റിയാദ്- സൗദി അറേബ്യയുടെ ചെങ്കടല്‍ തീരത്തെ ആഡംബര യാട്ട് യാത്രകള്‍ക്കുള്ള പുതിയ ആഗോള കേന്ദ്രമാക്കാന്‍ ലക്ഷ്യമിട്ട് സൗദി ടൂറിസം അതോറിറ്റി 'സൂപ്പര്‍ യാട്ട് അറേബ്യ'എന്ന അന്താരാഷ്ട്ര കാമ്പയിന്‍ ആരംഭിച്ചു. സെപ്റ്റംബര്‍ 24 മുതല്‍ 27 വരെ നടന്ന മോണക്കോ യാട്ട് ഷോയില്‍ പങ്കെടുത്തുകൊണ്ടാണ് ഈ സുപ്രധാന പ്രഖ്യാപനം നടത്തിയത്. 84 ബില്യണ്‍ റിയാലിലധികം നിക്ഷേപ പിന്തുണയോടെയാണ് ഈ കാമ്പയിന്‍ നടപ്പിലാക്കുന്നത്.

ചരിത്രപരമായ തനിമയും അതുല്യതയും നിലനിര്‍ത്തി ഭാവി സാങ്കേതികവിദ്യകളെ സമന്വയിപ്പിക്കുന്ന ചെങ്കടലിന്റെ അസാധാരണമായ പ്രത്യേകതകള്‍ അതോറിറ്റി പ്രദര്‍ശനത്തില്‍ എടുത്തു കാട്ടി. ആധുനിക തുറമുഖങ്ങള്‍, സീ ലെയ്‌നുകള്‍, അതുല്യമായ യാത്രാനുഭവങ്ങള്‍, ഭീമാകാരമായ പവിഴപ്പുറ്റുകള്‍, മരുപ്പച്ചകള്‍, സ്വകാര്യ ദ്വീപുകള്‍ തുടങ്ങിയ പ്രകൃതി വിഭവങ്ങളും ഇതില്‍ ഉള്‍പ്പെടുന്നു.

ആഡംബര യാട്ടുകള്‍ക്ക് ആതിഥേയത്വം വഹിക്കാന്‍ കഴിയുന്ന തരത്തിലുള്ള നൂതന അടിസ്ഥാന സൗകര്യങ്ങളും ഉയര്‍ന്ന സന്നദ്ധതയും, ടൂറിസം സാധ്യതകളും, വാഗ്ദാനങ്ങള്‍ നല്‍കുന്ന നിക്ഷേപ അവസരങ്ങളും അതോറിറ്റി എടുത്തുപറഞ്ഞു. സഞ്ചാരപ്രേമികളേയും ആഡംബര കപ്പല്‍ യാത്രക്കാരെയും ആകര്‍ഷിക്കുന്ന ഒരു പുതിയ ആഗോള ലക്ഷ്യസ്ഥാനമായി സൗദി ചെങ്കടലിനെ മാറ്റാനുള്ള തങ്ങളുടെ നീക്കമാണ് ഇതിലൂടെ അതോറിറ്റി വ്യക്തമാക്കിയത്.

സൗദി റെഡ് സീ അതോറിറ്റി, ജിദ്ദ യാട്ട് ക്ലബ് ആന്‍ഡ് മറീന, അമാല, കിംഗ് അബ്ദുള്ള ഇക്കണോമിക് സിറ്റി, ദി റെഡ് സീ ഇന്റര്‍നാഷണല്‍ കമ്പനി, ബ്ലൂ ലിമിറ്റ്‌സ് ഗ്രൂപ്പ്, ടി.എച്ച്.സി. തുടങ്ങിയ പ്രമുഖ ഡെവലപ്പര്‍മാരും ഓപ്പറേറ്റര്‍മാരും ഉള്‍പ്പെട്ട തന്ത്രപരമായ പങ്കാളികള്‍ അതോറിറ്റിയുടെ പവലിയനില്‍ ഉണ്ടായിരുന്നു. 90-ല്‍ അധികം അന്താരാഷ്ട്ര സ്ഥാപനങ്ങളുമായി കൂടിക്കാഴ്ചകള്‍ നടത്താനും രാജ്യത്തിന്റെ ആഡംബര യാട്ട് മേഖലക്ക് ഉത്തേജനം നല്‍കുന്ന 18 കരാറുകള്‍ പ്രഖ്യാപിക്കാനും ഈ പങ്കാളിത്തം വഴിയൊരുക്കി.