പോര്ട്ട് ആര്തര്: ടെക്സസിലെ പോര്ട്ട് ആര്തറിലുള്ള വലേറോ റിഫൈനറിയില് വന് സ്ഫോടനം. സ്ഫോടനത്തെത്തുടര്ന്ന് ആകാശത്തേക്ക് വലിയ തോതില് പുകപടലങ്ങള് ഉയര്ന്നത് പ്രദേശവാസികളെ പരിഭ്രാന്തരാക്കി. സുരക്ഷാ മുന്കരുതലിന്റെ ഭാഗമായി നഗരത്തിന്റെ പടിഞ്ഞാറന് മേഖലയിലുള്ളവര് വീടുകള്ക്കുള്ളില് തന്നെ കഴിയണമെന്ന് അധികൃതര് നിര്ദ്ദേശം നല്കി.
റിഫൈനറിയിലുണ്ടായ സ്ഫോടനം പോര്ട്ട് ആര്തര് ഫയര് ഡിപ്പാര്ട്ട്മെന്റിലെ അന്റോണിയോ മിച്ചല് സ്ഥിരീകരിച്ചു. സംഭവത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. സ്ഫോടന വിവരം അറിഞ്ഞയുടന് അഗ്നിശമന സേനാംഗങ്ങള് സ്ഥലത്തെത്തി നിയന്ത്രണവിധേയമാക്കാന് ശ്രമം തുടങ്ങി. റിഫൈനറിയിലെ ഒരു ഹീറ്റര് യൂണിറ്റിലുണ്ടായ തകരാറാകാം സ്ഫോടനത്തിന് കാരണമെന്ന് ജെഫേഴ്സണ് കൗണ്ടി ഷെരീഫ് സീന സ്റ്റീഫന്സ് അറിയിച്ചു.
ലഭ്യമായ വിവരങ്ങള് പ്രകാരം സംഭവത്തില് ആര്ക്കും പരിക്കേറ്റിട്ടില്ല. ആരെയും മാറ്റിപ്പാര്പ്പിക്കേണ്ട സാഹചര്യമില്ലെന്നും വായുനിലവാരം അധികൃതര് സൂക്ഷ്മമായി നിരീക്ഷിച്ചു വരികയാണെന്നും റിപ്പോര്ട്ടുകള് വ്യക്തമാക്കുന്നു. സ്ഫോടനസമയത്ത് കാര് വിന്ഡോകള് പോലും കുലുങ്ങുന്ന വിധത്തിലുള്ള ഉഗ്രശബ്ദം കേട്ടതായി മിഡ്-കൗണ്ടിയിലെ സാക്ഷികള് പറഞ്ഞു. അന്തരീക്ഷത്തില് ചീഞ്ഞ മുട്ടയുടെ ഗന്ധത്തിന് സമാനമായ ദുര്ഗന്ധം അനുഭവപ്പെട്ടതായും ചിലര് ചൂണ്ടിക്കാട്ടി.
അയല്നഗരമായ നെതര്ലാന്ഡിനെ സ്ഫോടനം നിലവില് ബാധിച്ചിട്ടില്ലെന്ന് നഗരസഭാ അധികൃതര് അറിയിച്ചു. സൗത്ത് സൈഡ് മേഖലയില് പോലീസും അഗ്നിശമന സേനയും പട്രോളിംഗ് നടത്തുകയും വായുനിലവാരം പരിശോധിക്കുകയും ചെയ്യുന്നുണ്ട്. ആശങ്കപ്പെടേണ്ട സാഹചര്യമില്ലെന്നും മാറ്റങ്ങളുണ്ടായാല് ജനങ്ങളെ അറിയിക്കുമെന്നും അധികൃതര് കൂട്ടിച്ചേര്ത്തു.
സ്ഫോടനത്തെത്തുടര്ന്ന് റിഫൈനറിക്ക് സമീപമുള്ള സ്റ്റേറ്റ് ഹൈവേ 87 (SH 87), സ്റ്റേറ്റ് ഹൈവേ 82 (SH 82) വഴിയുള്ള യാത്ര ഒഴിവാക്കണമെന്ന് ടെക്സസ് ഗതാഗത വകുപ്പ് ഡ്രൈവര്മാര്ക്ക് മുന്നറിയിപ്പ് നല്കി.
Related News
