മദീന: മദീനയിലെ ചരിത്രപ്രസിദ്ധമായ മസ്ജിദുല് ഖിബ്ലത്തൈന് ഇനി മുതല് 24 മണിക്കൂറും വിശ്വാസികള്ക്കായി തുറന്നിരിക്കും. സൗദി ഭരണാധികാരി സല്മാന് രാജാവിന്റെ ഉത്തരവനുസരിച്ചാണ് ഈ തീരുമാനം. വിശ്വാസികള്ക്ക് എല്ലാ സമയത്തും നമസ്കാരം നിര്വഹിക്കുന്നതിന് സൗകര്യമൊരുക്കുക എന്നതാണ് ഇതിന്റെ പ്രധാന ലക്ഷ്യം.
ഈ രാജകീയ നിര്ദേശത്തില് മദീന മേഖലാ അമീറും പ്രാദേശിക വികസന അതോറിറ്റി ചെയര്മാനുമായ അമീര് സല്മാന് ബിന് സുല്ത്താന്, സല്മാന് രാജാവിനും കിരീടാവകാശി അമീര് മുഹമ്മദ് ബിന് സല്മാനും നന്ദി അറിയിച്ചു. പള്ളികളോടുള്ള രാജ്യത്തിന്റെ നിരന്തരമായ ശ്രദ്ധയും, വിശുദ്ധ സ്ഥലങ്ങളിലെ തീര്ഥാടകര്ക്കും സന്ദര്ശകര്ക്കുമുള്ള സേവനങ്ങള് മെച്ചപ്പെടുത്തുന്നതിലുള്ള പ്രതിബദ്ധതയുമാണ് ഈ പ്രഖ്യാപനത്തിലൂടെ വ്യക്തമാവുന്നതെന്ന് അദ്ദേഹം പറഞ്ഞു. മസ്ജിദുല് ഖിബ്ലത്തൈന് വിശ്വാസികളുടെ സൗകര്യവും ആത്മീയ അനുഭവവും ഉറപ്പാക്കുന്നതിനുള്ള എല്ലാ പ്രവര്ത്തന നടപടികളും ബന്ധപ്പെട്ട അധികൃതര് ആരംഭിച്ചതായും അമീര് വെളിപ്പെടുത്തി.
24 മണിക്കൂറും പ്രവര്ത്തിക്കാന് മസ്ജിദുല് ഖിബ്ലത്തൈന് പൂര്ണ്ണമായും സജ്ജമാണെന്നും, ആരാധകര്ക്കായി എല്ലാ സൗകര്യങ്ങളും ഒരുക്കിയിട്ടുണ്ടെന്നും ഇസ്ലാമിക കാര്യ, ദഅ് വ, മാര്ഗനിര്ദേശ മന്ത്രി ശൈഖ് ഡോ. അബ്ദുല്ലത്തീഫ് അല് അല്ശൈഖ് അറിയിച്ചു. പള്ളികളുടെ വികസന പദ്ധതികള് തുടരുമെന്നും ഇസ്ലാമിനും മുസ്ലിംങ്ങള്ക്കും സേവനം ചെയ്യുന്നതില് സൗദി അറേബ്യയുടെ പങ്ക് കൂടുതല് ശക്തിപ്പെടുത്തുമെന്നും അദ്ദേഹം കൂട്ടിച്ചേര്ത്തു.
ചരിത്ര പശ്ചാത്തലം
ഇസ്ലാമിക ചരിത്രത്തില് മസ്ജിദുല് ഖിബ്ലത്തൈന് (രണ്ട് ഖിബ് ലകളുള്ള പള്ളി) എന്നറിയപ്പെടുന്ന ഈ പള്ളിക്ക് അതീവ പ്രാധാന്യമുണ്ട്. മദീനയുടെ പടിഞ്ഞാറ് ഭാഗത്ത് സ്ഥിതി ചെയ്യുന്ന ഈ പള്ളിയുടെ ചരിത്രം പ്രവാചകന് മുഹമ്മദ് നബിയുടെ കാലം വരെ നീളുന്നു.
ഈ പള്ളിക്ക് 'രണ്ട് ഖിബ് ലകള്' എന്ന പേര് ലഭിക്കാന് കാരണമായ ഒരു സുപ്രധാന സംഭവം ഇവിടെ വെച്ചാണ് നടന്നത്. ഇസ്ലാമിന്റെ ആദ്യഘട്ടത്തില്, നമസ്കാരത്തിനായുള്ള ഖിബ് ല (അഥവാ നമസ്കാര ദിശ) ജറുസലേമിലെ ബൈത്തുല് മുഖദ്ദസ് (മസ്ജിദുല് അഖ്സ) ആയിരുന്നു.
ഹിജ്റ രണ്ടാം വര്ഷം, റജബ് മാസം, പ്രവാചകന് മുഹമ്മദ് നബി (സ) ഈ പള്ളിയില് വെച്ച് ളുഹ്ര് നമസ്കാരം നിര്വഹിച്ചുകൊണ്ടിരിക്കുമ്പോള്, അല്ലാഹുവിന്റെ കല്പ്പന പ്രകാരം ഖിബ് ല ബൈത്തുല് മുഖദ്ദസില് നിന്ന് മക്കയിലെ കഅബയിലേക്ക് മാറ്റാന് നിര്ദ്ദേശം നല്കി. നമസ്കാരത്തിന്റെ മദ്ധ്യത്തില് വെച്ച് തന്നെ പ്രവാചകന് ദിശ കഅബയിലേക്ക് തിരിഞ്ഞു. ഈ മാറ്റം അപ്പോള് നമസ്കരിച്ചുകൊണ്ടിരുന്ന എല്ലാവരും പിന്തുടര്ന്നു.
ഇതിലൂടെ, ഒരേ നമസ്കാരത്തില് തന്നെ രണ്ട് ഖിബ് ലകളിലേക്ക് തിരിഞ്ഞ് നമസ്കരിച്ച പള്ളിയായി മസ്ജിദുല് ഖിബ് ലത്തൈന് മാറി. ഈ ചരിത്രപരമായ കാരണത്താലാണ് ഈ പള്ളിക്ക് മസ്ജിദുല് ഖിബ ലത്തൈന് എന്ന പേര് ലഭിച്ചത്. വിശ്വാസികള്ക്ക് അല്ലാഹുവില് നിന്നുള്ള കല്പ്പനയുടെ പ്രാധാന്യവും, പ്രവാചകനോടുള്ള അനുസരണവും ഓര്മ്മിപ്പിക്കുന്ന ഒരു സുപ്രധാന തീര്ത്ഥാടന കേന്ദ്രമാണിത്.
കാലക്രമേണ പള്ളിക്ക് നിരവധി നവീകരണങ്ങളും വികസനങ്ങളും വന്നിട്ടുണ്ട്. 24 മണിക്കൂറും തുറന്നിരിക്കാനുള്ള സൗദി ഭരണാധികാരിയുടെ ഇപ്പോഴത്തെ തീരുമാനം, ലോകമെമ്പാടുമുള്ള വിശ്വാസികള്ക്ക് ഈ ചരിത്രപരമായ പുണ്യസ്ഥലത്ത് എപ്പോഴും ആരാധന നടത്താനുള്ള അവസരം നല്കുന്നു.
.jpg)
Related News
