ഷാര്ജ: കലയുടെയും സംസ്കാരത്തിന്റെയും ആഗോള കേന്ദ്രമായി വളരുന്ന ഷാര്ജയില് പുതിയ സര്വ്വകലാശാല പ്രഖ്യാപിച്ച് ഭരണാധികാരി ശൈഖ് ഡോ. സുല്ത്താന് ബിന് മുഹമ്മദ് അല് ഖാസിമി. 'യൂണിവേഴ്സിറ്റി ഓഫ് ദി ആര്ട്സ് ഷാര്ജ' എന്ന പേരില് ആരംഭിക്കുന്ന ഈ സ്ഥാപനം, വിവിധ കലാവിഭാഗങ്ങളെ ഒരേ മേല്ക്കൂരയ്ക്ക് കീഴില് കൊണ്ടുവന്ന് ഉന്നതവിദ്യാഭ്യാസ രംഗത്ത് പുതിയ വിപ്ലവം സൃഷ്ടിക്കാന് ലക്ഷ്യമിടുന്നു.
പുതിയ സര്വ്വകലാശാലയുടെ അമരത്തേക്ക് ശൈഖ ഹൂര് ബിന്ത് സുല്ത്താന് അല് ഖാസിമിയെ പ്രസിഡന്റായി നിയമിച്ചു. ഭരണപരമായ കാര്യക്ഷമത ഉറപ്പാക്കാന് നിലവിലുണ്ടായിരുന്ന ഷാര്ജ പെര്ഫോമിങ് ആര്ട്സ് അക്കാദമി ബോര്ഡ് ഓഫ് ട്രസ്റ്റീസിനെ പിരിച്ചുവിട്ട്, ശൈഖ ഹൂറിന്റെ അധ്യക്ഷതയില് പുതിയ ബോര്ഡ് രൂപീകരിച്ചു. സര്വ്വകലാശാലയുടെ വിവിധ വിദ്യാലയങ്ങള്ക്ക് കരുത്തുപകരാന് അന്താരാഷ്ട്ര തലത്തില് ശ്രദ്ധേയരായ വ്യക്തികളെയാണ് ഭരണാധികാരി ചുമതലപ്പെടുത്തിയിരിക്കുന്നത്. പെര്ഫോമിങ് ആര്ട്സ് അക്കാദമി ഡയറക്ടറായി ഡോ. പീറ്റര് ബാര്ലോയെയും വിഷ്വല് ആര്ട്സ് അക്കാദമി ഡയറക്ടറായി ഡോ. നാദിയാ മഹ്ദി അല് ഹസ്നിയെയും നിയമിച്ചു.
ഭിന്നിച്ചു നില്ക്കുന്ന വിവിധ കലാപഠന ശാഖകളെ ഒരുമിച്ചു ചേര്ത്ത് ഉന്നതവിദ്യാഭ്യാസം കൂടുതല് ചിട്ടപ്പെടുത്തുക, ആഗോള നിലവാരത്തിലുള്ള പഠനസൗകര്യങ്ങള് ഒരുക്കി വിദ്യാര്ത്ഥികളെ സര്ഗ്ഗാത്മക മേഖലകളില് പ്രഗത്ഭരാക്കുക, ഷാര്ജയുടെ സാംസ്കാരിക പൈതൃകത്തെ വരുംതലമുറകളിലേക്ക് ആധുനിക രീതിയില് പകര്ന്നു നല്കുക എന്നിവയാണ് ലക്ഷ്യം.
കേവലം ഒരു വിദ്യാഭ്യാസ സ്ഥാപനം എന്നതിലുപരി, മിഡില് ഈസ്റ്റിലെ കലാകാരന്മാരുടെ ഒരു പ്രധാന സംഗമവേദിയായി ഈ സര്വ്വകലാശാല മാറുമെന്നാണ് കരുതപ്പെടുന്നത്.
.jpg)
Related News
