കൊല്ലം- ആശുപത്രിയില്‍ പരിശോധനക്ക് പോലീസ് എത്തിച്ചയാളുടെ കുത്തേറ്റ് ഡോ. വന്ദന ദാസ് മരിച്ച കേസില്‍ കൊല്ലം അഡീഷണല്‍ സെഷന്‍സ് കോടതി വ്യാഴാഴ്ച വിധി പറയും. കൊട്ടാരക്കര താലൂക്ക് ആശുപത്രിയില്‍ ഹൗസ് സര്‍ജനായി ജോലി ചെയ്യുന്നതിനിടെ 2023 മേയ് 10-ന് പുലര്‍ച്ചെ 4.15-നാണ് ഡോ. വന്ദന ദാസിന് (23) കുത്തേറ്റത്. പ്രതി പൂയപ്പള്ളി സ്വദേശി സന്ദീപിനെ കുറ്റക്കാരനായി കോടതി കണ്ടെത്തിയിരുന്നു.

അന്നു രാവിലെ 8.45-ന് തിരുവനന്തപുരത്ത് സ്വകാര്യ ആശുപത്രിയിലായിരുന്നു വന്ദന ദാസിന്റെ അന്ത്യം. അത്യാഹിത വിഭാഗത്തില്‍ സര്‍ജിക്കല്‍ കത്രിക ഉപയോഗിച്ച് കൊല്ലം കുടവട്ടൂര്‍ എല്‍.പി. സ്‌കൂളിലെ അധ്യാപകനായ പൂയപ്പള്ളി സ്വദേശി സന്ദീപ് (46) ആണ് ഡോക്ടറെ കുത്തിക്കൊന്നത്. ഇയാളെ പിന്നീട് ജോലിയില്‍നിന്ന് പിരിച്ചുവിട്ടു.

മുട്ടുചിറ നമ്പിച്ചിറക്കാലായില്‍ കെ.ജി. മോഹന്‍ദാസിന്റെയും വസന്തകുമാരിയുടെയും ഏകമകളാണ് വന്ദന. അവരുടെ വീടുനിറയെ വന്ദനയുടെ ഓര്‍മ്മകള്‍ പേറുന്ന വസ്തുക്കളാണ്. പുസ്തകങ്ങളും പടങ്ങളും കളിപ്പാട്ടങ്ങളും വരെ. മരണം നടന്ന് രണ്ടുവര്‍ഷവും 10 മാസവും ഏഴു ദിവസവും ആകുമ്പോഴാണ് കേസില്‍ വിധി വരുന്നത്.

'ഡോക്ടര്‍ ജോലിസ്ഥലത്തുവെച്ച് പരിശോധനയ്ക്കെത്തിച്ചയാളുടെ ആക്രമണത്തില്‍ കൊല്ലപ്പെടുന്നത് അപൂര്‍വങ്ങളില്‍ അപൂര്‍വമാണ്. നിയമം അനുശാസിക്കുന്ന പരമാവധി ശിക്ഷ പ്രതിക്ക് ലഭിക്കുമെന്നാണ് പ്രതീക്ഷ. വിധി കേള്‍ക്കാനായി ഞങ്ങള്‍ കോടതി മുറിയിലുണ്ടാകും.' - മോഹന്‍ദാസും വസന്തകുമാരിയും പറഞ്ഞു.