റിയാദ്- മാധ്യമ ഉള്ളടക്കത്തിന്റെ ഗുണനിലവാരം ഉറപ്പുവരുത്തുന്നതിന്റെ ഭാഗമായി സൗദി അറേബ്യയിലെ ജനറല്‍ അതോറിറ്റി ഫോര്‍ മീഡിയ റെഗുലേഷന്‍ 'സ്ട്രീറ്റ് ക്യാറ്റ്' എന്ന പേരിലുള്ള പോഡ്കാസ്റ്റിന്റെ അണിയറശില്‍പികളെ വിളിച്ചുവരുത്തുകയും നിര്‍മ്മാണ കമ്പനിയുടെ ലൈസന്‍സ് റദ്ദാക്കുകയും ചെയ്തു. മാധ്യമ ചട്ടങ്ങള്‍ ലംഘിക്കുന്ന തരത്തിലുള്ള ഉള്ളടക്കങ്ങള്‍ നിരീക്ഷിക്കുന്നതിനുള്ള അതോറിറ്റിയുടെ തീവ്രശ്രമങ്ങളുടെ ഭാഗമായാണ് ഈ നടപടി.

പോഡ്കാസ്റ്റിലെ ഉള്ളടക്കം മാധ്യമ ഗുണനിലവാര മാനദണ്ഡങ്ങള്‍ പാലിക്കുന്നില്ലെന്ന് ഔദ്യോഗിക വൃത്തങ്ങള്‍ വ്യക്തമാക്കി. ദേശീയവും സാമൂഹികവുമായ മൂല്യങ്ങള്‍ക്ക് നിരക്കാത്തതും മാന്യതയില്ലാത്തതുമായ ഭാഷയാണ് പ്രോഗ്രാമില്‍ ഉപയോഗിച്ചിരിക്കുന്നത്. ഇത് രാജ്യത്തെ മാധ്യമ നിയമങ്ങളുടെ നഗ്‌നമായ ലംഘനമാണെന്ന് അതോറിറ്റി കണ്ടെത്തി.

സാംസ്‌കാരിക മൂല്യങ്ങളെ ഹനിക്കുന്ന രീതിയിലുള്ള പദപ്രയോഗങ്ങളാണ് പോഡ്കാസ്റ്റില്‍ ഉള്‍പ്പെട്ടിരുന്നത്. ലൈസന്‍സ് റദ്ദാക്കിയതോടെ നിര്‍മ്മാണ കമ്പനിക്ക് ഇനി മുതല്‍ പ്രവര്‍ത്തനാനുമതി ഉണ്ടായിരിക്കില്ല. വരും ദിവസങ്ങളില്‍ എല്ലാ മാധ്യമ പ്ലാറ്റ്ഫോമുകളിലും നിരീക്ഷണം ശക്തമാക്കുമെന്നും നിയമലംഘകര്‍ക്കെതിരെ വിട്ടുവീഴ്ചയില്ലാത്ത നടപടികള്‍ സ്വീകരിക്കുമെന്നും അതോറിറ്റി വ്യക്തമാക്കി.