റിയാദ്: സൗദി അറേബ്യയില്‍ വീണ്ടും ഹരിത ഊര്‍ജ്ജ മാതൃകയുമായി ലുലു ഗ്രൂപ്പ്. ഹൈപ്പര്‍മാര്‍ക്കറ്റുകളുടെ പ്രവര്‍ത്തനം പരിസ്ഥിതി സൗഹൃദമാക്കുന്നതിന്റെ ഭാഗമായി മൂന്നാംഘട്ട സോളാര്‍ ഊര്‍ജ്ജ പദ്ധതി ലുലു ഗ്രൂപ്പ് പ്രഖ്യാപിച്ചു. അഞ്ച് പ്രമുഖ ഹൈപ്പര്‍മാര്‍ക്കറ്റുകളുടെ മേല്‍ക്കൂരയില്‍ സോളാര്‍ പവര്‍ പ്ലാന്റുകള്‍ സ്ഥാപിക്കുന്ന ഈ പദ്ധതി 'സൗദി വിഷന്‍ 2030'-ന്റെ സുസ്ഥിര വികസന ലക്ഷ്യങ്ങളുമായി ചേര്‍ന്നുനില്‍ക്കുന്നതാണ്.

കാനൂ-ക്ലീന്‍മാക്‌സ് സംയുക്ത സംരംഭത്തിന്റെ സഹകരണത്തോടെയാണ് പദ്ധതി നടപ്പിലാക്കുന്നത്. റിയാദ് അവന്യൂ മാളിലെ ലുലു ഹൈപ്പര്‍മാര്‍ക്കറ്റില്‍ സ്ഥാപിക്കുന്ന 1,089 kWp ശേഷിയുള്ള പ്ലാന്റിലൂടെ പ്രതിവര്‍ഷം 1.85 ദശലക്ഷം സണവ വൈദ്യുതി ഉത്പാദിപ്പിക്കാന്‍ സാധിക്കും. ദമ്മാം ഷാതി ഹൈപ്പര്‍മാര്‍ക്കറ്റില്‍ 810 kWp (1.41 ദശലക്ഷം kWh), റാഖ ബ്രാഞ്ചില്‍ 581 kWു (1.01 ദശലക്ഷം kWh), റയ്യാനില്‍ 550 kWp (962,500 kWh), കിഴക്കന്‍ ദമ്മാമിലെ ഹൈപ്പര്‍മാര്‍ക്കറ്റില്‍ 187 kWp (327,250 kWh) എന്നിങ്ങനെയാണ് മറ്റ് പ്ലാന്റുകളുടെ ഉത്പാദന ശേഷി.

റിയാദില്‍ നടന്ന ചടങ്ങില്‍ ലുലു സൗദി ഹൈപ്പര്‍മാര്‍ക്കറ്റ് ഡയറക്ടര്‍ മുഹമ്മദ് ഹാരിസ്, കാനൂ ഇന്‍ഡസ്ട്രിയല്‍ ആന്‍ഡ് എനര്‍ജി ചെയര്‍മാന്‍ ഫഹദ് ഫൗസി കാനൂ എന്നിവര്‍ കരാറില്‍ ഒപ്പുവെച്ചു. ലുലു ഗ്രൂപ്പ് ഈസ്റ്റേണ്‍ പ്രൊവിന്‍സ് റീജിയണല്‍ ഡയറക്ടര്‍ ഷംനാസ് പള്ളിക്കണ്ടി, പ്രോജക്ട്‌സ് ജനറല്‍ മാനേജര്‍ സാഹിദ് അസ്ഹര്‍, അഡ്മിനിസ്‌ട്രേഷന്‍ മാനേജര്‍ സയിദ് ബത്തേല്‍ അല്‍ സുബായി എന്നിവരും, കാനൂ ഗ്രൂപ്പിനെ പ്രതിനിധീകരിച്ച് സി.ഇ.ഒ മനോജ് കുമാര്‍ ത്രിപാഠി, പ്രശാന്ത് കരുണാകരന്‍, അലി കാനൂ, സാക്കിര്‍ അലി എന്നിവരും ചടങ്ങില്‍ പങ്കെടുത്തു.

റീട്ടെയില്‍ മേഖലയില്‍ പുനരുപയോഗ ഊര്‍ജ്ജം എന്ന ആശയം നടപ്പിലാക്കുന്നതില്‍ ലുലു ഗ്രൂപ്പ് നടത്തുന്ന സജീവമായ ഇടപെടലുകളുടെ ഉദാഹരണമാണ് ഈ മൂന്നാം ഘട്ട പദ്ധതിയെന്ന് ലുലു സൗദി ഹൈപ്പര്‍മാര്‍ക്കറ്റ് ഡയറക്ടര്‍ മുഹമ്മദ് ഹാരിസ് പറഞ്ഞു. സൗദി അറേബ്യയുടെ സുസ്ഥിര വികസന ലക്ഷ്യങ്ങളോടുള്ള പ്രതിബദ്ധതയുടെ അടയാളമാണിതെന്നും കാനൂ-ക്ലീന്‍മാക്‌സ് പോലുള്ള വിദഗ്ധരുമായുള്ള പങ്കാളിത്തം വഴി പ്രവര്‍ത്തനക്ഷമത വര്‍ദ്ധിപ്പിക്കാനും പരിസ്ഥിതി ആഘാതം കുറയ്ക്കാനും സാധിക്കുമെന്നും അദ്ദേഹം കൂട്ടിച്ചേര്‍ത്തു.

അടുത്ത കുറച്ച് മാസങ്ങള്‍ക്കുള്ളില്‍ അഞ്ച് സ്ഥലങ്ങളിലും സോളാര്‍ പ്ലാന്റുകള്‍ പൂര്‍ണ്ണമായി പ്രവര്‍ത്തനസജ്ജമാകും. ഉപഭോക്താക്കള്‍ക്ക് കൂടുതല്‍ ഹരിതാഭമായ ഷോപ്പിംഗ് അനുഭവം നല്‍കുക എന്ന ലക്ഷ്യത്തിലേക്കുള്ള ലുലുവിന്റെ പ്രധാന ചുവടുവെപ്പാണിത്.