മലപ്പുറം: മുസ്ലിം ലീഗ് സംസ്ഥാന പ്രസിഡന്റ് പാണക്കാട് സാദിഖലി ശിഹാബ് തങ്ങള്ക്കെതിരെ സോഷ്യല് മീഡിയ വഴി ഉന്നയിക്കപ്പെട്ട വ്യാജ ലൈംഗിക ആരോപണത്തെ അപലപിച്ച് തവനൂര് എം.എല്.എ കെ.ടി. ജലീല്. തങ്ങള്ക്കെതിരായ വ്യക്തിഹത്യയ്ക്കെതിരെ ജാഗ്രത പാലിക്കണമെന്നും ഇത്തരം കുല്സിത നീക്കങ്ങള് ഗൗരവകരമാണെന്നും അദ്ദേഹം ഫേസ്ബുക്കില് കുറിച്ചു.
കക്ഷി രാഷ്ട്രീയത്തിനതീതമായി എല്ലാവരും ആദരിക്കുന്ന വ്യക്തിയാണ് സാദിഖലി തങ്ങളെന്നും, തന്റെ മഹല്ലിലെ ഖാദി കൂടിയായ അദ്ദേഹത്തെ താറടിച്ചുകാണിക്കാനുള്ള നീക്കം പ്രതിഷേധാര്ഹമാണെന്നും ജലീല് വ്യക്തമാക്കി.
പുതിയ സാങ്കേതിക വിദ്യകള് (AI) ഉപയോഗിച്ച് ആരെയും മോശക്കാരാക്കാന് സാധിക്കുമെന്നും, സാദിഖലി തങ്ങള്ക്കെതിരെ പ്രചരിക്കുന്നത് പൂര്ണ്ണമായും നിര്മ്മിതമായ വ്യാജ ചിത്രങ്ങളാണെന്നും അദ്ദേഹം ചൂണ്ടിക്കാട്ടി.
വ്യാജ പ്രചരണങ്ങള്ക്കെതിരെ നിയമനടപടി സ്വീകരിക്കാനുള്ള ലീഗ് നേതൃത്വത്തിന്റെ തീരുമാനത്തെ സ്വാഗതം ചെയ്യുന്നതായും ഈ വിഷയത്തില് തങ്ങള്ക്കൊപ്പം നില്ക്കുന്നുവെന്നും അദ്ദേഹം അറിയിച്ചു.
ഞായറാഴ്ച വൈകീട്ടോടെയാണ് ഒരു അജ്ഞാത ഫേസ്ബുക് അക്കൗണ്ട് വഴി തങ്ങള്ക്കെതിരെ അടിസ്ഥാനരഹിതമായ ആരോപണങ്ങള് ഉയര്ന്നത്. മുസ്ലിം ലീഗ് അഖിലേന്ത്യ ജനറല് സെക്രട്ടറി പി.കെ. കുഞ്ഞാലിക്കുട്ടി ഉള്പ്പെടെയുള്ളവര് പോലീസില് പരാതി നല്കുകയും അടിയന്തര ഇടപെടല് ആവശ്യപ്പെടുകയും ചെയ്തിരുന്നു. പ്രതിഷേധം ശക്തമായതോടെ ആരോപണം ഉന്നയിച്ച വ്യക്തി പോസ്റ്റ് പിന്വലിക്കുകയും അക്കൗണ്ട് ഡിലീറ്റ് ചെയ്യുകയും ചെയ്തിട്ടുണ്ട്.
Related News
