വാഷിംഗ്ടണ്-ഇസ്രായേലില് കുടുങ്ങിക്കിടക്കുന്ന അമേരിക്കന് പൗരന്മാരെ ഒഴിപ്പിക്കാനോ അവര്ക്ക് രാജ്യം വിടാന് നേരിട്ടുള്ള സഹായം നല്കാനോ നിലവില് സാധിക്കില്ലെന്ന് ജറുസലേമിലെ യു.എസ് എംബസി അറിയിച്ചു. സുരക്ഷാ സാഹചര്യം മോശമായതിനെത്തുടര്ന്ന് എംബസിയുടെ പ്രവര്ത്തനങ്ങള് താത്കാലികമായി നിര്ത്തിവെച്ചിരിക്കുകയാണ്. ഇസ്രായേല് വിടാന് ആഗ്രഹിക്കുന്നവര് ജോര്ദാന് വഴിയുള്ള യാത്ര ഒഴിവാക്കി ഈജിപ്ത് വഴി പോകണമെന്ന് യുഎസ് അംബാസഡര് നിര്ദ്ദേശിച്ചു. ബെന് ഗുരിയന് വിമാനത്താവളം അടച്ചതും വാണിജ്യ വിമാനങ്ങള് ലഭ്യമല്ലാത്തതും യാത്രക്കാരെ പ്രതിസന്ധിയിലാക്കുന്നുണ്ട്.
അതേസമയം, ഖത്തര്, കുവൈറ്റ് എന്നിവിടങ്ങളിലെ എംബസികളില് നിന്ന് അത്യാവശ്യ വിഭാഗത്തില് പെടാത്ത ജീവനക്കാരോടും അവരുടെ കുടുംബങ്ങളോടും ഉടന് മടങ്ങാന് യുഎസ് സ്റ്റേറ്റ് ഡിപ്പാര്ട്ട്മെന്റ് ഉത്തരവിട്ടു. നേരത്തെ ജോര്ദാന്, ബഹ്റൈന്, ഇറാഖ് എന്നിവിടങ്ങളിലും സമാനമായ സുരക്ഷാ മുന്നറിയിപ്പ് നല്കിയിരുന്നു. മേഖലയിലെ സംഘര്ഷങ്ങള് കണക്കിലെടുത്ത് കുവൈറ്റിലെ യുഎസ് എംബസി അടുത്ത അറിയിപ്പ് ഉണ്ടാകുന്നത് വരെ അടച്ചിടുമെന്ന് ഔദ്യോഗികമായി അറിയിച്ചു. ഇറാന് നേരെയുള്ള സൈനിക നീക്കങ്ങള് തുടരുന്ന പശ്ചാത്തലത്തിലാണ് ഈ അടിയന്തര നടപടി.
സൗദി അറേബ്യ, യുഎഇ, ഒമാന് തുടങ്ങി 15 ഓളം മിഡില് ഈസ്റ്റ് രാജ്യങ്ങളില് കഴിയുന്ന അമേരിക്കന് പൗരന്മാരോട് ലഭ്യമായ വാണിജ്യ മാര്ഗങ്ങള് ഉപയോഗിച്ച് എത്രയും വേഗം മടങ്ങാനാണ് വാഷിംഗ്ടണ് ആവശ്യപ്പെട്ടിരിക്കുന്നത്. പലയിടങ്ങളിലും ഡ്രോണ്, മിസൈല് ആക്രമണ ഭീഷണിയുള്ളതിനാല് അതീവ ജാഗ്രത പാലിക്കാനും സുരക്ഷിതമായ ഇടങ്ങളില് അഭയം തേടാനും നിര്ദ്ദേശമുണ്ട്. നിലവിലെ സാഹചര്യത്തില് എംബസികള് വഴി നേരിട്ടുള്ള ഒഴിപ്പിക്കല് പ്രായോഗികമല്ലാത്തതിനാല് പൗരന്മാര് സ്വന്തം നിലയില് സുരക്ഷാ ക്രമീകരണങ്ങള് ഒരുക്കണമെന്നും യുഎസ് അറിയിച്ചു.
.jpg)
Related News
