അബുദാബി: ലോകമെമ്പാടുമുള്ള മലയാളി സമൂഹത്തിന് അഭിമാനമായി ലുലു ഗ്രൂപ്പ് ചെയര്മാന് എം.എ. യൂസഫലി വീണ്ടും. യുഎഇയിലെ അനാഥക്കുട്ടികളുടെ സുരക്ഷയും ഉന്നമനവും ലക്ഷ്യമിട്ടുള്ള 'മദര് ഓഫ് ദി നേഷന് എന്ഡോവ്മെന്റ്' പദ്ധതിയിലേക്ക് 15 കോടി ദിര്ഹം (ഏകദേശം 371 കോടി രൂപ) അദ്ദേഹം കൈമാറി.
യുഎഇ പ്രസിഡന്റ് ഷെയ്ഖ് മുഹമ്മദ് ബിന് സായിദ് അല് നഹ്യാന്റെ പ്രത്യേക താല്പര്യപ്രകാരം അബുദാബി ഔഖാഫ് നടപ്പിലാക്കുന്നതാണ് ഈ ബൃഹദ് പദ്ധതി. അനാഥരായ കുട്ടികള്ക്ക് മികച്ച വിദ്യാഭ്യാസം, ആധുനിക ആരോഗ്യ പരിരക്ഷ, സാമൂഹിക ശാക്തീകരണം എന്നിവ ഉറപ്പാക്കി അവരുടെ ഭാവി സുരക്ഷിതമാക്കുക എന്നതാണ് പദ്ധതിയുടെ പ്രധാന ലക്ഷ്യം.
അബുദാബി ആസ്ഥാനമായി 52 വര്ഷമായി പ്രവര്ത്തിക്കുന്ന തനിക്ക്, ഭരണാധികാരികളുടെ കാരുണ്യവഴിയിലുള്ള ഇത്തരം മഹത്തായ സംരംഭങ്ങളുടെ ഭാഗമാകാന് കഴിഞ്ഞതില് വലിയ അഭിമാനമുണ്ടെന്ന് എം.എ. യൂസഫലി പറഞ്ഞു. 'രാഷ്ട്രപിതാവ് ഷെയ്ഖ് സായിദ് ബിന് സുല്ത്താന് അല് നഹ്യാനും രാഷ്ട്രമാതാവ് ഷെയ്ഖാ ഫാത്തിമ ബിന്ത് മുബാറക്കും വിഭാവനം ചെയ്ത ജീവകാരുണ്യത്തിന്റെ പാതയാണ് ഈ പദ്ധതിയിലൂടെ പ്രതിഫലിക്കുന്നത്. അനേകം കുരുന്നുകളുടെ ജീവിതത്തില് വെളിച്ചം പകരാന് ഇതിലൂടെ സാധിക്കും. ഇത് യുഎഇയുടെ മാനുഷിക മൂല്യങ്ങളുടെ ഉജ്ജ്വല മാതൃകയാണ്.' - എം.എ. യൂസഫലി പറഞ്ഞു.
അബുദാബി ഔഖാഫിന്റെ നേരിട്ടുള്ള നിയന്ത്രണത്തില് ഒരു പ്രത്യേക നിക്ഷേപ പദ്ധതിയായാണ് ഇത് പ്രവര്ത്തിക്കുന്നത്. സഹായം അര്ഹരായവരിലേക്ക് കൃത്യമായി എത്തുന്നുണ്ടെന്ന് ഉറപ്പാക്കാന് ശക്തമായ നിരീക്ഷണ സംവിധാനം ഏര്പ്പെടുത്തിയിട്ടുണ്ട്. ദാനധര്മ്മങ്ങളിലും സഹിഷ്ണുതയിലും അധിഷ്ഠിതമായ ഒരു സമൂഹത്തെ കെട്ടിപ്പടുക്കുക, ഒപ്പം രാജ്യത്തെ എല്ലാ കുട്ടികള്ക്കും തുല്യ അവസരങ്ങള് ലഭ്യമാക്കുക എന്നതാണ് ലക്ഷ്യം.
സഹിഷ്ണുതയുടെയും സ്നേഹത്തിന്റെയും സന്ദേശം ലോകത്തിന് കൈമാറുന്ന ഈ പദ്ധതിയിലേക്ക് ഒരു പ്രവാസി മലയാളി നല്കിയ ഈ വന് തുക യുഎഇ ഭരണകൂടത്തോടുള്ള അദ്ദേഹത്തിന്റെ ആദരവ് കൂടിയായി വിലയിരുത്തപ്പെടുന്നു.
Related News
