കൊച്ചി: സ്വാതന്ത്ര്യദിനാഘോഷം നടക്കാനിരക്കെ രാജ്യത്തെ സുരക്ഷ ശക്തമാക്കി. ഇതിന്റെ ഭാഗമായി വിമാനത്താവളങ്ങളിലും അതീവ സുരക്ഷയാണ് ഏര്‍പ്പെടുത്തിയിരക്കുന്നത്. ഇതിന്റെ ഭാഗമായി കൊച്ചി രാജ്യാന്തര വിമാനത്താവളത്തിലും സുരക്ഷ ശക്തമാണ്. ഇതു കണക്കിലെടുത്ത് യാത്രക്കാര്‍ വളരെ നേരത്തെ റിപ്പോര്‍ട്ട് ചെയ്യണമെന്ന് വിമാനത്താവള അധികൃതര്‍ വ്യക്തമാക്കി.

സ്വാതന്ത്ര്യദിനത്തോട് അനുബന്ധിച്ചുള്ള മുന്‍കരുതലായാണ് വിമാനത്താവളങ്ങൡലെയും പരിശോധന ശക്തമാക്കല്‍. കൊച്ചി വിമാനത്താവളം ഉള്‍പ്പെടെ എല്ലാ വിമാനത്താവളങ്ങളിലും സുരക്ഷ ശക്തമാക്കിയിട്ടുണ്ട്. കൂടുതല്‍ കര്‍ശനമായ പരിശോധനകള്‍ ഉള്ളതിനാല്‍ യാത്രക്കാര്‍ പതിവിലും നേരത്തെ തന്നെ വിമാനത്താവളത്തില്‍ എത്തണമെന്നാണ് നിര്‍ദ്ദേശം. യാത്രക്കാരെയും ഒപ്പം ബാഗേജുകളും വിശദമായി പരിശോധിക്കുന്നുണ്ട്. അവധി കഴിഞ്ഞ് പോകുന്ന യാത്രക്കാരുടെ എണ്ണം കൂടുതലായതിനാല്‍ വിമാനത്താവളത്തില്‍ നല്ല തിരക്ക് അനുഭവപ്പെടുന്നുണ്ട്. അതോടൊപ്പം സുരക്ഷാ പരിശോധനയും കര്‍ശനമാക്കിയത് നടപടി ക്രമങ്ങള്‍ പൂര്‍ത്തീകരിക്കുന്നതിന് സമയം അധികം എടുക്കുന്നുണ്ട്. ഇതു കണക്കിലെടുത്തു നേരത്തെ വിമാനത്താവളത്തില്‍ എത്തുന്നത് യാത്ര സുഗമമാവാന്‍ സഹായിക്കും.

സാധാരണ പരിശോധനകള്‍ക്കു പുറമേ വിമാനത്തില്‍ കയറുന്നതിന് തൊട്ടുമുമ്പ് ലാഡര്‍ പോയിന്റില്‍ യാത്രക്കാരെ വീണ്ടും പരിശോധിക്കുന്നുണ്ട്. ഇത്തരം പരിശോധനകള്‍ നടത്തണമെങ്കില്‍ കൂടുതല്‍ സമയം വേണം. ഇക്കാരണത്താല്‍ യാത്രക്കാര്‍ നേരത്തെ വിമാനത്താവളത്തില്‍ എത്തണമെന്നാണ് അറിയിച്ചിരിക്കുന്നത്. ബ്യൂറോ ഓഫ് സിവില്‍ ഏവിയേഷന്‍ സെക്യുരിറ്റിയുടെ (ബിസിഎഎസ്) നിര്‍ദേശ പ്രകാരമാണ് കൊച്ചി വിമാനത്താവളത്തില്‍ സുരക്ഷാ പരിശോധന കൂടുതല്‍ കര്‍ശനമാക്കിയിരിക്കുന്നത്. യാത്രക്കാരെയും യാത്രക്കാരുടെ ബാഗേജുകളും കര്‍ശനമായി പരിശോധിക്കുന്നതിന് ഒപ്പം തന്നെ വിമാനത്താവളത്തില്‍ നിരീക്ഷണവും ശക്തമാക്കിയിട്ടുണ്ട്.