മക്ക: ഹജ്ജ് ചട്ടങ്ങള് ലംഘിച്ചതുമായി ബന്ധപ്പെട്ട മൂന്ന് വ്യത്യസ്ത സംഭവങ്ങളിലായി മൂന്ന് സൗദി പൗരന്മാരെയും 19 വിദേശികളെയും സുരക്ഷാ സേന അറസ്റ്റ് ചെയ്തു. കൃത്യമായ ഹജ്ജ് പെര്മിറ്റില്ലാതെ ആളുകളെ മക്കയില് പ്രവേശിപ്പിക്കാന് ശ്രമിച്ചതിനും വ്യാജ പരസ്യങ്ങള് നല്കിയതിനുമാണ് നടപടി.
ഹജ്ജ് പെര്മിറ്റില്ലാത്ത 17 പാകിസ്ഥാന് സ്വദേശികളെ മക്കയില് എത്തിക്കാന് ശ്രമിച്ച രണ്ട് സൗദി പൗരന്മാരെ ഹജ്ജ് സെക്യൂരിറ്റി ഫോഴ്സ് പിടികൂടി. പ്രധാന പാതകള് ഒഴിവാക്കി ഉള്വഴികളിലൂടെയും മലനിരകളിലൂടെയും ഇവരെ കടത്താനായിരുന്നു ശ്രമം. പ്രതികള്ക്കെതിരെ നിയമനടപടികള് സ്വീകരിച്ചതായി അധികൃതര് അറിയിച്ചു.
മറ്റൊരു സംഭവത്തില്, ഒരു യമനി സ്വദേശിയെ നിയമവിരുദ്ധമായി മക്കയില് എത്തിക്കാന് ശ്രമിച്ച അതേ രാജ്യക്കാരനായ താമസക്കാരനെയും സുരക്ഷാ സേന അറസ്റ്റ് ചെയ്തു. ഇയാളെ തുടര്ന്നുള്ള നിയമനടപടികള്ക്കായി പബ്ലിക് പ്രോസിക്യൂഷന് കൈമാറി.
സോഷ്യല് മീഡിയ വഴി ഹജ്ജിന് വ്യാജ പെര്മിറ്റുകള് വാഗ്ദാനം ചെയ്ത് പരസ്യം നല്കിയ സ്വദേശിയെ മക്ക പോലീസ് അറസ്റ്റ് ചെയ്തു. ജനങ്ങളെ തെറ്റിദ്ധരിപ്പിക്കുന്ന രീതിയില് പരസ്യം നല്കി തട്ടിപ്പിന് ശ്രമിച്ചതിനാണ് ഇയാള്ക്കെതിരെ കേസെടുത്തത്. ആവശ്യമായ നിയമനടപടികള് പൂര്ത്തിയാക്കിയ ശേഷം ഇയാളെയും പബ്ലിക് പ്രോസിക്യൂഷന് വിട്ടു.
എല്ലാവരും ഹജ്ജ് നിയമങ്ങളും നിര്ദ്ദേശങ്ങളും കര്ശനമായി പാലിക്കണമെന്ന് പൊതു സുരക്ഷാ ഡയറക്ടറേറ്റ് ആവശ്യപ്പെട്ടു. നിയമലംഘനങ്ങള് ശ്രദ്ധയില്പ്പെട്ടാല് മക്ക, മദീന, റിയാദ്, കിഴക്കന് പ്രവിശ്യ എന്നിവിടങ്ങളിലുള്ളവര് 911 എന്ന നമ്പറിലും, രാജ്യത്തിന്റെ മറ്റ് ഭാഗങ്ങളിലുള്ളവര് 999 എന്ന നമ്പറിലും വിവരം അറിയിക്കണമെന്നും അധികൃതര് അഭ്യര്ത്ഥിച്ചു.
Related News
