അബുദാബി: യുഎഇയുടെ പരമാധികാരത്തിന്മേലുള്ള കടന്നുകയറ്റത്തിലും സിവിലിയന്‍ കേന്ദ്രങ്ങള്‍ക്ക് നേരെ നടന്ന ഭീകരാക്രമണങ്ങളിലും പ്രതിഷേധിച്ച് ഇറാന്‍ അംബാസഡര്‍ റെസ അമേരിയെ യുഎഇ വിദേശകാര്യ മന്ത്രാലയം വിളിച്ചുവരുത്തി. ആക്രമണങ്ങളെ ശക്തമായ ഭാഷയില്‍ അപലപിച്ചുകൊണ്ടുള്ള ഔദ്യോഗിക പ്രതിഷേധക്കുറിപ്പ് മന്ത്രാലയം അദ്ദേഹത്തിന് കൈമാറി.

യുഎഇ ഭൂപ്രദേശത്തിന് നേരെയുണ്ടായ ആക്രമണം രാജ്യത്തിന്റെ പരമാധികാരത്തിന്മേലുള്ള കടന്നുകയറ്റവും ദേശീയ സുരക്ഷയ്ക്ക് നേരെയുള്ള ഭീഷണിയുമാണ്. ഇത് അന്താരാഷ്ട്ര ഉടമ്പടികളുടെയും പ്രമേയങ്ങളുടെയും നഗ്‌നമായ ലംഘനമാണെന്ന് മന്ത്രാലയം വ്യക്തമാക്കി. ആക്രമണത്തിന് ഇറാന്‍ സര്‍ക്കാര്‍ നല്‍കുന്ന ഒരു ന്യായീകരണവും അംഗീകരിക്കാനാവില്ലെന്ന് സഹമന്ത്രി ഖലീഫ ഷഹീന്‍ അല്‍ മരാര്‍ അംബാസഡറെ അറിയിച്ചു.

ജനവാസ കേന്ദ്രങ്ങള്‍, വിമാനത്താവളങ്ങള്‍, തുറമുഖങ്ങള്‍, മറ്റ് സേവന കേന്ദ്രങ്ങള്‍ എന്നിവ ലക്ഷ്യമിട്ട് നടന്ന പ്രകോപനപരമായ നീക്കങ്ങള്‍ നിരപരാധികളായ സാധാരണക്കാരുടെ ജീവന്‍ അപകടത്തിലാക്കുന്നതാണെന്ന് യുഎഇ കുറ്റപ്പെടുത്തി.

മേഖലയില്‍ യുദ്ധസമാനമായ സാഹചര്യം നിലനില്‍ക്കുന്നതിനാല്‍ നയതന്ത്ര ബന്ധങ്ങള്‍ കൂടുതല്‍ വഷളാകാനാണ് സാധ്യതയെന്ന് രാഷ്ട്രീയ നിരീക്ഷകര്‍ വിലയിരുത്തുന്നു.

ഇറാന്‍ നടത്തിയ മിസൈല്‍ ആക്രമണങ്ങളെ ശക്തമായി അപലപിച്ചുകൊണ്ട്, ടെഹ്റാനിലെ തങ്ങളുടെ എംബസി അടച്ചുപൂട്ടുന്നതായും അംബാസഡറെയും മറ്റ് നയതന്ത്ര ഉദ്യോഗസ്ഥരെയും പൂര്‍ണ്ണമായും പിന്‍വലിക്കുന്നതായും യുഎഇ പ്രഖ്യാപിച്ചു.