നെടുമ്പാശേരി: പുണ്യഭൂമിയിലേക്ക് തിരിക്കാനായി മാസങ്ങളോളം കാത്തിരുന്ന തീര്ഥാടകരുടെ യാത്ര വഴിമുട്ടി. പശ്ചിമേഷ്യയിലെ യുദ്ധസാഹചര്യങ്ങള് കണക്കിലെടുത്ത് യാത്രക്കാരുടെ എണ്ണം വെട്ടിച്ചുരുക്കിയെന്ന വിചിത്രമായ വാദമുയര്ത്തി കൊച്ചിയില് നിന്ന് ഉംറയ്ക്ക് പോകാനെത്തിയ 46 തീര്ഥാടകരെയാണ് ആകാശ എയര് വിമാനത്താവളത്തില് തടഞ്ഞത്.
യാത്ര മുടങ്ങിയതോടെ വിവിധ ജില്ലകളില് നിന്നും എത്തിയ പ്രായമായവരടക്കമുള്ള തീര്ഥാടകര് കടുത്ത പ്രതിസന്ധിയിലായി. യാത്രാ സൗകര്യം നിഷേധിച്ചതിന് പിന്നാലെ അവര്ക്ക് വേണ്ട അടിസ്ഥാന സൗകര്യങ്ങളോ കൃത്യമായ മറുപടിയോ നല്കാന് വിമാനക്കമ്പനി അധികൃതര് തയ്യാറായില്ലെന്ന് യാത്രക്കാര് ആരോപിച്ചു. പകരം സംവിധാനങ്ങളെക്കുറിച്ച് യാതൊരു അറിയിപ്പും നല്കാതെ കമ്പനി തങ്ങളെ അവഗണിക്കുകയാണെന്നാണ് പരാതി.
ഗള്ഫ് മേഖലയിലെ നിലവിലെ രാഷ്ട്രീയ സാഹചര്യങ്ങളാണ് ഈ അപ്രതീക്ഷിത നടപടിക്ക് കാരണമായി വിമാനക്കമ്പനി ചൂണ്ടിക്കാട്ടുന്നത്. ആഭ്യന്തര പ്രശ്നങ്ങളും വിലക്കയറ്റവും മൂലം ഇറാനില് പ്രതിഷേധം ശക്തമാണ്. ഇറാനിലെ പ്രക്ഷോഭങ്ങള്ക്ക് പിന്നില് അമേരിക്കയാണെന്ന് ആരോപിച്ചുകൊണ്ട് മേഖലയിലെ യുഎസ് സൈനിക ബേസുകള്ക്ക് നേരെ ഇറാന് ആക്രമണമുണ്ടാകാന് സാധ്യതയുള്ളതായി റിപ്പോര്ട്ടുകളുണ്ട്.
സൗദി അറേബ്യയുള്പ്പെടെയുള്ള രാജ്യങ്ങളില് അമേരിക്കന് സൈനിക സാന്നിധ്യമുള്ളതിനാല് സുരക്ഷാ മുന്കരുതലിന്റെ ഭാഗമായി ഗള്ഫ് മേഖലയിലേക്കുള്ള വിമാന സര്വീസുകള് കുറയ്ക്കാന് കമ്പനികള് തീരുമാനിക്കുകയായിരുന്നു. സുരക്ഷാ കാരണങ്ങള് പറയുമ്പോഴും, മുന്കൂട്ടി ടിക്കറ്റ് ബുക്ക് ചെയ്ത യാത്രക്കാരെ അവസാന നിമിഷം ദുരിതത്തിലാക്കിയ വിമാനക്കമ്പനിയുടെ നടപടിക്കെതിരെ കടുത്ത പ്രതിഷേധമാണ് ഉയരുന്നത്.
.jpg)
Related News
