മസ്കത്ത്: ത്രിരാഷ്ട്ര സന്ദര്ശനത്തിന്റെ ഭാഗമായി ഇന്ത്യന് പ്രധാനമന്ത്രി നരേന്ദ്ര മോദി ഒമാനിലെത്തി. ജോര്ദാന്, എത്യോപ്യ സന്ദര്ശനങ്ങള് പൂര്ത്തിയാക്കി ഇന്നു വൈകുന്നേരം മസ്കത്തിലെ റോയല് എയര്പോര്ട്ടിലിറങ്ങിയ പ്രധാനമന്ത്രിക്ക് ഒമാന് പ്രതിരോധ കാര്യ ഉപപ്രധാനമന്ത്രി സയ്യിദ് ശിഹാബ് ബിന് താരീഖ് അല് സഈദിന്റെ നേതൃത്വത്തില് ഉജ്ജ്വലമായ ഔദ്യോഗിക വരവേല്പ് നല്കി.
ഇന്ത്യ-ഒമാന് നയതന്ത്ര ബന്ധത്തിന്റെ 70-ാം വാര്ഷികം ആഘോഷിക്കുന്ന വേളയിലാണ് പ്രധാനമന്ത്രിയുടെ ഈ സന്ദര്ശനം എന്നത് ഏറെ ശ്രദ്ധേയമാണ്. 2018-ന് ശേഷം മോദി ഒമാനിലെത്തുന്നത് രണ്ടാം തവണയാണിത്. ഇരുരാജ്യങ്ങളും തമ്മിലുള്ള സൗഹൃദം കൂടുതല് ദൃഢമാക്കുക എന്ന ലക്ഷ്യത്തോടെയാണ് ഈ ദ്വിദിന സന്ദര്ശനം.
രണ്ട് ദിവസം നീളുന്ന സന്ദര്ശനത്തില് ഒമാന് ഭരണാധികാരി സുല്ത്താന് ഹൈതം ബിന് താരിഖുമായി പ്രധാനമന്ത്രി ഉന്നതതല ചര്ച്ചകള് നടത്തും. ഇതില് പ്രധാനമായും പ്രതീക്ഷിക്കുന്നത് സ്വതന്ത്ര വ്യാപാര കരാറാണ്. ഏറെ നാളായി ചര്ച്ചയിലുള്ള ഇന്ത്യ-ഒമാന് സ്വതന്ത്ര വ്യാപാര കരാര് ഈ സന്ദര്ശനത്തിലൂടെ യാഥാര്ഥ്യമായേക്കും. വ്യാപാരം, നിക്ഷേപം, ഊര്ജം, പ്രതിരോധം, സാങ്കേതികവിദ്യ, കൃഷി, സംസ്കാരം തുടങ്ങിയ മേഖലകളിലെ സഹകരണം വിപുലപ്പെടുത്തും. മസ്കത്തിലെത്തുന്ന പ്രധാനമന്ത്രി ഇന്ത്യന് പ്രവാസികളെയും വിദ്യാര്ഥികളെയും പ്രത്യേകം അഭിസംബോധന ചെയ്യും.
2023 ഡിസംബറില് സുല്ത്താന് ഹൈതം ബിന് താരിഖ് ഇന്ത്യ സന്ദര്ശിക്കുകയും പ്രധാനമന്ത്രിയുമായും രാഷ്ട്രപതിയുമായും ചര്ച്ചകള് നടത്തുകയും ചെയ്തിരുന്നു. ഒരു ഒമാന് സുല്ത്താന്റെ 25 വര്ഷത്തിന് ശേഷമുള്ള ആദ്യ സന്ദര്ശനമായിരുന്നു അത്. ഇതിന്റെ തുടര്ച്ചയായാണ് ഇപ്പോള് പ്രധാനമന്ത്രിയുടെ സന്ദര്ശനം.
.jpg)
Related News
