ഇസ്ലാമാബാദ്- ഇസ്ലാമാബാദില് അമേരിക്കയുമായി നടക്കുന്ന ചര്ച്ചകളില് നിര്ണ്ണായക പുരോഗതിയുണ്ടെന്ന് ഇറാന് ഔദ്യോഗിക മാധ്യമങ്ങള് റിപ്പോര്ട്ട് ചെയ്തു. പാകിസ്ഥാന് തലസ്ഥാനത്ത് നടന്ന തീവ്രമായ കൂടിയാലോചനകള്ക്ക് ശേഷം ഇരുപക്ഷവും വിശദമായ സാങ്കേതിക ചര്ച്ചകളിലേക്ക് കടന്നതായാണ് വിവരം. പാകിസ്ഥാന്റെ മധ്യസ്ഥതയിലുള്ള ചര്ച്ചകള്ക്ക് പുറമെ പ്രത്യേക 'ഡിസ്കഷന് റൂമുകള്' വഴിയും ഇറാന് പ്രതിനിധി സംഘം ചര്ച്ചകള് തുടരുകയാണ്. എഴുപതിലധികം അംഗങ്ങളടങ്ങുന്ന വന് സംഘമാണ് ഇറാന്റെ ഭാഗത്തുനിന്നും ചര്ച്ചകളില് പങ്കെടുക്കുന്നത്.
അതേസമയം, അമേരിക്കന് പ്രസിഡന്റ് ഡൊണാള്ഡ് ട്രംപ് സോഷ്യല് മീഡിയ പ്ലാറ്റ്ഫോമായ 'ട്രൂത്ത് സോഷ്യല്' വഴി നടത്തിയ പരാമര്ശം മേഖലയില് വീണ്ടും ചര്ച്ചയായിരിക്കുകയാണ്. ലോകരാജ്യങ്ങള്ക്ക് വേണ്ടി ഹോര്മുസ് കടലിടുക്ക് 'വൃത്തിയാക്കുന്ന' നടപടികള് അമേരിക്ക ആരംഭിച്ചതായി ട്രംപ് കുറിച്ചു. ചൈന, ജപ്പാന്, ഫ്രാന്സ് തുടങ്ങിയ രാജ്യങ്ങള്ക്ക് ഇത്തരം നടപടികള്ക്ക് ധൈര്യമില്ലെന്നും അദ്ദേഹം പരിഹസിച്ചു. ചര്ച്ചകള് വഴി വെടിനിര്ത്തല് സ്ഥിരമായ ഒരു ഉടമ്പടിയിലേക്ക് എത്തിക്കാന് ശ്രമിക്കുന്നതിനിടെയാണ് ട്രംപിന്റെ ഈ പ്രസ്താവന.
ഇതിനിടയില്, അമേരിക്കന് ഗൈഡഡ് മിസൈല് ഡിസ്ട്രോയറായ 'യുഎസ്എസ് മൈക്കല് മര്ഫി' ഹോര്മുസ് കടലിടുക്കിന് നേരെ നീങ്ങുന്നതായി കപ്പലുകളെ നിരീക്ഷിക്കുന്ന പ്ലാറ്റ്ഫോമുകള് കണ്ടെത്തി. അമേരിക്കന് കപ്പല് മുന്നോട്ട് നീങ്ങുകയാണെങ്കില് 30 മിനിറ്റിനുള്ളില് ആക്രമിക്കുമെന്ന് ഇറാന് മുന്നറിയിപ്പ് നല്കിയതായി ഫാര്സ് വാര്ത്താ ഏജന്സി റിപ്പോര്ട്ട് ചെയ്തു. പാകിസ്ഥാന് മധ്യസ്ഥര് മുഖേനയാണ് ഇറാന് ഈ സന്ദേശം അമേരിക്കയെ അറിയിച്ചത്. നയതന്ത്ര ചര്ച്ചകള് ഒരു വശത്ത് നടക്കുമ്പോഴും കടലിലെ സൈനിക നീക്കങ്ങള് മേഖലയെ യുദ്ധഭീതിയിലാഴ്ത്തുകയാണ്.
.jpg)
