടനം സ്വിറ്റ്സര്ലന്ഡിനെ രക്ഷിച്ചു.
ചരിത്രനേട്ടത്തിന് ശേഷം സംസാരിച്ച സ്വിസ് നായകന് ഗ്രാനിറ്റ് ഷാക്ക, ടീമിന്റെ മാനസികാവസ്ഥയെ വാനോളം പുകഴ്ത്തി. ''ഞങ്ങള് പരിചയസമ്പന്നരായ കളിക്കരായ യുവതാരങ്ങളെ നിരന്തരം പിന്നില് നിന്ന് നയിക്കുന്നുണ്ട്. ഒപ്പം എല്ലാ ദിവസവും മാതൃകയാകാനും ഞങ്ങള് ശ്രമിക്കുന്നു. ഒരു ചെറിയ രാജ്യത്തിന് പോലും ഈ എലീറ്റ് ഫുട്ബോള് തലത്തില് എന്ത് അത്ഭുതവും കാണിക്കാന് കഴിയുമെന്ന മാനസികാവസ്ഥയാണ് ഞങ്ങള്ക്കുള്ളത്,'' ഷാക്ക പറഞ്ഞു.
കൊളംബിയന് താരം ലൂയിസ് സുവാരസ് മത്സരത്തിന് ശേഷം നിരാശ പങ്കുവെച്ചെങ്കിലും ടീമിന്റെ പ്രകടനം ഭാവിയില് വലിയൊരു വഴിത്തിരിവാകുമെന്ന പ്രതീക്ഷ പ്രകടിപ്പിച്ചു. വരുന്ന ശനിയാഴ്ച കാന്സസ് സിറ്റിയില് വെച്ചാണ് സ്വിറ്റ്സര്ലന്ഡിന്റെ ക്വാര്ട്ടര് ഫൈനല് മത്സരം. ഈജിപ്തിനെ 3-2 തോല്പ്പിച്ചെത്തുന്ന ലയണല് മെസിയുടെ അര്ജന്റീനയാണ് എതിരാളികള്.
