റിയാദ്- സൗദി അറേബ്യന്‍ ഇലക്ട്രിക് വാഹന ബ്രാന്‍ഡായ സീര്‍ കമ്പനിയുടെ 'എക്‌സോബോട്ട്' ഇലക്ട്രിക് കാറുകളുടെ വിതരണം അടുത്ത വര്‍ഷം ഒന്നാം പാദത്തിന്റെ അവസാനത്തിലോ രണ്ടാം പാദത്തിന്റെ തുടക്കത്തിലോ ആരംഭിക്കുമെന്ന് വാണിജ്യ വിഭാഗം തലവന്‍ ലുവായ് അല്‍-ഷെരീഫ് അറിയിച്ചു. ദിരിയയില്‍ കമ്പനിയുടെ ആദ്യ മൊബൈല്‍ സ്റ്റോര്‍ തുറന്നതോടൊപ്പം, കാറുകള്‍ക്കായുള്ള റിസര്‍വേഷനുകള്‍ സ്വീകരിച്ചു തുടങ്ങിയ ഘട്ടത്തിലാണ് അദ്ദേഹം ഇക്കാര്യം വ്യക്തമാക്കിയത്.

മൂല്യവര്‍ദ്ധിത നികുതി ഉള്‍പ്പെടെ 3,99,000 റിയാലാണ് എക്‌സോബോട്ട് മോഡലുകളുടെ പ്രാരംഭ വില. വെബ്‌സൈറ്റ് വഴി 1,000 റിയാല്‍ അഡ്വാന്‍സ് തുക നല്‍കി ഉപഭോക്താക്കള്‍ക്ക് വാഹനം ബുക്ക് ചെയ്യാവുന്നതാണ്. 6 വര്‍ഷം അല്ലെങ്കില്‍ 2,00,000 കിലോമീറ്റര്‍ വാറന്റി, 8 വര്‍ഷത്തെ ബാറ്ററി വാറന്റി, 6 വര്‍ഷത്തെ റോഡ്‌സൈഡ് അസിസ്റ്റന്‍സ്, ഇന്‍സ്റ്റലേഷനോട് കൂടിയ ഹോം ചാര്‍ജര്‍, 6 മാസത്തെ കണക്റ്റിവിറ്റി പാക്കേജ് തുടങ്ങിയ ആകര്‍ഷകമായ ആനുകൂല്യങ്ങള്‍ ഈ വിലയില്‍ ഉള്‍പ്പെടുന്നു.

2030-ഓടെ മിഡ്-സൈസ്, കോംപാക്റ്റ് വിഭാഗങ്ങളിലായി സെഡാന്‍, എസ്.യു.വി മോഡലുകള്‍ ഉള്‍പ്പെടെ 5 അധിക മോഡലുകള്‍ കൂടി വിപണിയിലിറക്കാന്‍ സീര്‍ ലക്ഷ്യമിടുന്നുണ്ട്. സൗദി, ഗള്‍ഫ് വിപണികളില്‍ ഉപഭോക്താക്കള്‍ക്ക് കൂടുതല്‍ തെരഞ്ഞെടുപ്പുകള്‍ നല്‍കാന്‍ ഇത് സഹായിക്കും. ദിരിയയിലെ പവലിയനിലൂടെ പൊതുജനങ്ങള്‍ക്ക് എക്‌സോബോട്ട് കാറുകള്‍ അടുത്തറിയാനും അനുഭവിച്ചറിയാനും അവസരമൊരുക്കിയിട്ടുണ്ട്.

കഴിഞ്ഞ സെപ്റ്റംബറിലാണ് കമ്പനി തങ്ങളുടെ ആദ്യ എക്‌സോബോട്ട് സെഡാന്‍, എസ്.യു.വി മോഡലുകള്‍ പുറത്തിറക്കിയത്. സൗദി അറേബ്യയില്‍ തന്നെ രൂപകല്പന ചെയ്ത് നിര്‍മ്മിക്കുന്ന ഇലക്ട്രിക് വാഹനങ്ങള്‍ വിപണിയിലെത്തിക്കുന്നത് സൗദി വിഷന്‍ 2030-ന്റെയും രാജ്യത്തെ വാഹന നിര്‍മ്മാണ മേഖലയുടെയും വലിയൊരു മുന്നേറ്റമായാണ് കണക്കാക്കപ്പെടുന്നത്.