ജിദ്ദ: റോയല്‍സ് ക്രിക്കറ്റ് ക്ലബ് സംഘടിപ്പിച്ച RPL ക്രിക്കറ്റ് ടൂര്‍ണമെന്റ് ഏഴാം സീസണ് ആവേശഭരിതമായ പരിസമാപ്തി. അവസാന പന്ത് വരെ നീണ്ടു നിന്ന അതിശക്തമായ ഫൈനല്‍ പോരാട്ടം മത്സരം വീക്ഷിക്കാന്‍ എത്തിയ കാണികള്‍ക്ക് ഏറെ ആവേശം നിറഞ്ഞ അനുഭവമായി.

ടീ ഓസീസ് ഇലവനും, ടീം അമിഗോസും ഏറ്റുമുട്ടിയ ഫൈനലില്‍ ടീം ഓസീസ് ഇലവന്‍ ഉയര്‍ത്തിയ 12 ഓവറില്‍ 117 എന്ന വിജയലക്ഷ്യം അവസാന പന്തില്‍ മറികടന്ന് അമിഗോസ് കിരീടം നേടി. ടോസ് നേടി ഫീല്‍ഡിംഗ് തിരഞ്ഞെടുത്ത അമിഗോസിന് RPL ടൂര്‍ണമെന്റിലെ മൂന്നാമത്തെ കിരീടമാണ്.

ജയ-പരാജയ സാധ്യതകള്‍ മാറിമറിഞ്ഞ മത്സര മികവിനൊപ്പം കാണികളുടെ സജീവ സാന്നിധ്യം കൂടിയായപ്പോള്‍ ഓരോ റണ്‍സിലും വിക്കറ്റിലുമെല്ലാം ഗാലറിയില്‍ ആവേശം അതിന്റെ ഉച്ചസ്ഥായിയിലെത്തി. ഇരുടീമുകളും മികച്ച പ്രകടനം കാഴ്ചവെച്ചപ്പോള്‍, കളിക്കാരുടെ പോരാട്ട മനോഭാവവും കൂട്ടായ്മയും പ്രത്യേകം ശ്രദ്ധിക്കപ്പെട്ടു.

RPL കമ്മിറ്റിയുടെ മികച്ച സംഘാടനവും, ചിട്ടയായ സമയ ക്രമീകരണവും ടൂര്‍ണമെന്റിനെ ഏറെ പ്രശംസനീയമാക്കി. ഫൈനലിന്റെ ആവേശം മുഴുവന്‍ വേദിയെയും പ്രേക്ഷകരെയും ഒരുമിപ്പിച്ചപ്പോള്‍, RPL സീസണ്‍-7 ജിദ്ദ കായികപ്രേമികള്‍ക്ക് ഒരു മറക്കാനാവാത്ത കായിക മാമാങ്കമായി മാറി.

സമ്മാനദാന ചടങ്ങുകള്‍ക്ക് RPL കമ്മിറ്റ് ചെയര്‍മാന്‍ ആസിഫ് നേതൃത്വം നല്‍കി. ടൂര്‍ണമെന്റിലെ മികച്ച കളിക്കാരനുള്ള ട്രോഫി (MVP) ഷറഫലി (ടീം ഗൂഗ്ലീസ്) സ്വന്തമാക്കിയപ്പോള്‍, ഫൈനലിലെ താരമായി സുനല്‍ (ടീം അമിഗോസ്) തിരഞ്ഞെടുക്കപ്പെട്ടു. മികച്ച ബാറ്റര്‍ ഷറഫലി (ടീം ഗൂഗ്ലീസ്), മികച്ച ബൗളര്‍ ഹുസ്‌നി(ടീം ഓസീസ് ഇലവന്‍), മികച്ച ബൗളര്‍ സുനല്‍ (ടീം അമിഗോസ്) എന്നിവര്‍ മറ്റു വ്യക്തിഗത ട്രോഫികള്‍ കരസ്ഥമാക്കി. വിജയികള്‍ക്കുള്ള ട്രോഫികള്‍ ടൂര്‍ണമെന്റ് സ്‌പോണ്‍സര്‍ MAK Container Line ന്റെ മാനേജര്‍ സര്‍ഫറാസ് സമ്മാനിച്ചു.