തിരുവനന്തപുരം: തദ്ദേശ തിരഞ്ഞെടുപ്പ് പ്രചാരണത്തിനിടെ സമൂഹമാധ്യമങ്ങളില്‍ വൈറലായ 'പോറ്റിയേ കേറ്റിയേ' എന്ന പാരഡി ഗാനം മതവികാരം വ്രണപ്പെടുത്തിയെന്ന പരാതിയില്‍ പോലീസ് കേസെടുത്തു. ഗാനരചയിതാവ് കുഞ്ഞബ്ദുല്ല ഉള്‍പ്പെടെ നാലുപേരെ പ്രതികളാക്കി തിരുവനന്തപുരം സൈബര്‍ പോലീസാണ് കേസ് രജിസ്റ്റര്‍ ചെയ്തത്.

തിരുവാഭരണപാത സംരക്ഷണ സമിതി ജനറല്‍ സെക്രട്ടറി പ്രശാന്ത് കുഴിക്കാല നല്‍കിയ പരാതിയിലാണ് നടപടി. ഭക്തിഗാനത്തെ വികലമായി ഉപയോഗിച്ചുവെന്നും ഇത് വിശ്വാസികളുടെ വികാരം വ്രണപ്പെടുത്തിയെന്നുമാണ് പ്രാഥമിക കണ്ടെത്തല്‍. സൈബര്‍ ഓപ്പറേഷന്‍സ് എസ്പി അങ്കിത് അശോക് നടത്തിയ അന്വേഷണ റിപ്പോര്‍ട്ടിന്റെ അടിസ്ഥാനത്തിലാണ് കേസെടുക്കാന്‍ സംസ്ഥാന പോലീസ് മേധാവി നിര്‍ദ്ദേശം നല്‍കിയത്.

ഖത്തറില്‍ ജോലി ചെയ്യുന്ന നാദാപുരം സ്വദേശി (ഗാനരചയിതാവ്) ജി.പി. കുഞ്ഞബ്ദുല്ല, ഡാനിഷ് മലപ്പുറം (ഗായകന്‍), സി.എം.എസ് മീഡിയ ഉടമ സുബൈര്‍ പന്തല്ലൂര്‍, ഡബ്ബിങ് നിര്‍വഹിച്ച നാസര്‍ കൂട്ടിലങ്ങാടി എന്നിവര്‍ക്കെതിരെയാണ് കേസ്.

ഖത്തറില്‍ വച്ച് കുഞ്ഞബ്ദുല്ല എഴുതിയ വരികള്‍ നാട്ടിലെ സുഹൃത്തിന് അയച്ചുകൊടുക്കുകയും പിന്നീട് അത് ഡാനിഷ് ആലപിച്ച് സി.എം.എസ് മീഡിയ വഴി പുറത്തിറക്കുകയുമായിരുന്നു. അയ്യപ്പന്‍, ശാസ്താവ് തുടങ്ങിയ പദങ്ങള്‍ ഗാനത്തില്‍ വികലമായി ഉപയോഗിച്ചതാണ് പരാതിക്ക് ആധാരമായത്. അതേസമയം, പാട്ടിനോടല്ല മറിച്ച് അതിലെ ചില പദപ്രയോഗങ്ങള്‍ക്കെതിരെയാണ് തന്റെ പരാതിയെന്ന് പ്രശാന്ത് കുഴിക്കാല വ്യക്തമാക്കി. ഇതിനെ രാഷ്ട്രീയമായി മുതലെടുക്കുന്നതില്‍ തനിക്ക് ഉത്തരവാദിത്തമില്ലെന്നും അദ്ദേഹം കൂട്ടിച്ചേര്‍ത്തു.

ഗാനത്തിനെതിരെ കടുത്ത വിമര്‍ശനവുമായി സിപിഎം രംഗത്തെത്തി. കോണ്‍ഗ്രസും മുസ്ലിം ലീഗും തിരഞ്ഞെടുപ്പില്‍ വര്‍ഗീയ ധ്രുവീകരണമുണ്ടാക്കാന്‍ ശ്രമിച്ചതിന്റെ തെളിവാണ് ഈ ഗാനമെന്ന് സിപിഎം പത്തനംതിട്ട ജില്ലാ സെക്രട്ടറി രാജു ഏബ്രഹാം ആരോപിച്ചു. ഇത് ഗുരുതരമായ തിരഞ്ഞെടുപ്പ് ചട്ടലംഘനമാണെന്നും പാര്‍ട്ടി ചൂണ്ടിക്കാട്ടി.