ദോഹ: ഖത്തറില് സുരക്ഷാ, നിയമസംഘങ്ങള് രൂപീകരിച്ചു. ഇന്നലെ ചേര്ന്ന മന്ത്രിസഭായോഗമാണ് ഇസ്രയേല് ആക്രമണത്തിന്റെ പശ്ചാത്തലത്തില് സുപ്രധാന തീരുമാനങ്ങള് കൈക്കൊണ്ടത്. പ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിന് അബ്ദുറഹ്മാന് ബിന് ജാസിം അല് താനിയുടെ അധ്യക്ഷതയിലായിരുന്നു യോഗം. ആക്രമണവുമായി ബന്ധപ്പെട്ടുള്ള സുരക്ഷാ നടപടികളെക്കുറിച്ച് ആഭ്യന്തര മന്ത്രിയും കമാന്ഡറുമായ ശൈഖ് ഖലീഫ ബിന് ഹമദ് ബിന് ഖലീഫ അല് താനി സമര്പ്പിച്ച റിപ്പോര്ട്ട് മന്ത്രിസഭ അംഗീകരിച്ചു. റിപ്പോര്ട്ടിന്റെ അടിസ്ഥാനത്തില് ആഭ്യന്തര മന്ത്രിയുടെ നേതൃത്വത്തില് സുരക്ഷാ സംഘം രൂപീകരിക്കാന് തീരുമാനമായി.
അതോടൊപ്പം, രാജ്യത്തിന്റെ പരമാധികാരത്തിനെതിരായ ആക്രമണമെന്ന നിലയില് ആവശ്യമായ എല്ലാ നിയമ നടപടികളും സ്വീകരിക്കാന് വിദേശകാര്യ മന്ത്രാലയത്തിലെ സ്റ്റേറ്റ് മന്ത്രി ഡോ. മുഹമ്മദ് ബിന് അബ്ദുലസീസ് ബിന് സാലിഹ് അല്-ഖുലൈഫിയുടെ നേതൃത്വത്തില് ഒരു നിയമസംഘം രൂപീകരിക്കാനും മന്ത്രിസഭ തീരുമാനിച്ചു. ഇസ്രയേല് നടത്തിയ ക്രൂരവും ഭീരുത്വപരവുമായ ആക്രമണത്തെ ശക്തമായ ഭാഷയില് മന്ത്രിസഭ അപലപിച്ചു. ഖത്തറിന്റെ സുരക്ഷയും പരമാധികാരവും സംരക്ഷിക്കാന്, സഹോദര-സുഹൃദ് രാഷ്ട്രങ്ങളോടൊപ്പം നിന്നുകൊണ്ട് ആവശ്യമായ എല്ലാ നടപടികളും സ്വീകരിക്കുമെന്ന് മന്ത്രിസഭ ഉറപ്പുനല്കി.
ഇസ്രയേല് ആക്രമണത്തില് വീരമൃത്യു വരിച്ച ബദര് സാദ് മുഹമ്മദ് അല് ഹുമൈദി അല് ദോസരി കോര്പ്പറലിന് മന്ത്രിസഭ ആദരാഞ്ജലി അര്പ്പിച്ചു. ആക്രമണത്തില് വീരമൃത്യു വരിച്ച മറ്റ് സഹോദരന്മാരുടെ കുടുംബങ്ങളോടും അനുശോചനം രേഖപ്പെടുത്തി. ഖത്തറിനോട് ഐക്യദാര്ഢ്യം പ്രഖ്യാപിച്ച രാജ്യങ്ങള്ക്കും അന്താരാഷ്ട്ര സംഘടനകള്ക്കും മന്ത്രിസഭ നന്ദിയും രേഖപ്പെടുത്തി.
.jpg)
Related News
