ദുബായ്: ഗള്‍ഫ് ജോലി ആകര്‍ഷകമെങ്കിലും സുരക്ഷിതമല്ലെന്ന തോന്നല്‍ ഗള്‍ഫിലെ വിദ്യാസമ്പന്നരില്‍ സര്‍ക്കാര്‍ ജോലി തേടാനുള്ള പ്രവണത കൂടുന്നു. അതിനായി പിഎസ്‌സി പരീക്ഷ എഴുതുന്നവരുടെ എണ്ണം കൂടുകയാണ്. ഇങ്ങനെ എഴുതിയ നിരവധിപേര്‍ക്ക് ജോലിയും ലഭിച്ചു തുടങ്ങിയിട്ടുണ്ട്. അബുദാബിയില്‍ മലയാളി സമാജം പിഎസ് സി പരിശീലന കേന്ദ്രം തുറന്നതോടെ പിഎസ് സി പരീക്ഷ എഴുതാന്‍ താല്‍പര്യപ്പെട്ട് നിരവധി പേരാണ് പരിശീലനത്തിന് എത്തുന്നത്.

അബുദാബി മലയാളി സമാജത്തിലെ പിഎസ്സി പരിശീലനത്തില്‍ പങ്കെടുത്തവരില്‍ 3 പേര്‍ ജോലിയില്‍ പ്രവേശിച്ചു. 4 പേര്‍ അന്തിമ പട്ടികയില്‍ ഇടം നേടി ജോലിക്കായി കാത്തിരിക്കുകയാണ്. സ്വന്തം നിലയില്‍ പരിശീലനം തുടര്‍ന്ന് പരീക്ഷ എഴുതി ജോലിയില്‍ കയറുന്നവരുമുണ്ട്. ഒട്ടേറെ പേര്‍ ലിസ്റ്റില്‍ സ്ഥാനം പിടിച്ച് ജോലിക്കായി കാത്തിരിക്കുന്നുമുണ്ട്. മലയാളി സമാജത്തില്‍ 2 ബാച്ചുകളിലായി 27 പേരാണ് പി.എസ്സി പരിശീലനത്തില്‍ പങ്കെടുത്തത്. ഇതില്‍ നൗഷിന മലപ്പുറം സര്‍ക്കാര്‍ സ്‌കൂളിലും നീതു കൊല്ലം റജിസ്‌ട്രേഷന്‍ വകുപ്പിലും ശ്രുതി തൃശൂര്‍ സര്‍ക്കാര്‍ സ്‌കൂളിലും ജോലിയില്‍ പ്രവേശിച്ചു. ഗള്‍ഫിലെ ജോലി എപ്പോണ്‍ വേണമെങ്കിലും നഷ്ടപ്പെടാമെന്നതാണ് കൂടുതല്‍ പേരെ പിഎസ് സി പരീക്ഷ എഴുതാന്‍ പ്രേരിപ്പിച്ചിട്ടുള്ളത്. യുഎഇയില്‍ പിഎസ്സി പരിശീലനം നല്‍കനുന്ന ഏക സംഘടനയാണ് അബുദാബി മലയാളി സമാജം.