കുവൈത്ത് സിറ്റി: രാജ്യത്ത് നിയമവിരുദ്ധമായ മദ്യനിര്മ്മാണത്തിനും വില്പനക്കുമെതിരെ കുവൈത്ത് സുരക്ഷാ വിഭാഗം നടപടികള് ശക്തമാക്കി. അടുത്തിടെയായി നടന്ന വിവിധ റെയ്ഡുകളില് വന്തോതില് വ്യാജമദ്യ നിര്മ്മാണ സാമഗ്രികളും, വില്പനക്കായി തയ്യാറാക്കിയ മദ്യക്കുപ്പികളും പിടിച്ചെടുത്തു.
മഹബൂല മേഖലയിലെ ഒരു താമസസ്ഥലം കേന്ദ്രീകരിച്ച് വ്യാജ വിദേശ മദ്യം നിര്മ്മിച്ച് വില്പന നടത്തിയിരുന്ന ഏഷ്യന് പ്രവാസിയെ ഖൈത്താന് ഇന്വെസ്റ്റിഗേഷന് ഡിപ്പാര്ട്ട്മെന്റ് അറസ്റ്റ് ചെയ്തു. ഇവരുടെ താമസസ്ഥലത്ത് നടത്തിയ റെയ്ഡില് 300-ല് അധികം മദ്യക്കുപ്പികളും, മദ്യനിര്മ്മാണത്തിന് ഉപയോഗിച്ചിരുന്ന ഉപകരണങ്ങളും അസംസ്കൃത വസ്തുക്കളും കണ്ടെടുത്തു.
പ്രാദേശികമായി നിര്മ്മിക്കുന്ന മദ്യത്തെ വിദേശ നിര്മ്മിതമെന്ന വ്യാജേന ലേബലുകളും മറ്റും ഉപയോഗിച്ച് വിപണിയിലെത്തിച്ചതിനെക്കുറിച്ച് അധികൃതര് വിശദമായ അന്വേഷണം ആരംഭിച്ചിട്ടുണ്ട്. എത്ര കാലമായി ഈ പ്രവര്ത്തനം നടക്കുന്നു, അസംസ്കൃത വസ്തുക്കള് എവിടെ നിന്ന് ലഭിച്ചു തുടങ്ങിയ കാര്യങ്ങള് കണ്ടെത്താനാണ് അന്വേഷണ സംഘം ശ്രമിക്കുന്നത്. പ്രതിയെ തുടര് നടപടികള്ക്കായി പബ്ലിക് പ്രോസിക്യൂഷന് കൈമാറി.
ജഹ്റ ഏരിയയില് നടന്ന പരിശോധനയില് നാടന് മദ്യവും വിദേശ മദ്യവും വില്പന നടത്തിയിരുന്ന മറ്റൊരു ഏഷ്യന് പ്രവാസിയും 18 കുപ്പികളടക്കം അറസ്റ്റിലായി. അന്ദലൂസിയ മേഖലയില് സുരക്ഷാ ഉദ്യോഗസ്ഥര് നടത്തിയ പരിശോധനയില് 18 മദ്യക്കുപ്പികളുമായി വന്ന ഒരു വാഹനം പിടിച്ചെടുത്തു. ഡ്രൈവര് ഓടി രക്ഷപ്പെടാന് ശ്രമിച്ചെങ്കിലും ഇയാളെ പിന്നീട് പിടികൂടി. പ്രതിയെ നാടുകടത്തല് നടപടികള്ക്കായി റഫര് ചെയ്യുകയും പിടിച്ചെടുത്ത മദ്യം നശിപ്പിക്കാനായി കൈമാറുകയും ചെയ്തു. രാജ്യത്ത് മദ്യക്കടത്തും വില്പനയും നടത്തുന്നവര്ക്കെതിരെ ശക്തമായ നിയമനടപടികള് തുടരുമെന്ന് സുരക്ഷാ വൃത്തങ്ങള് അറിയിച്ചു.
.jpg)
Related News
