മസ്കത്ത്: വികസനമാണ് കേരളത്തിന്റെ 'റിയല് സ്റ്റോറി' എന്നും, മുന്നേറ്റം തുടരാന് ജനങ്ങളുടെ പിന്തുണ ആവശ്യമാണെന്നും മുഖ്യമന്ത്രി പിണറായി വിജയന്. മസ്കത്തിലെ ആമീറാത് പാര്ക്കില് ഇന്ത്യന് സോഷ്യല് ക്ലബ്ബ് കേരളാ വിങ്ങിന്റെ ആഭിമുഖ്യത്തില് നടക്കുന്ന ഇന്ത്യന് കമ്യൂണിറ്റി ഫെസ്റ്റിവല് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സമൂഹം മുന്നോട്ടു പോകണമെന്ന പ്രതിബദ്ധത കേരള സര്ക്കാറിനുണ്ട്. സര്ക്കാറിന് ജനങ്ങളോടാണ് പ്രതിബദ്ധത, എതിര്പ്പുകള്ക്ക് മുന്നില് കീഴടങ്ങില്ല.
വികസന കാര്യത്തില് മുന് സര്ക്കാറുകളുടെ കെടുകാര്യസ്ഥതയാണ് കേരളത്തെ പിന്നോട്ടാക്കിയത്. തുടര്ഭരണം വികസനത്തിന് സഹായിക്കുമെന്ന് തെളിയിച്ചതായും, വീണ്ടും തുടര്ഭരണത്തിന് ജനങ്ങള് സഹായിക്കണമെന്നും അദ്ദേഹം അഭ്യര്ഥിച്ചു.
കേരളത്തിന്റെ വികസനത്തില് പ്രവാസികള് വലിയ പങ്കുവഹിച്ചു. പ്രവാസികള് ഉയര്ത്തുന്ന അഭിപ്രായങ്ങള് കേരളത്തെ കുറ്റം പറയുന്നതല്ല, മറിച്ച് അവര് ജീവിക്കുന്ന നാടിന്റെ ഉയരത്തിലേക്ക് കേരളവും എത്തണമെന്ന അഭിലാഷമാണെന്നും മുഖ്യമന്ത്രി പറഞ്ഞു. 'കേരള മോഡല്' എന്നറിയപ്പെടുന്ന വിദ്യാഭ്യാസ-സാമൂഹിക മാറ്റങ്ങള്ക്ക് വഴിതെളിച്ചത് 1957-ലെ ഒന്നാം കേരള സര്ക്കാരാണെന്നും അദ്ദേഹം കൂട്ടിച്ചേര്ത്തു.
കേരള സാംസ്കാരിക മന്ത്രി സജി ചെറിയാന്, ഇന്ത്യന് അംബാസഡര് ജി.വി. ശ്രീനിവാസ്, നോര്ക്ക റൂട്ട്സ് വൈസ് ചെയര്മാന് ഡോ. എം.എ. യൂസഫലി, ഗള്ഫാര് ഗ്രൂപ് ചെയര്മാന് ഗള്ഫാര് മുഹമ്മദലി, ഒമാന് ചേംബര് ഓഫ് കൊമേഴ്സ് ആന്ഡ് ഇന്ഡസ്ട്രി ചെയര്മാന് ഫൈസല് ബിന് അബ്ദുല്ല അല് നവാസ് ഉള്പ്പെടെ നിരവധി പ്രമുഖര് ചടങ്ങില് പങ്കെടുത്തു.
'മനുഷ്യത്വമുള്ളവരായിരിക്കൂ, സമാധാനം പുലരട്ടെ' എന്ന സന്ദേശവുമായി സംഘടിപ്പിച്ച മൂന്ന് ദിവസത്തെ ഫെസ്റ്റിവല് ഇന്ന് (ശനിയാഴ്ച) സമാപിക്കും. ഇന്ത്യയുടെ വൈവിധ്യമാര്ന്ന കലാ സാംസ്കാരിക പാരമ്പര്യത്തെ ഉള്ക്കൊണ്ടുള്ള വിവിധ കലാപരിപാടികളും ഒമാനിലെ തനത് കലാരൂപങ്ങളും ഫെസ്റ്റിവലില് അരങ്ങേറി. സമാപന ദിവസമായ ഇന്ന് പഞ്ചാരിമേളത്തോടെ പരിപാടികള്ക്ക് തുടക്കമാകും. തുടര്ന്ന് ഒമാനി നൃത്തം, തിരുവാതിരക്കളി, നാടോടി നൃത്തം, ഫോക് ഫ്യൂഷന്, 'കനല്' ഫോക് ലോറിന്റെ പരിപാടി എന്നിവ അരങ്ങേറും.
.jpg)
Related News
