റിയാദ്: ശബരിമലയിലെ സ്വര്ണക്കൊള്ളയുമായി ബന്ധപ്പെട്ട് ബി.ജെ.പി നടത്തുന്ന ദുര്ബലമായ പ്രതിഷേധങ്ങള് സി.പി.എമ്മുമായുള്ള രാഷ്ട്രീയ ഒത്തുതീര്പ്പിന്റെ ഭാഗമാണെന്ന് യൂത്ത് കോണ്ഗ്രസ് സംസ്ഥാന പ്രസിഡന്റ് ഒ.ജെ. ജനീഷ് ആരോപിച്ചു. ഒ.ഐ.സി.സി തൃശൂര് ജില്ലാ കമ്മിറ്റിയുടെ 15-ാമത് വാര്ഷികാഘോഷങ്ങളില് പങ്കെടുക്കുന്നതിനായി റിയാദിലെത്തിയ അദ്ദേഹം വാര്ത്താസമ്മേളനത്തില് സംസാരിക്കുകയായിരുന്നു.
സ്വര്ണപ്പാളികള് ചെമ്പാണെന്ന് രേഖപ്പെടുത്തി കടത്തിക്കൊണ്ടുപോയ സംഭവത്തില് രാഷ്ട്രീയ നോമിനികള്ക്ക് പങ്കുണ്ടെന്നും, ഇത്രയും ഗുരുതരമായ വിഷയം ഉണ്ടായിട്ടും ബി.ജെ.പി ശക്തമായ സമരം നടത്താത്തത് വരാനിരിക്കുന്ന തെരഞ്ഞെടുപ്പുകള് ലക്ഷ്യമിട്ടുള്ള ഡീലിന്റെ ഭാഗമാണെന്നും ഒ.ജെ. ജനീഷ് പറഞ്ഞു.
ഹൈക്കോടതി മേല്നോട്ടത്തിലുള്ള അന്വേഷണത്തില് വിശ്വാസമുണ്ടെങ്കിലും, കേന്ദ്ര ഏജന്സികളുടെ ഇടപെടലില് രാഷ്ട്രീയ ലക്ഷ്യങ്ങള് ഉണ്ടാകാനുള്ള സാധ്യതകള് അദ്ദേഹം ചോദ്യം ചെയ്തു. കരുവന്നൂര് ബാങ്ക് തട്ടിപ്പ് കേസുപോലെ, നിയമസഭാ സീറ്റുകള് ലക്ഷ്യമിട്ടുള്ള രാഷ്ട്രീയ സെറ്റില്മെന്റായി ശബരിമല കേസും മാറാന് സാധ്യതയുണ്ടെന്ന ആശങ്കയും അദ്ദേഹം പ്രകടിപ്പിച്ചു.
ശ്രീകോവിലില് നടന്ന മോഷണം വിശ്വാസികള്ക്ക് ഏറെ വൈകാരികമായ വിഷയമാണെന്നും, ഇതിന് പിന്നിലെ അന്താരാഷ്ട്ര ബന്ധങ്ങള് ഉള്പ്പെടെ സമഗ്രമായി പുറത്തുകൊണ്ടുവരണമെന്നും അദ്ദേഹം ആവശ്യപ്പെട്ടു.
വരാനിരിക്കുന്ന കേരള നിയമസഭാ തെരഞ്ഞെടുപ്പില് യുവാക്കള്ക്കും സ്ത്രീകള്ക്കും മതിയായ പ്രാതിനിധ്യം ഉറപ്പാക്കുന്നതിനായി ഉദയ്പൂര് ചിന്തന് ശിബിരത്തിലെ തീരുമാനങ്ങള് കോണ്ഗ്രസ് കര്ശനമായി നടപ്പാക്കണമെന്നും ഒ.ജെ. ജനീഷ് ആവശ്യപ്പെട്ടു.
വാര്ത്താസമ്മേളനത്തില് ഒ.ഐ.സി.സി റിയാദ് സെന്ട്രല് കമ്മിറ്റി പ്രസിഡന്റ് സലിം കളക്കര, തൃശൂര് ജില്ലാ പ്രസിഡന്റ് നാസര് വലപ്പാട്, ജനറല് സെക്രട്ടറി (സംഘടനാ ചുമതല) സോണി പാറക്കല്, ചെയര്മാന് യഹിയ കൊടുങ്ങല്ലൂര്, സെന്ട്രല് കമ്മിറ്റി ജനറല് സെക്രട്ടറി സുരേഷ് ശങ്കര്, കണ്വീനര് സെയ്ഫ് റഹ്മാന് എന്നിവര് പങ്കെടുത്തു.
.jpg)
Related News
