ന്യൂഡല്‍ഹി: രാജ്യത്ത് പ്രീമിയം പെട്രോള്‍ വിലയില്‍ വര്‍ധനവ്. വിവിധ എണ്ണക്കമ്പനികള്‍ ലീറ്ററിന് 2.09 രൂപ മുതല്‍ 2.35 രൂപ വരെയാണ് വര്‍ധിപ്പിച്ചത്. വെള്ളിയാഴ്ച മുതല്‍ പുതിയ നിരക്കുകള്‍ പ്രാബല്യത്തില്‍ വന്നു. പശ്ചിമേഷ്യന്‍ സംഘര്‍ഷത്തെത്തുടര്‍ന്ന് രാജ്യാന്തര വിപണിയില്‍ ക്രൂഡ് ഓയില്‍ വില ബാരലിന് 100 ഡോളറിന് മുകളിലെത്തിയതാണ് ഈ വിലക്കയറ്റത്തിന് കാരണം.

ബിപിസിഎല്ലിന്റെ 'സ്പീഡ്', എച്ച്പിസിഎല്ലിന്റെ 'പവര്‍', ഇന്ത്യന്‍ ഓയിലിന്റെ 'എക്‌സ്പി 95' എന്നിവക്കാണ് വില കൂടിയത്. സാധാരണ പെട്രോളിന്റെ വിലയില്‍ നിലവില്‍ മാറ്റമില്ല.

കേന്ദ്ര പെട്രോളിയം മന്ത്രാലയം ജോയിന്റ് സെക്രട്ടറി സുജാത ശര്‍മ ഈ വിലവര്‍ധനവ് ഔദ്യോഗികമായി സ്ഥിരീകരിച്ചു. രാജ്യത്തെ ആകെ ഇന്ധന ഉപഭോഗത്തില്‍ 2 മുതല്‍ 4 ശതമാനം വരെ മാത്രമാണ് പ്രീമിയം പെട്രോളിന്റെ പങ്കെന്നും അതിനാല്‍ ഭൂരിഭാഗം ഉപഭോക്താക്കളെയും ഇത് ബാധിക്കില്ലെന്നും അവര്‍ വ്യക്തമാക്കി.